Hebri Bi 6

1 Lɔ ɔ he ɔ, nyɛ ha wa si sisije níhi nɛ kɔɔ Kristo he ɔ, nɛ waa ya wa hɛ mi kɛ tsɔɔmi nɛ sa nihi nɛ wa ngɛ hemi kɛ yemi ɔ mi. Sisije níhi nɛ wa tsɔɔ nyɛ ɔ, e hia we kaa wa pa hi lɔ ɔmɛ tsɔɔe kpamisa. Wa de nyɛ ke je mi bami yaya nɛ he be se nami ɔ, nyɛɛ ngmɛɛ he, konɛ nyɛ he Mawu nyɛɛ ye.

2 Níhi nɛ wa tsɔɔ nyɛ nɛ kɔɔ nɔ sɔlemi, nine nɛ a kɛ pueɔ nɔ nɔ, gbogboehi a si temi, kɛ nyagbe kojomi he ɔ, e hia we kaa waa hi lɔ ɔmɛ tsɔɔe kpamisa.

3 Ke Mawu suɔ ɔ, wa maa ya wa hɛ mi.

4 Nihi nɛ he we Kristo yi hu ɔ, kɛ nɔ ko maa pee kɛ tsake mɛ ekohu kɛɛ? Be ko ɔ, a na Mawu la a, Mawu nike ní ɔ hu a tso hyɛ, nɛ Mumi Klɔuklɔu ɔ hu ba a nɔ.

5 A kpa si kaa Mawu munyu ɔ hi, nɛ he wami nɛ maa hi si ngɛ je nɛ maa ba a mi ɔ, a nu he.

6 Kɛkɛ nɛ a gbee si. Jehanɛ ɔ nɛ a je blɔ ngɛ Mawu Bi ɔ sɛue ekohu, nɛ a ngɛ lɛ ahlua bɔe kikɛ nɛ ɔ, kɛ nɔ ko maa pee kɛɛ nɛ e ha a tsake a tsui?

7 Zugba nɛ hiɔmi nɛɔ pueɔ nɔ babaaba, nɛ nyu ɔ sɛɔ zu mi, nɛ ní nɛ a duɔ ɔ baa saminya kɛ ha nihi nɛ tsuɔ ní ngɛ nɔ ɔ Mawu gbaa zugba a lɛ.

8 ⓩ Se ke mio, kɛ hu lɛ puɛɔ ngɛ nɔ ɔ, lɛɛ se nami ko be he kulaa. Mawu maa gbiɛ zugba a, nɛ nyagbe ɔ, a kɛ la maa sã lɛ.

9 Wa huɛmɛ nɛ wa suɔ, ke wa ngɛ munyu tue kaa kikɛ nɛ ɔ po, nyɛɛ lɛɛ wa heɔ nyɛ yeɔ kaa nyɛ ngɛ nɔ́ kpakpa pee, nɛ lɔ ɔ ma ha nɛ Mawu ma he nyɛ yi wami.

10 Mawu yi tue gbogboe sane. Ní nɛ nyɛ tsu, kɛ suɔmi nɛ nyɛ je kpo ha lɛ ɔ, e hɛ be nɔ jee gblegbleegble. Nyɛ pee enɛ ɔ kɛ sɔmɔ ní klɔuklɔu ɔmɛ, nɛ nyɛ ngɛ pee kɛ mwɔɔ.

11 Nɔ́ nɛ wa ngɛ hlae ji kaa bɔ nɛ nyɛɛ kɛ hɛdɔ tsu nɔ́ nɛ ɔ, nyɛ ti nɔ tsuaa nɔ maa hɛɛ mi kɛ ya si nyagbe. Kɛkɛ ɔ, níhi nɛ nyɛ ngɔ nyɛ hɛ ngɔ fɔ nɔ ɔ, nyɛ ma na a nɔ mi mami.

12 Nyɛ ko pee hejɔ; se mohu nihi nɛ he Mawu ye, nɛ a to a tsui si, nɛ lɔ ɔ he a nine su nɔ́ nɛ Mawu wo si ɔ nɔ ɔ, nyɛɛ kase mɛ.

Mawu ma e munyu ɔ nɔ mi

13 Benɛ Mawu wo Abraham si ɔ, e ka lɛ kita kɛ ma nɔ mi. Akɛnɛ nɔ ko be nɛ pe lɛ Mawu ɔ he je ɔ, e ngɔ lɛ nitsɛ e biɛ kɛ ka kita.

14 ⓐ E de ke, “I ngɛ mo si woe kaa ma gbaa mo, nɛ ma ha o nina maa hiɛ babauu.”

15 Abraham to e tsui si, nɛ e nine su nɔ́ nɛ Mawu ke e ma ha lɛ ɔ nɔ.

16 Ke nɔ ko ma ka kita a, e ngɔɔ nɔ ko nɛ pe lɛ biɛ kɛ kaa, nɛ e kɛ maa munyu nɛ e tu ɔ nɔ mi.

17 Lɔ ɔ he ɔ, bɔ nɛ pee nɛ nihi nɛ Mawu wo mɛ si ɔ, a yi mi nɛ tɛ mɛ kaa Mawu tsakee we e yi mi tomi ɔ, e ka kita kɛ ma nɔ mi.

18 E tsɔɔ kaa nɔ́ enyɔ nɛ ɔmɛ be tsakee gblegbleegble, nɛ Mawu hu be a he lakpa yee. Kɛkɛ ɔ, kɛ gu a nɔ ɔ, wɔ nihi nɛ wa ba sa we ngɛ Mawu ngɔ ɔ, e maa wo wɔ he wami, konɛ waa pɛtɛ nɔ́ nɛ wa ngɔ wa hɛ ngɔ fɔ nɔ ɔ he nɛ wa.

19 ⓑ Nɔ́ nɛ wa ngɔ wa hɛ kɛ fɔ nɔ nɛ ɔ ngɛ kaa osɛkɛ nɛ nu wɔ kɛ da si kpɛii, nɛ e kɛ wɔ ya su sɔlemi tsu ɔ mi pomi bo ɔ se tɔɔ.

20 ⓒ Wa he ɔ, Yesu sɛ wa hɛ mi kɛ ho lejɛ ɔ ya, nɛ e ya pee osɔfo nɔkɔtɔma pe kulaa kɛ yaa neneene kaa Melkizedek pɛ.