Timoteo II, 4

1 I ngɛ Mawu, kɛ Kristo Yesu odase tsɛe kɛ ngɛ mo ga woe. Kristo ma ba ye matsɛ; e ma ba kojo nihi nɛ a hɛ ngɛ, kɛ ni nɛmɛ nɛ gbo ɔ tsuo.

2 Lɔ ɔ he ɔ, yaa nɔ nɛ o fiɛ sɛ gbi ɔ be tsuaa be nɛ o ko kpa. Ke o ngɛ munyu ɔ fiɛe ɔ, ná tsui kɛ tsɔɔ tue buli ɔmɛ nɔ́ nya konɛ a na nya saminya. Ka ni ɔmɛ a hɛ mi, nɛ o wo mɛ ga ngɛ be nɛ sa mi.

3 Be ma nɛ nihi be suɔe kaa a maa bu tsɔɔmi kpakpa tue. Mohu ɔ, a ma hla ní tsɔɔli ha a he; a ma hla nihi nɛ maa tsɔɔ mɛ níhi nɛ maa ngɔ ngɛ a tue mi.

4 A be suɔe kulaa kaa a maa nu anɔkuale ɔ; a ma hla kaa a maa bu nyazia mohu tue.

5 Se moo lɛɛ, o hɛ nɛ ka si be tsuaa be. Ke o ngɛ nɔ́ nae ɔ, to o tsui si. Bɔɔ sane kpakpa a fiɛmi he mɔde wawɛɛ, konɛ o pee Mawu sɔmɔlɔ kpakpa.

6 Imi lɛɛ a miɔ nɛ a ngɔ mi kɛ sã bɔ. Ee, be ɔ nɛ ma je je ɔ mi ɔ su.

7 Ta kpakpa a, i hwu; i tu fo ɔ tsuo gbe nya. I pɛtɛ hemi kɛ yemi ɔ he.

8 Lɔ ɔ he ɔ, Mawu ngɔ ye hiɔwo nɛ ji jlasi nɛ e kɛ haa nihi tsuo nɛ peeɔ nɔ́ nɛ da a ngɔ to ha mi. Kojomi ligbi ɔ, Nyɔmtsɛ Yesu Kristo, nɔ nɛ yeɔ dami sane ɔ maa ngɔ ye jlasi ɔ ngɔ ha mi. Pi imi nɔ kake pɛ nɛ e ma ha, se mohu e ma ha nihi tsuo nɛ suɔ lɛ, nɛ a ngɛ e bami ɔ blɔ hyɛe ɔ.

Paulo nitsɛ he sane

9 Bɔɔ mɔde nɛ o ba ye ngɔ ngɛ be kpiti mi;

10 ⓗ ejakaa Dema lɛɛ e ya suɔ mwɔnɛmwɔnɛ je nɛ ɔ, nɛ e je ye he kɛ ho Tesalonika ya. Kreske ho Galatia ya, nɛ Tito hu ho Dalmatia ya.

11 ⓘ Luka pɛ lɛ ngɛ ye ngɔ amlɔ nɛ ɔ. Hla Marko nɛ o kɛ lɛ nɛ ba, ejakaa e he hia saminya ngɛ sɔmɔmi ní tsumi ɔ he.

12 ⓙ Tihiko lɛɛ i tsɔ lɛ Efeso.

13 ⓚ I si ye tade klɔii ɔ kɛ ha Karpo ngɛ Troya; ke o ma a, ngɔɔ kɛ ba. Ngɔɔ womi ɔmɛ hu kɛ ba, titli ɔ, ní nɛmɛ nɛ a ngɔ lohwe he womi kɛ pee ɔ.

14 ⓛ Aleksandro, sɔlɔ ɔ ye mi sane yaya ko; nɔ́ yeyee nɛ e pee mi ɔ, Nyɔmtsɛ ɔ nɛ wo lɛ hiɔ.

15 Moo hyɛ o he ngɛ e he, ejakaa e te si wawɛɛ ngɔ si munyu ɔ nɛ wa ngɛ fiɛe ɔ.

16 Kekleekle nɛ i ya fa ye he ngɛ kojomi he ɔ, nɔ ko nɔ ko kɛ mi yɛ. Mɛ tsuo a si mi; Mawu kó gbla a tue ngɛ enɛ ɔ he.

17 Se Nyɔmtsɛ ɔ piɛ ye he, nɛ e wo mi he wami, nɛ i nyɛ fiɛ sane kpakpa a kɛ ha ma je li ɔmɛ tsuo. Bɔ nɛ Mawu je mi kɛ je gbenɔ nya mi ji nɛ ɔ nɛ. Ee, e je mi kɛ je gbenɔ mi.

18 Nyɔmtsɛ ɔ ma je mi kɛ maa je ní yayamihi tsuo a mi, nɛ e kɛ mi maa ya hiɔwe he nɛ e ngɛ matsɛ yee ngɛ ɔ fiafiaafia. A maa wo e hɛ mi nyami kɛ maa ya neneene. Amen.

Nyagbe sɛ yemi

19 ⓜ I biɔ Priskila, Akuila, kɛ Onesiforo kɛ e we ɔ tsuo saminya.

20 ⓝ Erasto tlɔ Korinto, se Trofimo lɛɛ i si lɛ ngɛ Mileto, ejakaa e be he wami.

21 Bɔɔ mɔde nɛ o ba loko fĩɛ be ɔ nɛ su. Eubulo, Pude, Lino, kɛ Klaudia ke a biɔ mo. Nyɛmimɛ ɔmɛ tsuo ke mɛ hu a biɔ mo.

22 Wa Nyɔmtsɛ Yesu Kristo nɛ gbaa mo. Mawu dloomi ɔ kɛ nyɛ nɛ hi si!