Tesalonika Bi II, 3

Nyɛɛ sɔle ha wɔ

1 Nyagbe ɔ, nyɛmimɛ, nyɛɛ sɔle ha wɔ, konɛ Nyɔmtsɛ ɔ munyu ɔ nɛ ya nɔ nɛ e gbɛ fĩa, nɛ a he lɛ kɛ manye ngɛ he tsuaa he kaa bɔ nɛ nyɛ hu nyɛ pee ɔ.

2 Nyɛɛ sɔle, konɛ Mawu nɛ je wɔ kɛ je yiwutsotsɛmɛ, kɛ nimli yayamihi a dɛ mi; ejakaa pi nɔ tsuaa nɔ nɛ heɔ yeɔ.

3 Se Nyɔmtsɛ ɔ yeɔ anɔkuale. E maa wo nyɛ he wami, nɛ e maa bu nyɛ he, nɛ dikalɔ ɔ be nyɛe maa pee nyɛ nɔ́ ko.[1]

4 Nyɔmtsɛ ɔ ha wa he nyɛ ye saminya. Enɛ ɔ he je ɔ, wa ngɛ nɔ mi mami kaa nɔ́ nɛ wa de ke nyɛɛ pee ɔ, nyɛ ngɛ pee, nɛ nyɛ maa ya nɔ maa pee.

5 Nyɔmtsɛ ɔ nɛ ha nɛ nyɛɛ nu Mawu suɔmi ɔ, kɛ Kristo tsui si tomi ɔ sisi saminya.

E hia kaa a tsu ní

6 Nyɛmimɛ, wa ngɛ nyɛ fae ngɛ wa Nyɔmtsɛ Yesu biɛ mi ke nyɛɛ kɛ nihi nɛ tsu we ní, kɛ ni nɛmɛ nɛ bɛ a je mi saminya kaa bɔ nɛ wa tsɔɔ mɛ ɔ kó bɔ.

7 Nyɛ nitsɛmɛ nyɛ le veveeve kaa e hia kaa nyɛɛ kase wɔ. Benɛ waa kɛ nyɛ ngɛ ɔ, wa pee we hejɔ.

8 Wa yi nɔ ko ní yaka nɛ́ wa wui he hiɔ; mohu ɔ, wa tsu ní kɛ pɔtɔ. Wa tsu ní nyɔ kɛ pia, konɛ wa ko pee tlomi ha nyɛ ti nɔ ko.

9 Wa pee enɛ ɔ, pi kaa wa be jamɛ a blɔ nya a, se mohu, konɛ waa ngɔ wa he ngɔ pee nɔ hyɛmi nɔ́ ha nyɛ nɛ nyɛɛ kase wɔ.

10 Benɛ waa kɛ nyɛ ngɛ ɔ, wa wo nyɛ mlaa nɛ ɔ ke, “Ke nɔ ko sume kaa e ma tsu ní ɔ, e ko ye ní.”

11 Wa ngɛ enɛ ɔ dee, ejakaa wa nu kaa ni komɛ ngɛ nyɛ kpɛti nɛ peeɔ hejɔ; a tsu we ní, se mohu a ngɔɔ a nya ngɔ woɔ nihi a sanehi a mi.

12 Wa ngɛ kikɛmɛ a nimli nɛ ɔmɛ mlaa woe, nɛ wa ngɛ mɛ kɔkɔ bɔe ngɛ Nyɔmtsɛ Yesu Kristo biɛ mi kaa a ba a je mi saminya, nɛ a kɛ a nine nguɛ nyɔngma nɛ tsu ní nɛ a ye.

13 Nyɛmimɛ, nyɛ ko ha pɔ nɛ tɔ nyɛ kɛ nɔ́ kpakpa peemi.

14 Ke nɔ ko sume kaa e maa ye nɔ́ nɛ wa ngma nyɛ nɛ ɔ nɔ ɔ, nyɛ kadi lɛ, nɛ nyɛɛ kɛ lɛ ko bɔ. Kɛkɛ ɔ, zo maa gbe lɛ.

15 Nyɛ ko bu lɛ he nyɛlɔ, se mohu nyɛɛ tu munyu ngɔ tsɔɔ lɛ kaa nyɛmi.

Nyagbe munyuhi

16 Nyɔmtsɛ, nɔ nɛ haa wɔ he jɔmi ɔ, lɛ nitsɛ nɛ ha nyɛ he jɔmi daa ngɛ nɔ́ tsuaa nɔ́ nɛ nyɛ ngɛ pee mi. Nyɔmtsɛ ɔ kɛ nyɛ tsuo nɛ hi si.

17 Imi Paulo nitsɛ, ye nine nya womi ji nɛ ɔ nɛ. Womi tsuaa womi nɛ ma ngma a, bɔ nɛ i gbeɔ nya ji nɛ ɔ nɛ. Kikɛ nɛ ɔ i ngmaa womi. I biɔ nyɛ saminya.

18 Wa Nyɔmtsɛ Yesu Kristo dloomi ɔ kɛ nyɛ kulaa nɛ hi si.