Yoshua 4

Kaimi tɛhi

1 Benɛ ma a tsuo po Yordan pa a ta a, Yawɛ de Yoshua ke,

2 “Moo hla nyumuhi nyɔngma kɛ enyɔ kɛ je ma a mi; wɛtso tsuaa wɛtso mi ɔ, nɔ kake;

3 nɛ o ha nɛ a ya wo tɛ nyɔngma kɛ enyɔ kɛ je Yordan pa a mi, he nɛ osɔfo ɔmɛ da si ngɛ ɔ. Ha nɛ a tloo tɛ nɛ ɔmɛ kɛ ya ma si ngɛ he nɛ nyɛ maa to si ngɛ nyɔ nɛ ɔ mi.”

4 Kɛkɛ nɛ Yoshua tsɛ nyumuhi nyɔngma kɛ enyɔ ɔmɛ nɛ́ e hla kɛ je Israel wɛtso nyɔngma kɛ enyɔ ɔmɛ a mi ɔ,

5 nɛ e de mɛ ke, “Nyɛɛ be kɛ ya je Yawɛ, nyɛ Mawu ɔ somi daka a hɛ mi ngɛ Yordan ɔ kpɛti. Nyɛɛ da Israel wɛtso ɔmɛ a nya kakaaka, nɛ nyɛ wo tɛ kakaaka ngɔ fɔ nyɛ konɔ.

6 Tɛ nɛ ɔmɛ maa pee kaimi nɔ́ ha nyɛ. Ke nyɛ bimɛ bi nyɛ hwɔɔ se ko ke, ‘Mɛni tɛ nɛ ɔmɛ tsɔɔ ɔ,’

7 nyɛ de mɛ ke, ‘Benɛ a kɛ Yawɛ somi daka a po Yordan pa a, nyu ɔ se po.’ Tɛ nɛ ɔmɛ ma kai Israel ma a daa nɛ nɔ́ nɛ Mawu tsu ha mɛ ngɛ hiɛ ɔ.”

8 Kaa bɔ nɛ Yawɛ de Yoshua a, Israel bi ɔmɛ tloo tɛ nyɔngma kɛ enyɔ, wɛtso tsuaa wɛtso nɔ́ kake, kɛ je Yordan pa a mi kɛ ba he nɛ ma a to si ngɛ ɔ.

9 Jehanɛ, Yoshua hu kɛ tɛ nyɔngma kɛ enyɔ ɔmɛ ma si ngɛ Yordan pa a mi, he nɛ osɔfo ɔmɛ nɛ tloo somi daka a da si ngɛ ɔ. (Tɛ nɛ ɔmɛ ngɛ pa a mi ngɛ lejɛ ɔ kɛ mwɔɔ.)

10 Osɔfo ɔmɛ nɛ tloo somi daka a da si ngɛ Yordan pa a kpɛti kɛ ya si be nɛ a gbe nɔ́ tsuaa nɔ́ nya kaa bɔ nɛ Yawɛ fa Yoshua kɛ gu Mose nɔ ke e ha nɛ ma a nɛ a pee ɔ pɛpɛɛpɛ. Ma a po pa a mlamlaamla.

11 Benɛ a po pa a ta a, osɔfo ɔmɛ nɛ tloo somi daka a hu po, nɛ osɔfo ɔmɛ ya je ma a hɛ mi.

12 Kaa bɔ nɛ Mose de mɛ momo ɔ, nyumuhi nɛ ngɛ Ruben, Gad, kɛ Manase wɛtso fa a a mi ɔ, mia kɛ nyɛɛ Israel bi ɔmɛ a hɛ mi kɛ po pa a.

13 Nihi maa pee akpe nyingmi eywiɛ nɛ́ dla a he kɛ ha ta hwumi nyɛɛ Yawɛ hɛ mi kɛ ho Yeriko nga kplanaa a nɔ ya.

14 Jamɛ a ligbi ɔ, Yawɛ wo Yoshua hɛ mi nyami ngɛ Israel bi ɔmɛ tsuo kulaa a hɛ mi; nɛ a ye lɛ gbeye e wami ligbi ɔmɛ tsuo, kaa bɔ nɛ a ye Mose gbeye ɔ.

15 Pee se ɔ, Yawɛ de Yoshua ke,

16 “Fa osɔfo ɔmɛ nɛ tloo somi daka a ke a je Yordan pa a mi.”

17 Yoshua pee ja.

18 Benɛ osɔfo ɔmɛ nɛ tloo Yawɛ somi daka a je Yordan pa a mi, nɛ a nane ma zugba gbigbli nɔ pɛ, kɛkɛ nɛ Yordan nyu ɔ kpale kɛ ba e blɔ he, nɛ pa a hyi nɛ e ywia nga kaa sa a.

19 Kekleekle nyɔhiɔ ɔ we ligbi nɛ ji nyɔngma a nɔ ɔ, ma a po Yordan pa a, nɛ a ya to si ngɛ Gilgal, ngɛ Yeriko ma a beleku je.

20 Yoshua ngɔ tɛ nyɔngma kɛ enyɔ ɔmɛ nɛ a tloo kɛ je Yordan pa a mi ɔ ngɔ ma si ngɛ lejɛ ɔ.

21 Kɛkɛ nɛ e de Israel ma a ke, “Hwɔɔ se ko ke nyɛ bimɛ bi nyɛ ke kɛ ji tɛ nɛ ɔmɛ a sisi tsɔɔmi kɛɛ ɔ,

22 nyɛ de mɛ ke zugba gbigbli nɔ Israel nyɛɛ kɛ po Yordan pa a nɛ,

23 ejakaa Yawɛ, nyɛ Mawu ɔ, ha Yordan nyu ɔ mii kɛ ya su be nɛ nyɛ po pa a ta, kaa bɔ nɛ Yawɛ, nyɛ Mawu ɔ ha nɛ Wo Tsu ɔ hu mii kɛ ya su be nɛ nyɛ po ɔ.

24 Enɛ ɔ ma ha je ɔ tsuo maa na Yawɛ he wami ɔ, nɛ nyɛ maa ye Yawɛ, nyɛ Mawu ɔ gbeye daa.”