Yoshua 20

Wesa he mahi

1 ⓛ Enɛ ɔ se ɔ, Yawɛ de Yoshua ke

2 e de Israel bi ɔmɛ ke, “Nyɛɛ hla wesa he mahi nyɛɛ to kaa bɔ nɛ i fa Mose ke e de nyɛ ke nyɛɛ pee ɔ.

3 Ke nɔ ko nine ya kpa ngɛ nɔ ko nɔ, nɛ pi kaa e je blɔ nɛ e gbe nɔ ɔ, e tu fo kɛ ya sa we ngɛ lejɛ ɔ, bɔ nɛ pee nɛ lue yelɔ ɔ nine ko su e nɔ.

4 E tu fo kɛ ya ma nɛ ɔmɛ eko mi, nɛ e ya da si ngɛ ma a agbo ɔ nya, nɛ e jaje bɔ nɛ e ba lɛ ha ngɔ tsɔɔ ma nimeli ɔmɛ. Kɛkɛ ɔ, ma nimeli ɔmɛ kɛ lɛ maa ba ma a mi, nɛ a ma ha lɛ he ko nɛ e hi.

5 Ke lue yelɔ ɔ nyɛɛ e se kɛ ba lejɛ ɔ, ma mi bi ɔmɛ kó ngmɛɛ e he kɛ ha lɛ. A baa e yi, ejakaa pi abofu nya nɛ e gbe nɔ ɔ, se mohu e nine nɛ ya kpa ngɛ nɔ ɔ nɔ kɛkɛ.

6 É hi ma nɛ ɔ mi kɛ ya su be nɛ a maa kojo lɛ ngɛ ma hɛ mi; jehanɛ hu, kɛ ya su be nɛ osɔfo nɔkɔtɔma pe kulaa nɛ ngɛ jamɛ a be ɔ mi ɔ ma gbo. Lɔ ɔ se ɔ, nɔ ɔ ma nyɛ kpale kɛ ya lɛ nitsɛ e ma a mi, he nɛ e tu fo kɛ je ɔ.”

7 Lɔ ɔ he ɔ, ngɛ Yordan pa a bonyoku je ɔ, mahi nɛ a hla kaa wesa hehi ji nɛ ɔmɛ nɛ: Kedesh ngɛ Galilea, ngɛ Naftali yo ɔ nɔ; Shekem ngɛ Efraim yo ɔ nɔ, kɛ Kiriat Arba ngɛ Yuda yo ɔ nɔ. Kiriat Arba biɛ kpa ji Hebron.

8 Yordan pa a beleku je, ngɛ yo zugba kpataa a nɔ, ngɛ Yeriko beleku je ɔ, a hla ma nɛ ɔmɛ: Bezer, ngɛ Ruben zugba a mi, Ramot Gilead ngɛ Gad zugba a mi, kɛ Golan ngɛ Bashan, ngɛ Manase zugba a mi.

9 Wesa he mahi nɛ a hla kɛ ha Israel ma a tsuo, kɛ nibwɔhi nɛ ba to mɛ ɔ ji nɛ ɔmɛ nɛ. Ke e ba mi kaa nɔ ko nine ya kpa ngɛ nɔ ko nɔ ɔ, e ma nyɛ maa tu fo kɛ ya sa we ngɛ ma nɛ ɔmɛ eko mi kɛ he e yi wami kɛ je lue yelɔ ɔ dɛ mi. A be nɔ nɛ ya sa we nɛ ɔ gbee, ja a kojo lɛ ngɛ ma hɛ mi lolo.