Yoshua 17

Manase fa a

1 A ngɔ zugba a nɛ ngɛ Yordan pa a bonyoku je ɔ fa ko ngɔ ha we puɔ nya amɛ ekomɛ nɛ ji Yosef binyumu nɔkɔtɔma Manase nina. Akɛnɛ Gilead tsɛ Makir, Manase bitɛte ɔ, tatsɛ kpanaa ji lɛ he je ɔ, a ha lɛ Gilead kɛ Bashan ngɛ Yordan pa a beleku je.

2 Manase wɛtso ɔ nɛ piɛ ɔ, a ha mɛ a weto ní we puɔ nya we puɔ nya ngɛ Yordan bonyoku je. Yosef bi Manase binyumuhi ji nihi nɛ daa si ha Manase we puɔ nya nɛ ɔmɛ. Mɛ ji Abiezer, Helek, Asriel, Shekem, Hefer, kɛ Shemida.

3 Manase bi Makir bi ji Gilead, nɛ Gilead bi Hefer bi ji Zelofehad. Zelofehad nɛ ɔ be binyumu; biyihi pɛ e fɔ. A biɛhi ji Mala, Noa, Hogla, Milka, kɛ Tirza.

4 ⓗ Yi nɛ ɔmɛ ba osɔfo Eleazar, Nun bi Yoshua, kɛ ma nimeli ɔmɛ a ngɔ, ba de ke, “Yawɛ fa Mose ke e ha wɔ weto ní kaa bɔ nɛ a ha wa tsɛ nyɛminyumu ɔmɛ ɔ.” Lɔ ɔ he ɔ, kaa bɔ nɛ Yawɛ fa a, a ha mɛ weto ní kaa bɔ nɛ a ha a tsɛ nyɛminyumu ɔmɛ ɔ.

5 Enɛ ɔ he je nɛ Manase na ngwɔhe nyɔngma kɛ piɛ Gilead kɛ Bashan a he ngɛ Yordan pa a beleku je ɔ nɛ.

6 Ejakaa a ha mɛ zugba ngɛ a nyɛ se kɛ a tsɛ se tsuo. A ngɔ Gilead zugba a ngɔ ha Manase nina nɛ piɛ ɔ.

7 Manase huzu ɔ je Asher kɛ gu Mikmetat ngɛ Shekem beleku je. Huzu ɔ tsa nɔ kɛ gu leneyi je kɛ ya ná Entapua bi ɔmɛ.

8 Tapua zugba a peeɔ Manase nɔ́; se Tapua ma nɛ ngɛ Manase huzu ɔ nya a lɛɛ e peeɔ Efraim nina a a nɔ́.

9 Jehanɛ ɔ, huzu ɔ ma e yi si kɛ ya su Kana pa a nya. Mahi nɛ ngɛ pa a leneyi je ɔ, Manase zugba a nɔ a ngɛ lɛɛ, se Efraim níhi ji mɛ. Manase huzu ɔ nyɛɛ pa a omleyi je hluu kɛ ya su Mediterenia wo ɔ nya.

10 Efraim zugba a ya je leneyi je; nɛ Manase nɔ́ ɔ ngɛ omleyi je; Mediterenia wo ɔ ji a huzu ngɛ bonyoku je. A kɛ Asher wo huzu ngɛ omleyi je, nɛ a kɛ Isakar wo huzu ngɛ beleku je.

11 A ha Manase ma nɛ ɔmɛ hulɔ kaa a weto ní ngɛ Isakar bi ɔmɛ kɛ Asher bi ɔmɛ a zugba a mi. Mɛ ji Bet Shan, Ibleam, Dor, Endor, Taanak, Megido, kɛ kɔpehi nɛ bɔle mɛ ɔ.

12 ⓘ Manase bi ɔmɛ nyɛ we nɛ a fie ni ɔmɛ nɛ a ngɔ ma nɛ ɔmɛ; lɔ ɔ he ɔ, Kanaan bi ɔmɛ hi lejɛ ɔ.

13 Benɛ Israel bi ɔmɛ a he ba wa pe kekle ɔ po, a fie we Kanaan bi ɔmɛ tsuo, se mohu a nyɛ a nɔ nɛ a tsu ní ha mɛ.

Efraim kɛ Manase fa a bi zugba nɛ kle

14 Yosef nina a ba de Yoshua ke, “Mɛni he je nɛ o ha wɔ zugba a mi dlami kake pɛ kaa wa weto ní ɔ? O le kaa Yawɛ gbaa wɔ, nɛ wa he hiɛ babauu.”

15 Yoshua he nɔ ke, “Ke nyɛ he hiɛ babauu nɛ Efraim yo ɔ nɔ be nyɛ kpee ɔ, nyɛ ya gba hue ɔ ngɛ Periz bi ɔmɛ, kɛ Refaim bi ɔmɛ a zugba a nɔ, nɛ nyɛɛ hi lejɛ ɔ.”

16 A je nya ke, “Yo nɔ zugba a klee we ha wɔ. Jehanɛ hu, Kanaan bi ɔmɛ nɛ ngɛ nga kplanaa a nɔ ngɛ Bet Shan kɛ a he kɔpe ɔmɛ a mi, kɛ ni ɔmɛ nɛ ngɛ Yezreel kɔ̃ ɔ mi tsuo ngɛ dade ta zugba lɛhi.”

17 Yoshua de Yosef we ɔ nɛ ji Efraim kɛ Manase fa a ke, “Niinɛ, nyɛ he hiɛ, nɛ nyɛ he wa saminya; lɔ ɔ he ɔ, pi zugba a mi dlami kake pɛ nɛ nyɛ ma na.

18 Yo nɔ zugba a maa pee nyɛ nɔ́. Akɛnɛ hue ngɛ lejɛ ɔ he je ɔ, nyɛɛ gba hue ɔ, nɛ nyɛɛ ngɔ, kɛ zugba nɛ tsa nɔ kɛ yaa a tsuo. E ngɛ mi kaa Kanaan bi ɔmɛ ngɛ dade ta zugba lɛhi nɛ a he wa mohu, se nyɛ maa fie mɛ kɛ̃.”