Yoshua 16

Zugba nɛ a ha Efraim kɛ Manase fa a

1 Zugba nɛ a ha Yosef nina a, e huzu ɔ je Yordan pa a nya ngɛ Yeriko hanɔ, kɛ Yeriko pa a beleku je, kɛ ya gu nga kplanaa a nɔ, kɛ kuɔ yo ɔ kɛ be Yeriko he, kɛ ya su Betel tɔɔ.

2 E tsa nɔ kɛ ya gu Luz; nɛ e po mi kɛ ho Atarot Adar, he nɛ Ark bi ɔmɛ hi ɔ ya.

3 Huzu ɔ ma e yi si kɛ gu bonyoku je kɛ ya na Yaflet bi ɔmɛ a huzu ɔ, nɛ e tsa nɔ kɛ ya su Bet Horon sisi ɔ tɔɔ; e ya su Gezer hulɔ, nɛ e nya ya pi Mediterenia wo ɔ.

4 Zugba nɛ Yosef nina, nɛ ji Manase fa a, kɛ Efraim na kaa a weto ní ji nɛ ɔ nɛ.

Efraim

5 Bɔ nɛ a dla zugba a ngɔ ha Efraim bi ɔmɛ we puɔ nya we puɔ nya ji nɛ ɔ nɛ. Ngɛ beleku je ɔ, a zugba a huzu ɔ je Atarot Adar kɛ ya su Bet Horon ngɛ yiti je ɔ tɔɔ.

6 Jehanɛ, huzu ɔ ya pi Mediterenia wo ɔ. Mikmetat ya je omleyi je. Kɛ je lejɛ ɔ ngɛ beleku je ɔ, huzu ɔ bɔle si kɛ ya gu Tanat Shilo, kɛ ya su Yanoa beleku je.

7 Kɛ je Yanoa a, huzu ɔ ya gu Atarot, Naara, kɛ Yeriko, nɛ e kɛ e nya ya pi Yordan pa a.

8 Jehanɛ huzu ɔ je Tapua, kɛ gu bonyoku je kɛ ya na Kana pa a, nɛ e ya gbe nya ngɛ Mediterenia wo ɔ nya. Zugba nɛ a ha Efraim wɛtso ɔ kaa a weto ní nɛ a dla ngɔ ha mɛ we puɔ nya we puɔ nya ji nɛ ɔ nɛ.

9 Lɔ ɔ se hu, a ha Efraim bi ɔmɛ ma komɛ kɛ a he kɔpehi ngɛ Manase bi ɔmɛ a huzu ɔ mi.

10 ⓖ Efraim bi ɔmɛ fie we Kanaan bi ɔmɛ kɛ ji Gezer; lɔ ɔ he ɔ, Kanaan bi ɔmɛ ngɛ Efraim bi ɔmɛ a kpɛti kɛ ba si mwɔnɛ ɔ; se a plɛ pee Efraim bi ɔmɛ a nyɔguɛhi, nɛ a sɔmɔɔ mɛ.