Introduction
Filipi Bi
NYA TSƆƆMI Asafohi nɛ Paulo to sisi ngɛ Roma nɔ yemi he nɛ ngɛ Yuropa a, Filipi asafo ɔ nɛ ngɛ Makedonia kpokpa a nɔ ji kekleekle nɔ́. Paulo ngma Filipi asafo ɔ womi nɛ ɔ benɛ a wo lɛ tsu. Jamɛ a be ɔ mi ɔ, ni kpahi nɛ mɛ hu a ngɛ ní tsue kaa Kristo se nyɛɛli ɔ te si wo lɛ, nɛ e hao wawɛɛ. Jehanɛ ɔ, lakpa tsɔɔmi nɛ ngɛ nɔ yae ngɛ Filipi asafo ɔ mi ɔ hu hao lɛ wawɛɛ. Se kɛ̃ ɔ, bua jɔmi, kɛ hɛ kɛ nɔ fɔmi nɛ jeɔ kpo ngɛ womi ɔ mi ɔ, tsɔɔ kaa hemi kɛ yemi nɛ Paulo ngɛ ngɛ Yesu Kristo mi ɔ mi wa wawɛɛ nitsɛ. Kristo we bi nɛ ngɛ Filipi ɔ ngɔ nike ní kɛ mane Paulo be ko nɛ e fi lɛ wawɛɛ ɔ, nɛ e suɔ kaa e maa na mɛ si. Enɛ ɔ he titli nɛ e ngma womi nɛ ɔ nɛ. He blɔ nɛ e na kɛ ngɛ womi nɛ ɔ ngmae ɔ, e suɔ kaa e maa gu nɔ kɛ wo mɛ he wami hulɔ. E de mɛ ke a pee kã, nɛ a ngɔ a hɛ kɛ fɔ Mawu nɔ, pohu e kɛ mɛ tsuo ngɛ nɔ́ nae. E kpa mɛ pɛɛ ke a pee a he humi kaa bɔ nɛ Yesu pee ɔ; a hɛ kó tsu kɛ di mɛ nitsɛmɛ pɛ a hiamihi a se; nɛ a ko wo a he. E de mɛ ke a kai kaa e ji dloomi ha mɛ kaa Mawu ha nɛ a kɛ Kristo ba pee kake ngɛ a wami be mi kɛ gu hemi kɛ yemi nɔ; se tsa pi kaa Yuda bi a mlaa a nɛ kɔɔ kusumihi a he ɔ nɔ nɛ a ye ɔ he je. Bua jɔmi, kɛ he jɔmi nɛ Mawu haa nihi nɛ ngɛ Kristo mi ɔ, Paulo ngma lɔ ɔmɛ hu a he sane ngɛ womi nɛ ɔ mi. Ní pɔtɛɛ komɛ nɛ a naa ngɛ Kristo se nyɛɛli a hemi kɛ yemi, kɛ a wami si himi mi nɛ Paulo ma nɔ mi ji bua jɔmi, hɛ kɛ nɔ fɔmi, kake peemi, kɛ hɛ mi miami. Womi ɔ ha nɛ wa naa paa kaa Paulo suɔ Filipi asafo ɔ wawɛɛ nitsɛ. Bɔ nɛ a dla womi ɔ mi ha • Sisije 1.1-11
• Sanehi nɛ ba Paulo nɔ 1.12-26
• Je mi bami nɛ sa Kristo se nyɛɛlɔ 1.27—2.18
• Timoteo kɛ Epafrodito a blɔ hiami he blɔ nya tomi 2.19-30
• Ga womi nɛ kɔɔ he nyɛli, kɛ amanehlu he 3.1—4.9
• Paulo kɛ e huɛmɛ ɔmɛ nɛ ngɛ Filipi ɔ 4.10-20
• Nyagbe 4.21-23
• Sanehi nɛ ba Paulo nɔ 1.12-26
• Je mi bami nɛ sa Kristo se nyɛɛlɔ 1.27—2.18
• Timoteo kɛ Epafrodito a blɔ hiami he blɔ nya tomi 2.19-30
• Ga womi nɛ kɔɔ he nyɛli, kɛ amanehlu he 3.1—4.9
• Paulo kɛ e huɛmɛ ɔmɛ nɛ ngɛ Filipi ɔ 4.10-20
• Nyagbe 4.21-23