Filipi Bi 1

1 ⓐ Imi Paulo kɛ Timoteo, Kristo Yesu sɔmɔli ɔ, ngma womi nɛ ɔ mane Kristo Yesu ni klɔuklɔu ɔmɛ, asafo nya dali ɔmɛ, kɛ sɔmɔli ɔmɛ tsuo nɛ ngɛ Filipi ɔ.

2 Dloomi kɛ he jɔmi nɛ je wa Tsɛ Mawu ɔ, kɛ Nyɔmtsɛ Yesu Kristo dɛ mi ɔ ha nyɛ!

Paulo kpa pɛɛ kɛ ha nihi nɛ maa kane e womi ɔ

3 Be tsuaa be nɛ ye juɛmi maa ba nyɛ nɔ ɔ, i naa Mawu si ha nyɛ.

4 Daa nɛ ɔ, i kɛ bua jɔmi faa kue ha Mawu ngɛ nyɛ tsuo nyɛ he;

5 ejakaa nyɛ sa sina kaa nyɛ piɛ ye he wawɛɛ ngɛ sane kpakpa a fiɛmi mi kɛ je sisije kɛ ba si amlɔ nɛ ɔ.

6 I heɔ yeɔ kaa Mawu, nɔ nɛ kɛ nyɛ je ní tsumi kpakpa nɛ ɔ sisi ɔ maa piɛ nyɛ he kɛ yaa si nyɛ maa gbe nya ligbi ɔ nɛ Yesu Kristo maa ba a.

7 I suɔ nyɛ saminya, nɛ e sa kaa ma susu nyɛ he wawɛɛ kikɛ nɛ ɔ. Ejakaa Mawu dloomi ɔ nɛ i kɛ ngɛ sane kpakpa a fiɛe kɛ hɛdɔ, kɛ je sisije nɛ i ngɛ ye nane nɔ kɛ bee, kɛ ba si amlɔ nɛ ɔ nɛ a wo mi tsu ɔ, i kɛ nyɛ tsuo nɛ wa ná kikɛmɛ a dloomi ɔ, nɛ wa ngɛ he ní tsue.

8 Bɔ nɛ Kristo Yesu mi mi sãã lɛ ngɛ wa he ɔ, jã ye hɛ ngɛ jae wawɛɛ ngɛ nyɛ he; Mawu ji ye odase kaa i yi lakpa.

9 I ngɛ Mawu pɛɛ kpae kaa suɔmi nɛ nyɛ ngɛ kɛ ha nyɛ sibi ɔ mi nɛ wa, nɛ nyɛ ná nile nɛ ma ha nyɛ nɔ́ se kɔmi mumi,

10 konɛ nyɛɛ le kpakpa mi tso. Kɛkɛ ɔ, mu ko mu ko, kɛ piami ko piami ko be nyɛ he sae kɛ yaa su ligbi ɔ nɛ Kristo maa ba.

11 Kristo Yesu nitsɛ ma ha nyɛ ma na subai nɛ hi saminya ngɛ nyɛ wami si himi mi, konɛ a wo Mawu hɛ mi nyami, nɛ a je e yi.

Kristo lɛ haa nɔ wami

12 Ye nyɛmimɛ, i suɔ kaa nyɛɛ le kaa sanehi nɛ ba ye nɔ ɔ mohu ha nɛ sane kpakpa a ya su nihi babauu.

13 ⓑ Enɛ ɔ he je ɔ, mɔ mi buli ɔmɛ, kɛ ni kpa amɛ tsuo ba na le kaa Kristo nɛ i ngɛ sɔmɔe ɔ he nɛ a wo mi tsu ngɛ.

14 Tsu nɛ a wo mi ɔ, ha nɛ nyɛmimɛ ɔmɛ a ti nihi babauu ba ngɔ a hɛ kɛ fɔ Nyɔmtsɛ ɔ nɔ wawɛɛ, nɛ a kɛ kã ngɛ Mawu sɛ gbi ɔ fiɛe nɛ a yi gbeye.

15 Niinɛ, sane kpakpa a nɛ a ngɛ fiɛe ɔ, a ti ni komɛ a hɛ kɔɔ ye nɔ, nɛ a jeɔ mi hunga, se ni komɛ hu kɛ juɛmi kpakpa fiɛɔ.

16 Kuu enyɔne ɔ kɛ suɔmi fiɛɔ, ejakaa a le kaa ní tsumi nɛ Mawu ngɔ ha mi ji kaa ma fa sane kpakpa a he.

17 Ni kpa amɛ fiɛ we sɛ gbi ɔ anɔkuale mi. Ke a ngɛ fiɛe ɔ, a woɔ pɛ; a susuu kaa ke a pee ja kɛkɛ a ngɛ mi yi mi wae kɛ piɛ tsu nɛ a wo mi ɔ he.

18 Ja he ɔ mɛni? E haa mi bua jɔmi mohu kaa lakpa tomi nya jio, anɔkuale mi jio, bɔ tsuaa bɔ nɛ pee ɔ, Kristo nɛ a ngɛ fiɛe. Lɔ ɔ he ɔ, i na bua jɔmi. Ee, ye bua maa jɔ,

19 ejakaa i le kaa Mawu pɛɛ nɛ nyɛ ngɛ kpae, kɛ he wami nɛ Yesu Kristo mumi ɔ haa a, ma kpɔ mi.

20 Nɔ́ nɛ i ngɔ hɛ kɛ fɔ nɔ, nɛ i ngɛ blɔ hyɛe wawɛɛ ji kaa zo be mi gbee; se mohu be tsuaa be ɔ, ma pee kã saminya, konɛ wami mi jio, gbenɔ mi jio, titli ɔ, amlɔ nɛ ɔ, ma ngɔ ye nɔmlɔ tso ɔ kɛ wo Kristo hɛ mi nyami.

21 Ejakaa imi lɛɛ Kristo ji ye wami, nɛ gbenɔ ɔ, ye se nami.

22 Se ke e ba mi kaa ke i ngɛ wami mi nɛ ma nyɛ ma tsu ní pe kikɛ nɛ ɔ, lɛɛ i li e mi nɔ́ nɛ ma hla.

23 Nɔ́ enyɔ nɛ ɔmɛ a kpɛti i ngɛ. Imi nitsɛ lɛɛ i suɔ kaa ma si wami nɛ ɔ, nɛ i kɛ Kristo ya hi si, ejakaa lɔ ɔ hi kulaa pe.

24 Se nyɛ he ɔ, e hia kaa ma hi je mi mohu.

25 I heɔ enɛ ɔ yeɔ, lɔ ɔ he ɔ, i le kaa i kɛ nyɛ tsuo maa hi si, konɛ ma piɛ nyɛ he, nɛ nyɛ hemi kɛ yemi mi nɛ wa, nɛ nyɛ na bua jɔmi.

26 Kɛkɛ ɔ, ke wa ba bua ekohu ɔ, nyɛ ma na he blɔ hluu tsɔ kɛ fĩa kaa i ha nɛ nyɛ ba le Kristo Yesu.

27 Lɔ ɔ he ɔ, nɔ́ nɛ hia pe kulaa ji, nyɛɛ ba nyɛ je mi kaa bɔ nɛ sane kpakpa a nɛ kɔɔ Kristo he ɔ tsɔɔ ɔ, konɛ i nyɛ ba na nyɛ jio, i bɛ́ jio, ma nu nyɛ he kaa nyɛ tsuo nyɛɛ kɛ juɛmi kake hɛɛ hemi kɛ yemi ɔ mi kpɛii kɛ ngɛ sane kpakpa a he plee.

28 Nyɛ ko ha nɛ nihi nɛ teɔ si woɔ nyɛ ɔ a ní peepee nɛ wo nyɛ he gbeye. Nyɛɛ pee kã be tsuaa be. Lɔ ɔ ma ha nɛ a maa na paa kaa a hɛ mi ma kpata, se nyɛɛ lɛɛ a ma he nyɛ yi wami. Ejakaa enɛ ɔ lɛɛ Mawu dɛ mi e je.

29 Blɔ nya nɛ a ha nyɛ kaa Kristo we bi ɔ, nyɛɛ lɛɛ pi kaa nyɛ ma he ye kɛkɛ, se mohu kaa e he ɔ, nyɛ maa na amanehlu hulɔ.

30 ⓒ Lɔ ɔ he ɔ, nyɛ maa piɛ ye he kɛ hwu ta a. Ta nɛ ɔ nɔuu lɛ sa a nyɛ na kaa i ngɛ hwue; nɛ amlɔ nɛ ɔ hu, kaa bɔ nɛ nyɛ nu ɔ, i ngɛ nɔ kɛ mwɔɔ.