Efeso Bi 6

Fɔli kɛ a bimɛ

1 ⓨ Bimɛ, nyɛɛ bu nyɛ fɔli tue kaa nihi nɛ ngɛ Nyɔmtsɛ ɔ sɔmɔe, ejakaa nɔ́ nɛ sa nyɛ peemi ji nɛ ɔ nɛ.

2 ⓩ Mawu mlaa nyɔngma amɛ ɔ, kekleekle nɔ́ nɛ siwo piɛ he ji, “Bu o tsɛ kɛ o nyɛ,

3 konɛ e hi ha mo, nɛ o se nɛ kɛ ngɛ je mi.”

4 ⓐ Fɔli, nyɛ ko wo nyɛ bimɛ ɔmɛ a mi mi la; se mohu nyɛ tsɔse mɛ, nɛ nyɛɛ wo mɛ ga kpakpa nɛ maa sa Kristo hɛ mi.

Nyɔmtsɛmɛ kɛ a nyɔguɛhi

5 ⓑ Nyɛ nyɔguɛhi, nyɛɛ bu nyɛ je nɛ ɔ mi nyɔmtsɛmɛ ɔmɛ kɛ gbeye yemi kɛ he domi, nɛ nyɛ sɔmɔ mɛ kɛ nyɛ tsui tsuo kaa bɔ nɛ nyɛ peeɔ ha Kristo ɔ;

6 pi kɛ hɛ mi sɔmɔmi nɛ ma ha nyɛ nyɔmtsɛmɛ ɔmɛ maa suɔ nyɛ sane. Se mohu nyɛɛ je nyɛ tsui mi tɔɔ nɛ nyɛɛ pee nɔ́ nɛ Mawu suɔ, ejakaa Kristo nyɔguɛhi ji nyɛ.

7 Nyɛ tsu ní kɛ bua jɔmi kaa nɔ́ nɛ Nyɔmtsɛ ɔ nyɛ ngɛ sɔmɔe, se pi adesa.

8 Nyɛ kai kaa ke mo nɔ ko o pee kpakpa a, nyɔguɛ ji mo jio, odehe ji mo jio Nyɔmtsɛ ɔ maa to mo nane mi ja nɔuu ekohu.

9 ⓒ Nyɔmtsɛmɛ, nyɛɛ kɛ nyɛ nyɔguɛ ɔmɛ nɛ hi si ja nɔuu kɛ̃ nɛ nyɛɛ jɔɔ a susuma he gbeye womi. Nyɛ kai kaa nyɛɛ kɛ nyɛ nyɔguɛ ɔmɛ tsuo ɔ, Nyɔmtsɛ kake lɛ nyɛ ngɛ ngɛ hiɔwe, nɛ e hyɛ we nɔ hɛ mi.

Kristo se nyɛɛli nɛ mia, nɛ a kɛ mumi yayamihi nɛ hwu ta

10 Nyagbe ɔ, nyɛ ha nɛ Nyɔmtsɛ ɔ he wami kpetekpleenyɛ ɔ nɛ ngɛ nyɛ mi ɔ nɛ waje nyɛ.

11 Nyɛ kpla tahwu ní ɔmɛ tsuo nɛ Mawu ha nyɛ ɔ, konɛ nyɛ nyɛ Abosiami ga tsɔmi ɔmɛ a nya nɛ nyɛɛ da.

12 Ejakaa pi he lo kɛ muɔ nɛ waa kɛ ngɛ ta hwue ɔ. He nyɛli nɛ waa kɛ mɛ ngɛ ta hwue ɔ ji nɔ yeli, kɛ nihi nɛ hɛɛ blɔ nyahi, mumi yayami kpetekpleenyɛhi nɛ ngɛ je nɛ ɔ mi diblii ɔ mi, kɛ mumihi nɛ ngɛ kɔɔhiɔ mi nɛ peeɔ yi wu tso níhi.

13 Lɔ ɔ he ɔ, nyɛ kpla ta hwumi níhi tsuo nɛ Mawu ha nyɛ ɔ. Kɛkɛ ɔ, ke ligbi yobu ɔ ba a, nyɛ ma nyɛ maa da nya, nɛ́ ke nyɛɛ kɛ lɛ to ní gbe nya a, nyɛ nyɛ nyɛɛ da si kpɛii.

14 ⓓ Lɔ ɔ he ɔ, nyɛɛ da si nɛ nyɛ ha anɔkuale nɛ miaa nyɛ kaa mlɛ mi fimi nɔ́, nɛ dami sane yemi nɛ pee kaa dama ngɛ nyɛ gugue mi.

15 ⓔ Nɔ́ tsuaa nɔ́ nɛ ma ha nɛ nyɛɛ pee klaalo kɛ fiɛ he jɔmi sane kpakpa a, nyɛ kɛ pee tokota nɛ nyɛɛ wo.

16 Enɛ ɔmɛ tsuo se ɔ, nyɛɛ hɛɛ hemi kɛ yemi ngɛ nyɛ dɛ kaa tsɛi nɛ nyɛ ma nyɛ kɛ gbe nɔ yayami ɔ kɛ̃ɛ̃ mi bihi kɛ a he la a tsuo.

17 ⓕ Yi wami hemi nɛ pee dade pɛɛ nɛ nyɛ bu. Nyɛɛ pɛtɛ Mawu munyu ɔ nɛ ji mumi ɔ klaate ɔ he.

18 Nyɛɛ sɔle kɛ kpa Mawu pɛɛ kaa bɔ nɛ mumi ɔ maa tsɔɔ nyɛ. Enɛ ɔ he ɔ, nyɛɛ bu mumi ɔ tue, konɛ nyɛ mia nyɛ hɛ mi kɛ kpa pɛɛ ha ni klɔuklɔu ɔmɛ daa.

19 Nyɛɛ sɔle ha imi hulɔ, konɛ be tsuaa be nɛ ma tu munyu ɔ, Mawu nɛ ha mi e sɛ gbi, nɛ e ha mi kã nɛ ma kɛ fiɛ sane kpakpa a mi laami sane ɔ.

20 Sane kpakpa nɛ ɔ he nɛ, i ba pee Yesu Kristo bɔfo, pohu amlɔ nɛ ɔ, a wo mi kɔsɔkɔsɔ. Nyɛ kpa pɛɛ konɛ ma fiɛ kɛ kã kaa bɔ nɛ sa nɛ ma tu munyu ɔ.

Nyagbe sɛ yemi

21 ⓖ Wa nyɛmi Tihiko nɛ wa suɔ lɛ saminya, nɛ e yeɔ Nyɔmtsɛ ɔ anɔkuale ngɛ ní nɛ e ngɛ tsue ha lɛ ɔ mi ɔ ma ba bɔ nyɛ níhi tsuo nɛ kɔɔ ye he, konɛ nyɛɛ le bɔ nɛ i ngɛ, kɛ bɔ nɛ níhi ngɛ yae ha. ⓗ

22 I je blɔ ngɛ lɛ nyɛ ngɔ tsɔe, konɛ nyɛɛ nu wa he bɔ nɛ wa ngɛ, konɛ nyɛ hu e wo nyɛ bua.

23 Nihi tsuo nɛ heɔ Kristo yeɔ ɔ, Tsɛ Mawu, kɛ wa Nyɔmtsɛ Yesu Kristo nɛ ha nɛ a hi si ngɛ he jɔmi mi; a suɔ a sibi, nɛ a pɛtɛ hemi kɛ yemi ɔ he.

24 Nihi tsuo nɛ suɔ wa Nyɔmtsɛ Yesu Kristo kɛ suɔmi nɛ be nyagbe ɔ, Mawu dloomi ɔ kɛ mɛ nɛ hi si.