Galatia Bi 6

Nyɛɛ ye bua nyɛ sibi ngɛ fimi mi

1 Ye nyɛmimɛ, ke nyɛ ti nɔ ko tɔ ɔ, nyɛ ni nɛmɛ nɛ Mawu mumi ɔ ngɛ nyɛ mi ɔ, nyɛɛ bɔ mɔde nɛ nyɛɛ ngɔ lɛ kɛ ba blɔ dadɛ nɔ. Nyɛɛ to nyɛ tsui si blɛuu kɛ pee nɔ́ nɛ ɔ. Nyɛɛ hyɛ saminya, konɛ nyɛ nitsɛmɛ hu nyɛ ko ya sɛ jamɛ a ka a eko mi.

2 Nyɛɛ kpee nyɛ sibi kɛ tloo nyɛ tlomi ɔmɛ kaa bɔ nɛ Kristo mlaa a tsɔɔ kaa nyɛɛ pee ɔ.

3 Ke e peeɔ nɔ ko kaa nɔ ko ji lɛ, se pohu pi nɔ ko kulaa ji lɛ ɔ, lɛ nitsɛ e he nɛ e ngɛ sisie.

4 Nɔ tsuaa nɔ nɛ hyɛ lɛ nitsɛ e ní peepee. Ke e hi ɔ, e ma nyɛ maa fĩa ngɔ fɔ nɔ, nɛ e be hiae kaa e maa ngɔ e he ngɔ to nɔ kpa he;

5 ejakaa nɔ tsuaa nɔ maa tloo lɛ nitsɛ e tlomi.

6 Nɔ nɛ a ngɛ lɛ ní tsɔɔe ɔ, kɛ e tsɔɔlɔ ɔ nɛ dla ní kpakpahi nɛ e ngɛ ɔ.

7 Nyɛ ko sisi nyɛ he. Mawu ɔ, a yi e he fɛu. Nɔ́ nɛ nɔmlɔ du ɔ, lɔ ɔ nɔuu e ma kpa.

8 Ke nɔ ko ya tsu ní ngɛ he lo mi ɔ, e ma kpa nɔ́ nɛ puɛɔ nɛ ma kpata e hɛ mi. Jã kɛ̃ ke nɔ ko tsu ní ngɛ Mawu mumi ɔ nya, Mawu mumi ɔ ma ha e na neneene wami.

9 Lɔ ɔ he ɔ, wa ko ha nɛ kpakpa peemi nɛ gbe wa nya; ejakaa ke wa kɔni mi wui nyu ɔ, ní kpami be ɔ, wa ma na he se.

10 Lɛɛ ke e maa hi ɔ, waa pee nihi tsuo kpakpa daa, titli ɔ, nihi nɛ waa kɛ mɛ hɛɛ hemi kɛ yemi kake ɔ.

Nyagbe kɔkɔ bɔmi kɛ sɛ yemi

11 Nyɛɛ hyɛ bɔ nɛ i kɛ imi nitsɛ ye nine ngma ní agboagbo kɛ mane nyɛ!

12 Nihi nɛ hlaa kaa a maa nyɛ nyɛ nɔ kaa ja a po nyɛ doo ɔ, nihi a hɛ mi kɛkɛ lɛ a ngɛ hlae nɛ a sa. Ejakaa a le kaa ke a de ke loko a ma he nɔ ko yi wami ɔ, ja nɔ ɔ na amanehlu kaa Kristo ɔ, nihi maa wa mɛ yi mi.

13 Nihi nɛ a kusumi ji kaa a po mɛ ɔ, mɛ nitsɛmɛ po a yi mlaa a nɔ. A ngɛ hlae kɛkɛ nɛ a fĩa kaa mɛ lɛ a pee lɛ nyɛ kplɛɛ nɛ a po nyɛ.

14 Se imi lɛɛ i be fĩae ngɔ fɔ nɔ́ kpa ko nɔ́ kpa ko nɔ kaa ja wa Nyɔmtsɛ Yesu Kristo sɛumi tso ɔ pɛ. Gbenɔ nɛ Kristo gbo ngɛ sɛumi tso ɔ nɔ ɔ ngɛ kaa nɔ́ nɛ pe a sɛu je ɔ kɛ ha mi, nɛ a sɛu imi hu kɛ ha je ɔ.

15 A po nɔ ko jio, a pui nɔ ko jio, e he hia we kulaa. Nɔ́ nɛ he hia kɛkɛ ji kaa nɔ ko ma tsake kɛ pee bɔ nɔ he.

16 Nihi tsuo nɛ maa ba a je mi kaa kikɛ nɛ ɔ, Mawu nɛ na mɛ mɔbɔ, nɛ e ha mɛ he jɔmi. Ee, Mawu nɛ pee enɛ ɔ ha mɛ kɛ lɛ nitsɛ e ma, Israel ɔ tsuo.

17 Kɛ je mwɔnɛ ɔ kɛ yaa a, nɔ ko kó doo ye nya hu. Yesu nɔ́ nami okadihi ngɛ ye nɔmlɔ tso ɔ he.

18 Ye nyɛmimɛ, wa Nyɔmtsɛ Yesu Kristo dloomi ɔ kɛ nyɛ tsuo nɛ hi si. Amen.