Introduction
Efeso Bi
NYA TSƆƆMI Womi nɛ Paulo ngma ya ha Efeso asafo ɔ, kekleekle nɔ́ he nɛ e kɔɔ ji, “Yi mi nɛ Mawu to kaa e ma ha nɛ bɔ níhi tsuo maa pee kake, níhi nɛ ngɛ hiɔwe kɛ ní nɛmɛ nɛ ngɛ zugba a nɔ; nɛ Kristo maa ye matsɛ ngɛ mɛ tsuo a nɔ” ɔ (1.10). Jehanɛ ɔ hu, kɛ gu womi nɛ ɔ nɔ ɔ, Paulo ngɛ ni klɔuklɔu ɔmɛ tsuo pɛɛ kpae, konɛ a ngɔ a he ngɔ mɛtɛ Kristo he, nɛ a ba a je mi saminya. Ke a pee ja a, yi mi nguaa nɛ Mawu to kaa e ma ha nɛ adesahi tsuo maa pee kake ɔ maa je kpo paa nɛ nihi maa na. Paulo tsɔɔ kake peemi nɛ ɔ nya saminya ngɛ womi nɛ ɔ kekleekle fa a mi. E tsɔɔ kaa nɛ Tsɛ Mawu hla e ma a, e ngɔ a he yayami ngɔ pa mɛ, nɛ kɛ gu e Bi Yesu Kristo nɔ ɔ, e ha a ye a he. Mawu ha nɛ e Mumi Klɔuklɔu ɔ ba, nɛ e kɛ to okadi kaa si ko nɛ lɛ Mawu ɔ wo ɔ, ja e ba mi. Ngɛ womi ɔ fa enyɔne ɔ mi ɔ, Paulo ngɛ asafo mi bi ɔmɛ ga woe kaa a ba a je mi saminya, konɛ nihi nɛ na niinɛ kaa kake peemi ngɛ a kɛ Kristo a kpɛti. Kake peemi nɛ ngɛ ni klɔuklɔu ɔmɛ a kpɛti, kɛ gu a kɛ Kristo a kake peemi mi ɔ, Pualo tsɔɔ nya ngɛ blɔ slɔɔtohi a nɔ. E ke asafo ɔ ngɛ kaa nɔmlɔ tso, nɛ e yi ji Kristo. Enyɔne ji, asafo ɔ ngɛ kaa tsu, nɛ e kɔ nya tɛ ji Kristo. Nyagbe ɔ, Paulo de ke asafo ɔ ngɛ kaa yogbayo, nɛ e huno ji Kristo. Mawu gu Kristo nɔ kɛ dloo wɔ babauu. Enɛ ɔ he susumi ha nɛ Paulo kɛ hɛdɔ ngma womi nɛ ɔ nɛ ke o kane ɔ, ja o he mi po. Ke wa le suɔmi agbo nɛ Kristo ngɛ kɛ ha wɔ ɔ, womi nɛ ɔ sisi numi be wae ha wɔ. Kristo ngɔ e he ngɔ sã bɔ, e kɛ wa he yayami pa wɔ, e dloo wɔ, nɛ e he tsɔ. Bɔ nɛ a dla womi ɔ mi ha • Sisije 1.1-2
• Kristo kɛ asafo ɔ 1.3—3.21
• Wami he nɛ wa naa ngɛ waa kɛ Kristo wa kake peemi mi 4.1—6.20
• Nyagbe 6.21-24
• Kristo kɛ asafo ɔ 1.3—3.21
• Wami he nɛ wa naa ngɛ waa kɛ Kristo wa kake peemi mi 4.1—6.20
• Nyagbe 6.21-24