Korinto Bi II, 4

Adesa gbɔjɔmi kɛ Mawu he wami

1 Akɛnɛ Mawu naa mɔbɔ he je ɔ, e ha wɔ ní tsumi nɛ ɔ ke wa tsu. Lɔ ɔ he ɔ, wa kɔni mi jɔ̃ we.

2 Wa kpa laami mi zo ní tsumi; wa yi kutupɔ, nɛ Mawu munyu ɔ hu wa tsakee we hɛ mi. Wa fiɛɔ Mawu sɛ gbi ɔ paa ngɛ ma hɛ mi, nɛ wa bɔɔ mɔde kaa nihi nɛ a ná wa he juɛmi kpakpa ngɛ Mawu hɛ mi.

3 Niinɛ, sane kpakpa a nɛ wa ngɛ fiɛe ɔ, ni komɛ nui sisi; mɛ ji nihi nɛ a hɛ mi ngɛ kpatae ɔ nɛ.

4 A he we sane kpakpa a yi, ejakaa je nɛ ɔ mi mawu ɔ yu a mumi mi hɛngmɛ; nɛ la nɛ ngɛ kpɛe ngɛ a nɔ ɔ, a nɛ. Sane kpakpa a nɛ woɔ Kristo hɛ mi nyami ɔ, la nɛ ɔ nɛ ngɛ lɛ gbɛe kɛ ngɛ fĩae. Kristo ɔ, e kɛ Mawu hɛɛ su kake.

5 Ejakaa wa de we nɔ́ ko nɔ́ ko ngɛ wɔ nitsɛmɛ wa he; se mohu wa ngɛ fiɛe ke Yesu Kristo ji Nyɔmtsɛ. Wɔɔ lɛɛ Yesu he ɔ, nyɛ tsɔli ji wɔ.

6 ⓚ Mawu lɛ de ke, “La nɛ tso kɛ je diblii mi.” Lɛ Mawu ɔ nɔuu lɛ haa la kpɛɔ ngɛ wa tsui mi. Nɛ la nɛ ɔ haa wa leɔ Mawu hɛ mi nyami nɛ kpɛɔ ngɛ Kristo hɛ mi ɔ.

7 Wɔ nɛ wa ná kikɛmɛ a mumi mi juetli nɛ ɔ, wa ngɛ kaa zu buɛhi. Enɛ ɔ tsɔɔ kaa he wami kpetekpleenyɛ nɛ ɔ, Mawu ngɔ nɛ e je, pi wɔɔ wa ngɔ.

8 Nihi haoɔ wɔ be tsuaa be, se kɛ̃ ɔ, a yi wa nɔ; be komɛ ɔ, wa yi mi peeɔ wɔ enyɔɔnyɔ, se kɛ̃ ɔ, wa nine mi wui nyu;

9 a waa wɔ yi mi, se kɛ̃ ɔ, Mawu lɛɛ e kua we wɔ; be komɛ hu a kongoɔ wɔ basabasa, se wa gbo we.

10 Daa nɛ ɔ, a ngɛ wɔ dae nɛ a gbe wɔ kaa bɔ nɛ a gbe Yesu ɔ, konɛ a na wɔ kaa wɔ hu wa baa wa je mi kaa Kristo.

11 Wa wami be ɔ tsuo ɔ, Yesu he ɔ, nihi ngɛ wɔ dae nɛ a gbe wɔ, bɔ nɛ pee nɛ a na Kristo wami ɔ ngɛ wa he lo nɛ ma gbo nɛ ɔ mi.

12 Lɔ ɔ he ɔ, wɔɔ wa ngɛ gbenɔ nya mi, konɛ a he nyɛ yi wami.

13 ⓛ Ngmami ɔ ke, “I he Mawu ye, nɛ lɔ ɔ he ɔ, i tu munyu.” Wɔ hu wa ngɛ jamɛ a hemi kɛ yemi ɔ nɔuu; wɔ hu wa heɔ yeɔ, lɔ ɔ he ɔ, wa ngɛ fiɛe.

14 Ejakaa wa le kaa Mawu tle Nyɔmtsɛ Yesu si kɛ ba wami mi ekohu. Wa le kaa e ma tle wɔ hu si kaa bɔ nɛ e tle Yesu si ɔ. Nɛ e maa ngɔ waa kɛ nyɛ tsuo kɛ ya Yesu ngɔ.

15 Nyɛ he nɛ a ngɛ enɛ ɔ tsuo pee ngɛ. Nɛ ke Mawu dloomi nya a, a ba he nihi fuu a yi wami ɔ, jã kɛ̃ sina sɔlemi ɔ maa hiɛ kɛ wo Mawu hɛ mi nyami.

Si himi ngɛ hemi kɛ yemi nya

16 Enɛ ɔ he ɔ, wa kɔni mi jɔ̃ we gblegbleegble. E ngɛ mi kaa wa nɔmlɔ tso ɔ ngɛ puɛe bɔɔbɔɔbɔɔ mohu, se mumi mi ɔ, wa ngɛ wae daa ligbi.

17 Amanehlu nɛ nya wa, nɛ se be kɛe kulaa nɛ ɔ ma ha wa hɛ mi maa ba nyami babauu kɛ be nɔ kɛ maa ya neneene.

18 Wa ngɔ wa hɛ ngɔ fɔ níhi nɛ a nɛ́ nɔ, se pi níhi nɛ a naa. Ejakaa níhi nɛ a naa a, hii si be bɔɔ ko kɛkɛ; se níhi nɛ a nɛ́ ɔ, hii si kɛ yaa neneene.