Korinto Bi II, 3

Somi he ɔ he sɔmɔli

1 Ke wa de jã a, anɛ lɔ ɔ tsɔɔ kaa wa ngɛ wɔ nitsɛmɛ wa yi jee ekohu lo? Anɛ yi jemi womi nɛ ni kpahi maa ngma kɛ ba je wa yi ha nyɛ, aloo nɔ́ nɛ nyɛ maa ngma kɛ ya je wa yi ha ni kpahi he hia wɔ lo? Dɛbi!

2 Nyɛ nitsɛmɛ ji yi jemi womi nɛ a ngma ha wɔ ngɛ wa tsui mi, konɛ nɔ tsuaa nɔ nɛ kane nɛ e nu sisi.

3 ⓕ Nyɛ ngɛ kaa womi nɛ Kristo nitsɛ ngma nɛ e kɛ tsɔ wɔ; pi womi nɛ a kɛ ní ngmami nyu ngmaa ngɛ tɛ tɛtlɛɛhi a nɔ ɔ. Se mohu, enɛ ɔ ji womi nɛ Kristo ngma kɛ gu Mawu hɛ kalɔ ɔ mumi ɔ nɔ ngɛ adesa tsui mi.

4 Wa ngɛ enɛ ɔ dee, ejakaa kɛ gu Kristo nɔ ɔ, wa ngɛ hɛ kɛ nɔ fɔmi ngɛ Mawu mi.

5 Ní tsumi nɛ ɔ, wa be dee ke wɔ nitsɛmɛ wa ngɛ he wami nɛ wa ma nyɛ tsu. He wami nɛ wa ngɛ ɔ, Mawu lɛ ha wɔ.

6 ⓖ Mawu nɛ ha nɛ wa nyɛ nɛ wa ngɛ lɛ Mawu ɔ sɔmɔe kaa bɔ nɛ somi he ɔ tsɔɔ ɔ. Pi mlaa nɛ a ngma nɛ waa ye nɔ ji somi he ɔ, se mohu Mawu mumi. Mlaa nɛ a ngma a, gbenɔ nɛ e kɛ baa, se mumi ɔ haa nɔ wami.

7 ⓗ Mlaa a nɛ a kpɛ́ ngɛ tɛhi a nɔ nɛ kɛ gbenɔ ba a, benɛ a ngɔ ha a, Mawu hɛ mi nyami ɔ je kpo. Hɛ mi nyami ɔ ha nɛ Mose hɛ mi ngɛ kpɛe. Ke jamɛ a be ɔ mi po nɛ hɛ mi nyami ɔ miɔ nɛ e maa ta a, e ha nɛ Mose hɛ mi ngɛ kpɛe bɔ nɛ Israel bi ɔmɛ nyɛ we Mose hɛ mi hyɛmi ɔ,

8 lɛɛ be nɛ ɔ mi nɛ Mumi Klɔuklɔu ɔ ngɛ ní tsue ɔ, anɛ Mawu hɛ mi nyami ɔ be kpɛe kulaa pe kekle ɔ lo?

9 Ke hɛ mi nyami kaa kikɛ nɛ ɔ je kpo somi momo be ɔ mi ɔ, somi he be nɛ ɔ mi lɛɛ hɛ mi nyami ɔ ma kpɛ kɛ be nɔ pe kekle ɔ po.

10 Niinɛ, wa ma de ke nɔ́ ko nɛ hɛ mi ngɛ nyami be ko ɔ, amlɔ nɛ ɔ, jamɛ a hɛ mi nyami ɔ se po. Ejakaa nɔ́ kpa ko ba nɛ e hɛ mi nyami ɔ pã kekle nɔ́ ɔ kulaa.

11 Ke nɔ́ nɛ hi si be kpiti kɛkɛ ɔ hɛ mi nyami je kpo ɔ, lɛɛ nɔ́ nɛ ngɛ daa a hɛ mi nyami ɔ pe lɔ ɔ hluu.

12 Akɛnɛ wa ngɛ kikɛmɛ a hɛ kɛ nɔ fɔmi nɛ ɔ he je ɔ, wa tuɔ munyu kɛ kã.

13 ⓘ Wa be kaa Mose nɛ ngɔ hɛ mi hami nɔ́ ngɔ ha e hɛ mi, konɛ Israel bi ɔmɛ nɛ a kó na kaa e hɛ mi nɛ ngɛ kpɛe ɔ se miɔ nɛ e maa po ɔ.

14 Niinɛ, a nga a juɛmi nya! Kɛ ba su mwɔnɛ ligbi nɛ ɔ, kaa nɔ́ nɛ jamɛ a hɛ mi hami nɔ́ ɔ ha a hɛ mi kɛ mwɔɔ; ejakaa ke a kane somi momo ɔ, a nui sisi. Kristo pɛ lɛ ma nyɛ ma je hɛ mi hami nɔ́ nɛ ɔ.

15 Ee, kɛ ba su mwɔnɛ ɔ, be tsuaa be nɛ a ngɛ Mose mlaa a kanee ɔ, hɛ mi hami nɔ́ ɔ ha a juɛmi nɔ.

16 ⓙ Se ke a kpale kɛ ba Nyɔmtsɛ ɔ ngɔ kɛkɛ a ma je hɛ mi hami nɔ́ ɔ ha mɛ.

17 Nyɔmtsɛ ɔ ji mumi ɔ nɛ, nɛ he nɛ Nyɔmtsɛ ɔ mumi ɔ ngɛ ɔ, lejɛ ɔ he yemi ngɛ.

18 Wɔ Kristo we bi lɛɛ hɛ mi hami nɔ́ ko be wa hɛ mi; wa ngɛ kaa a huhuɛ nɛ Nyɔmtsɛ ɔ hɛ mi nyami ɔ kpɛɔ kɛ guu mi. Kikɛmɛ a hɛ mi nyami ɔ ji Nyɔmtsɛ ɔ mumi ɔ nɛ. Nɛ akɛnɛ mumi ɔ ngɛ ní tsue ngɛ wa mi daa he je ɔ, wa ngɛ tsakee ngɛ pee kaa lɛ.