Korinto Bi II, 12

Paulo ninahi kɛ e gbɔjɔmi

1 Ma ya nɔ ma fĩa kɛ̃, pohu se nami ko be he. Jehanɛ lɛɛ nɔ́ nɛ he munyu nɛ ma tu ji bɔ nɛ Nyɔmtsɛ Yesu Kristo je e he kpo tsɔɔ mi, kɛ e suɔmi nya níhi nɛ e tsɔɔ ke ma pee.

2 I le Kristo se nyɛɛlɔ ko nɛ a sa lɛ kɛ ya hiɔwe lokoo ɔ jeha nyɔngma kɛ eywiɛ ji nɛ. E ngɛ nɔmlɔ tso mi jio, e be nɔmlɔ tso mi jio, i li; Mawu lɛ le.

3 I le kaa a sa kikɛmɛ a nɔmlɔ nɛ ɔ kɛ ya Paradeiso tɔɔ. E ngɛ nɔmlɔ tso mi jio, e be nɔmlɔ tso mi jio, i li; Mawu lɛ le. Benɛ e ngɛ lejɛ ɔ, e nu munyuhi nɛ be hie tumi ngɛ adesa gbi mi, nɛ́ adesa be he blɔ nɛ e sɛɛɔ hulɔ.

4

5 Ma fĩa ngɛ jamɛ a nyakpɛ ní ɔ nɛ i na a he. Ní kpahi nɛ ba ye nɔ ɔ lɛɛ níhi nɛ tsɔɔ kaa gbɔjɔmi ngɛ ye he, nɛ lɔ ɔmɛ kɛkɛ a he ma fĩa ngɛ; pi imi nitsɛ ye he.

6 Ke i ke ma fĩa a, lɔ ɔ tsɔɔ we kaa i ngɛ kuasia jee; ejakaa anɔkuale ɔ i ngɛ dee ɔ nɛ. Se i be fĩae. I hla we nɛ nihi nɛ bu mi ngɛ ye nina amɛ a he; nɔ́ nɛ a na nɛ i pee, kɛ nɔ́ nɛ a nu kɛ je ye nya a, a bu mi ngɛ lɔ ɔmɛ mohu a he.

7 Nyakpɛ ní nguanguahi nɛ a je tsɔɔ mi ɔ ma ha ma wó ye he nɔ. Lɔ ɔ he ɔ, bɔ nɛ pee nɛ e ko ba mi ja he je ɔ, Mawu ngɔ mio ko ngɔ wo ye he womi mi. Nɔ́ nɛ ɔ ngɛ kaa Satan bɔfo, nɛ e kongoɔ mi, konɛ ma ko wó ye he nɔ.

8 I kpa Nyɔmtsɛ ɔ pɛɛ si etɛ sɔuu ke e je nɔ́ nɛ ɔ kɛ je ye nɔ.

9 Se e he nɔ ke, “Dloomi nɛ i kɛ ha mo ɔ, lɔ ɔ kɛkɛ hiɛ ha mo; ejakaa ye he wami ɔ tsuɔ ní wawɛɛ ngɛ nihi nɛ gbɔjɔ ɔ a mi.” I suɔ saminya nɛ ma fĩa kaa i gbɔjɔ, konɛ ma na kaa Kristo he wami ɔ ngɛ ye he bue.

10 Enɛ ɔ he je ɔ, i suɔ kaa ma na nɔ́ ngɛ Kristo he. E hɛwi mi kaa ma nu hiɔ; e hɛwi mi kaa a maa pee mi nisɛ ní, loo ye yi ma fi, loo a maa wa mi yi mi, loo ma na amanehlu. Ejakaa ke i pee gbedee ɔ, Kristo woɔ mi he wami.

Paulo ye Korinto bi ɔmɛ a he kɔmɔ

11 I ngɛ ye ní pee kaa kuasia; se nyɛ lɛ nyɛ pee mi jã. Nyɛ lɛ nyɛ ko je ye yi; ejakaa ke i pi nɔ ko tete po, jamɛ a ni ɔmɛ nɛ nyɛ buu mɛ bɔfo nguahi ɔ, a pi mi ngɛ nɔ́ ko nɔ́ ko mi.

12 Mawu pee nyakpɛ ní nguahi, kɛ okadihi kɛ gu ye nɔ benɛ i ngɛ ní tsue kɛ tsui si tomi ngɛ nyɛ kpɛti ɔ. Nyakpɛ ní nɛ ɔmɛ tsɔɔ kaa niinɛ, bɔfo ji mi.

13 Mɛni ji nɔ́ nɛ i pee ha asafo kpa amɛ nɛ i pee we ha nyɛ, pe kaa i doo we nyɛ nya ke nyɛɛ ye kɛ bua mi kɛ nɔ́ ko? Ke enɛ ɔ ji yayami nɛ i pee nyɛ ɔ, i kpa nyɛ pɛɛ nɛ nyɛ ngɔ pa mi!

14 Amlɔ nɛ ɔ, i dla ye he nɛ ma ba slaa nyɛ si etɛne. I bɛ nɛ ma ba pee tlomi ngɛ nyɛ kuɛ nɔ; nyɛ he i ma ngɛ, se pi nyɛ sika he. Pi bimɛ nɛ sa kaa a hyɛɛ a fɔli a nɔ; e sa kaa fɔli mohu nɛ hyɛ a bimɛ a nɔ.

15 Ma suɔ kaa ma ngɔ níhi tsuo nɛ i ngɛ ɔ, kɛ ye nɔmlɔ tso ɔ tete ngɔ ha nɛ ma kɛ ye bua nyɛ. Ke i suɔ nyɛ babauu kikɛ nɛ ɔ, e sɛ kaa nyɛ hu nyɛɛ suɔ mi jã lo?

16 Nyɛ maa na kaa niinɛ, i pee we tlomi ngɛ nyɛ kuɛ nɔ. Se nɔ ko ma de ke, ye hɛ mi tɛ̃, nɛ i gu ga blɔ nɔ kɛ sisi nyɛ.

17 Kɛkɛɛ? Nihi nɛ i tsɔ kɛ ba nyɛ ngɔ ɔ, anɛ i gu a ti nɔ ko nɔ kɛ sisi nyɛ lo?

18 Pe i kpa Tito pɛɛ nɛ i tsɔ wa nyɛmi kake ɔ ngɔ piɛ e he loko e ba slaa nyɛ. Anɛ Tito ba sisi nyɛ lo? Dɛbi! Anɛ nyɛ li kaa i kɛ lɛ tsuo wa hɛɛ juɛmi kake, nɛ wa peeɔ wa ní fiee lo?

19 Nyɛ ko susu kaa pe wa ngɛ mɔde bɔe nɛ wa fa wa he ngɛ nyɛ hɛ mi kɛkɛ. Mawu ji wa we odase kaa wa ngɛ anɔkuale tue kaa Kristo tsɔli. Nyɛmimɛ nɛ wa suɔ! Nɔ́ tsuaa nɔ́ nɛ wa ngɛ pee ɔ, wa ngɛ pee nɛ wa kɛ ye bua nyɛ.

20 I ngɛ gbeye yee kaa ke i ba nyɛ slaami ɔ, i ba be nyɛ nae bɔ nɛ i ko suɔ, nɛ nyɛ hu nyɛ be mi nae bɔ nɛ nyɛ ko suɔ. Eko piɔ ɔ, níhi nɛ ma ba na kɛkɛ ji pɛ, hunga jemi, mi mi la, mi gbami, nɔ biɛ puɛmi, sieku yemi, he nɔ womi, kɛ basabasa peemi.

21 I ngɛ gbeye yee kaa ke i ba ekohu ɔ, ye Mawu ɔ maa ba mi si ngɛ nyɛ hɛ mi. Nihi nɛ pee yayami sa a, nɛ a tsakee we a tsui, nɛ a ngɛ yayami ɔ pee kɛ mwɔɔ ɔ, ma fo ya ngɛ a he. Mɛ ji mu ní tsuli, ajuama bɔli, kɛ zo ní tsuli.