Korinto Bi II, 11

Paulo kɛ lakpa bɔfo ɔmɛ

1 I na nɛ jinɛ nyɛ na tsui ha mi, ke ji kaa i ngɛ kuasia jee po. Ee, nyɛɛ na ha mi!

2 I suɔ nyɛ saminya kaa bɔ nɛ Mawu nitsɛ suɔ nyɛ ɔ. I suɔ kaa nyɛɛ ye Kristo anɔkuale kaa bɔ nɛ yomiyo yeɔ nyumu nɛ ba bi e si ɔ anɔkuale, nɛ e hyɛɛ e he nɔ saminya kɛ ya siɔ yo kpeemi ligbi ɔ.

3 ⓩ I ngɛ gbeye yee kaa nɔ́ nɛ ba Hawa nɔ be ko ɔ maa ba nyɛ hu nyɛ nɔ. Sinɔ ya sisi Hawa, nɛ Hawa pee yayami. Jã kɛ̃ lɛ a ma puɛ nyɛ tue, nɛ nyɛ be Kristo anɔkuale yee kɛ pi si hu.

4 Nɔ tsuaa nɔ nɛ maa ba nyɛ ngɔ kɛkɛ nyɛ he lɛ a tuu. Ke a ba fiɛ Yesu kpa ha nyɛ hu kɛkɛ nyɛ he ye; pohu e kɛ nɔ́ nɛ wa fiɛ ha nyɛ ɔ kɔ we. Mumi ɔ nɛ a wo he si ɔ, nyɛ he ye, pohu pi Mumi Klɔuklɔu ɔ nɛ nyɛ na kɛ je wa dɛ ɔ. Sane kpakpa a nɛ a kɛ ba a hu nyɛ he ye, pohu slo a nɔ́ ɔ ngɛ nɔ́ nɛ wa ba fiɛ ha nyɛ ɔ he.

5 Jamɛ a nimli ɔmɛ nɛ nyɛ buu mɛ kaa mɛɛ lɛɛ bɔfo nguahi ji mɛ ɔ, i he ye kaa a pi mi ngɛ nɔ́ ko nɔ́ ko mi.

6 Ke i li munyu tumi tete po, lɔ ɔ tsɔɔ we kaa i li nɔ́ ko nɔ́ ko. Nɔ́ nɛ i ngɛ dee nɛ ɔ, nyɛ nitsɛmɛ nyɛ le, ejakaa wa ye he odase si abɔ ngɔ tsɔɔ nyɛ.

7 Benɛ i ba fiɛ sane kpakpa a nɛ kɔɔ Mawu he ɔ ngɔ ha nyɛ ɔ, i he we nyɛ nɔ́ ko. I ba ye he si, konɛ nyɛɛ lɛɛ nyɛ hɛ mi nɛ ba nyami. Anɛ yayami ji nɛ ɔ lo?

8 Benɛ i ngɛ ní tsue ngɛ nyɛ kpɛti ɔ, asafo kpahi lɛ woɔ mi hiɔ. E ngɛ kaa nɔ́ nɛ i ngɛ mɛ jue, konɛ ma kɛ sɔmɔ nyɛ.

9 ⓐ Benɛ i kɛ nyɛ ngɛ, nɛ e fi mi tete ɔ, i hɛwi nyɛ ti nɔ ko nɔ ko; nyɛmimɛ nɛ je Makedonia kɛ ba a ba ha mi nɔ́ tsuaa nɔ́ nɛ hia mi. I pee we tlomi ngɛ nyɛ kuɛ nɔ. Nɛ kɛ je mwɔnɛ ɔ kɛ yaa a hu i hyɛ we nyɛ yemi kɛ buami ko blɔ.

10 Kristo ɔ, anɔkualetsɛ ji lɛ, nɛ lɛ i kase. Lɔ ɔ he ɔ, nɔ́ nɛ i ngɛ dee ji kaa nɔ ko kulaa be Akaya ní ɔmɛ a mi nɛ ma nyɛ maa tsi ye nya kaa ma ko fĩa.

11 Mɛni he je nɛ i ngɛ enɛ ɔ dee? Pe i sume nyɛ lo? Dɛbi, Mawu le kaa i suɔ nyɛ.

12 Ma ya nɔ ma pee kaa bɔ nɛ i peeɔ daa a. I be yemi kɛ buami ko bie ngɛ nyɛ dɛ. Ke i bi ɔ, jamɛ a ni ɔmɛ ma na he blɔ ɔ nɛ a ngɛ hlae ɔ nɛ a maa fĩa ke a ngɛ Mawu ní tsue kaa bɔ nɛ wɔ hu wa ngɛ tsue ɔ nɔuu.

13 Kikɛmɛ a nimli nɛ ɔmɛ ɔ, lakpa bɔfohi ji mɛ; tsa pi anɔkuale bɔfohi ji mɛ. A ní tsumi ji kaa a hi kpae, nɛ a hi nɔ sisie. A tsakeɔ a he, konɛ nihi nɛ na mɛ kaa Kristo nitsɛ e bɔfohi.

14 Enɛ ɔ be nyakpɛ tete! Satan nitsɛ nyɛɔ tsakeɔ e he peeɔ bɔfo nɛ ngɛ kpɛe kaa la!

15 Lɔ ɔ he ɔ, ke Satan tsɔli tsake a he pee kaa Mawu nɛ peeɔ kpakpa a tsɔli ɔ, nɔ́ nɛ ɔ be nyakpɛ kulaa. A nyagbe ɔ maa ba ha mɛ bɔ nɛ sa mɛ kaa yiwutsotsɛmɛ.

Paulo na amanehlu kaa bɔfo

16 I ngɛ dee ekohu ke nyɛ ti nɔ ko nɔ ko nɛ ko bu mi kuasia. Se ke nyɛ maa bu mi kuasia tete po ɔ, nyɛɛ ngmɛ mi blɔ nɛ imi hu ma fĩa bɔɔ ko.

17 Nɔ́ nɛ i ngɛ dee nɛ ɔ, tsa pi kikɛ nɛ ɔ nɛ Nyɔmtsɛ Yesu Kristo ko suɔ nɛ ma tu munyu. Fiami nɛ i ngɛ fĩae nɛ ɔ, i ngɛ munyu tue kaa kuasia pɛ.

18 Se akɛnɛ nihi babauu fĩaa ngɔ fɔɔ je nɛ ɔ mi níhi a nɔ ɔ, imi hu ma fĩa.

19 Nyɛ nitsɛmɛ nyɛ le ní kɛ be nɔ, lɔ ɔ he ɔ, nyɛ naa tsui ha kuasiahi.

20 Ke nɔ ko ba ye nyɛ nyɔguɛ, loo adufude, loo e ba pee nyɛ kuasia, loo e ba wo e he nɔ ngɛ nyɛ nɔ, loo e ba gba nyɛ hɛ mi ma po, nyɛ de we nɔ́ ko.

21 E peeɔ mi zo kaa ma de ke wɔɔ lɛɛ fɔ̃li ji wɔ, nɛ wa nyɛ we nɛ waa pee nɔ́ ko kaa jã! Jehanɛ lɛɛ i ngɛ munyu tue kaa kuasia! Níhi nɛ ni kpa amɛ ngɛ fĩae ngɛ he ɔ, imi hu ma fĩa ngɛ he jã nɔuu.

22 A fĩaa ke Hebri bi ji mɛ, pi jã? Saminya, imi hu Hebri no ji mi. Nɛ a deɔ ke Israel bi ji mɛ, pi jã lo? Ee, imi hu Israel no ji mi. Pi Abraham nina ji mɛ? Ee, imi hu eko ji mi.

23 ⓑ Kristo sɔmɔli ji mɛ lo? I ngɛ munyu tue kaa nɔ nɛ yi mi puɛ; tsia, i pe mɛ tsuo! I tsu ní wawɛɛ pe mɛ; a wo mi tsu si abɔ pe mɛ; a fia mi kpa si abɔ pe mɛ, nɛ jehanɛ hu, i ya gbenɔ muɔ nya ba si abɔ pe mɛ.

25 ⓓ Roma nikɔtɔma amɛ fia mi kpa si etɛ; a fia mi tɛ si kake. I kɛ lɛ butu si etɛ, nɛ i ye ligbi kake, nyɔ kɛ pia ngɛ wo mi.

26 ⓔ I hia blɔ kpitikpiti. I na amanehlu babauu ngɛ pa hɛ mi, kɛ ojo fiali a dɛ mi; i na nɔ́ ngɛ imi nitsɛ ye weku li a dɛ mi; i na nɔ́ ngɛ ma je li a dɛ mi. I na nɔ́ ngɛ ma mi, kɛ nga nɔ. I na nɔ́ ngɛ wo hɛ mi, kɛ nyɛmimɛ lakpatsɛmɛ a dɛ mi.

27 I gbo dengme kɛ tsu ní wawɛɛ nɛ be komɛ mahe hwɔmi be mi. Hwɔ kɛ kuma yeɔ mi; be komɛ po i haa hwɔ; fĩɛ yeɔ mi, nɛ he hami nɔ́ hiaa mi.

28 Se enɛ ɔmɛ, kɛ ní kpa komɛ tsuo a se ɔ, asafo ɔmɛ a he susumi ngɛ kaa tlomi ngɛ ye kuɛ nɔ daa ligbi.

29 Ke nɔ ko mumi gbo, kɛkɛ imi hu ye nɔ́ ɔ gbo; ke nɔ ko nane kpata, kɛkɛ ye mi mi sã mi ha lɛ.

30 Ke e hia kaa ma fĩa kɛ̃ ɔ, lɛɛ níhi nɛ tsɔɔ bɔ nɛ i gbɔjɔ ha a, lɔ ɔmɛ a nɔ ma fĩa ngɔ fɔ.

31 Mawu, wa Nyɔmtsɛ Yesu Kristo Tsɛ ɔ le kaa i yi lakpa. A je e yi kɛ ya neneene.

32 ⓕ Benɛ i ngɛ Damasko ɔ, amlaalo ɔ nɛ ngɛ Matsɛ Areta sisi ɔ ha a huɔ ngɛ Damasko ma a mi, konɛ a nu mi.

33 Se nyɛmimɛ ɔmɛ ngɔ mi wo kusii mi, nɛ a siu mi kɛ gu gli puɔ mi kɛ kple si. Nɛ i tu fo kɛ je e dɛ mi.