Korinto Bi I, 8

Kusumi lo nɛ a kɛ ha amagahi

1 Jehanɛ ma suɔ nɛ ma de nɔ́ ko ngɛ kusumi lo nɛ a kɛ haa amaga he. E ngɛ mi niinɛ kaa “wɔ tsuo wa le ní,” kaa bɔ nɛ a deɔ ɔ. Se nile haa nɔ woɔ e he nɔ, nɛ suɔmi lɛɛ e woɔ nɔ he wami.

2 Ke nɔ ko susu kaa e le ní ɔ, he nɛ sa kaa e su loko a tsɛ lɛ ní lelɔ ɔ, e sui lejɛ ɔ saasaa.

3 Se nɔmlɔ nɛ suɔ Mawu ɔ, Mawu le lɛ.

4 Lɔ ɔ he ɔ, ma suɔ nɛ ma de nɔ́ ko ngɛ kusumi lo nɛ a kɛ haa amaga a yemi he. Wa le kaa amaga daa si ha nɔ́ ko nɛ be je nɛ ɔ mi. Wa le hu kaa mawu kpa ko be ngɛ anɔkuale Mawu kake ɔ se.

5 Ni komɛ deɔ ke ní komɛ ngɛ hiɔwe, kɛ zugba a nɔ nɛ a tsɛɛ mɛ “mawuhi.” Yoo, ke “mawu” nɛ ɔmɛ kɛ “nyɔmtsɛmɛ” nɛ ɔmɛ pɔ he tete po,

6 kɛ̃ ɔ, wɔɔ lɛɛ Mawu kake too nɛ ji Tsɛ ɔ, lɛ pɛ wa ngɛ. Lɛ nɛ bɔ níhi tsuo, nɛ lɛ nɛ ha nɛ wa ngɛ wami mi. Wa ngɛ Nyɔmtsɛ kake hulɔ; lɛ ji Yesu Kristo. E nɔ Mawu gu kɛ bɔ nɔ́ tsuaa nɔ́, nɛ lɛ nɛ ha nɛ wa ngɛ wami mi.

7 Se pi nɔ tsuaa nɔ nɛ le anɔkuale nɛ ɔ. Kɛ ba si mwɔnɛ ɔ, ni komɛ susuɔ kaa amagahi ngɛ wami mi; a susuɔ kaa ke a ha amagahi ní ɔ, mawuhi nɛ a ha ní ɔ nɛ. Enɛ ɔ he je ɔ, ke a ye kikɛmɛ a ní ɔ, a he nile haoɔ mɛ, ejakaa a susuɔ kaa niye ní ɔ ma ble mɛ.

8 Ngma kɛkɛ be hae nɛ waa hɛ wɔ kɛ su Mawu he haa pe bɔ nɛ wa ngɛ ɔ. Ke wa yi ɔ, wa laa we nɔ́ ko; ke wa ye hu, wa na we he se tsɔ.

9 Nɔ́ nɛ hia kɛkɛ ji kaa nyɛɛ hyɛ nɛ hi nɛ nyɛ ko ngɔ he blɔ nɛ nyɛ ngɛ nɛ ɔ kɛ ye ní ɔ. Ke nyɛ pee jã a, nyɛ ma ha nɛ nyɛ nyɛmimɛ Kristo se nyɛɛli nɛ mɛɛ a hemi kɛ yemi mi wɛ ɔ maa pee yayami.

10 Waa ngɔ lɛ kaa nɔ ko nɛ e he nile deɔ lɛ ke e sɛ kaa a yeɔ ní ngɛ amaga jami he ɔ na mo “ní lelɔ” nɛ o ngɛ ní yee ngɛ lejɛ ɔ. Anɛ enɛ ɔ be lɛ he wami woe nɛ lɛ hu e ya ye ní nɛ a kɛ ha amagahi lo?

11 Kɛkɛ ɔ, o “nile” ɔ he ɔ, nɔmlɔ nɛ gbɔjɔ nɛ ɔ, nɛ ji o nyɛmi nɛ Kristo ba gbo ngɛ lɛ hu e he ɔ hɛ mi ma kpata.

12 Ke o pee o nyɛmi yayami kaa kikɛ nɛ ɔ, Kristo nɛ o pee yayami kɛ si ɔ nɛ. Ejakaa mo lɛ o wo o nyɛmi ɔ he wami nɛ e kɛ pee nɔ́ ko nɛ e le kaa e sɛ nɛ e peeɔ.

13 Lɔ ɔ he ɔ, ke ngma ma ha ye nyɛmi nane ma kpata a, i be lo yee hu gblegbleegble, konɛ ma ko ha nɛ ye nyɛmi ɔ nɛ pee yayami.