Korinto Bi I, 7

Gba si himi

1 Jehanɛ, níhi nɛ nyɛ ngma ba ha mi ɔ, nɔ́ nɛ i ngɛ dee ngɛ a he ji nɛ ɔ nɛ. E hi ha nyumu kaa e ko ta yo he.

2 Se ajuama bɔmi he ɔ, nyumu tsuaa nyumu nɛ ná lɛ nitsɛ e yo, nɛ yo tsuaa yo nɛ ná lɛ nitsɛ e huno.

3 Nyumu nɛ ha e yo nɔ́ nɛ ji yo blɔ nya nɛ sa kaa e na kɛ je e huno dɛ mi; yo ɔ hu nɛ pee jã nɔuu ha e huno.

4 Yogbayo be he wami ngɛ lɛ nitsɛ e nɔmlɔ tso nɔ; e huno lɛ ngɛ jamɛ a he wami ɔ. Jã kɛ̃ huno hu be he wami ngɛ lɛ nitsɛ e nɔmlɔ tso nɔ; e yo lɛ ngɛ jamɛ a he wami ɔ.

5 Nyumu kɛ e yo kó tsi a he nya kaa a kɛ a sibi be bɔmi nae. Lɛɛ ja eko ɔ, mɛ ni enyɔ ɔmɛ tsuo a kplɛɛ kaa a maa pee jã be kuku kɛkɛ, konɛ a na deka kɛ sɔle. Lɔ ɔ se ɔ, á bɔni bɔmi ekohu. Ke pi jã a, a be a he nɔ nyɛe maa ye hu, nɛ Satan maa ka mɛ.

6 Nɔ́ nɛ i ngɛ dee nɛ ɔ, ga kɛkɛ i ngɛ nyɛ woe; pi mlaa.

7 Jinɛ i ko suɔ kaa nihi tsuo nɛ a hi kaa bɔ nɛ i ngɛ nɛ ɔ. Se nyɛ ti nɔ tsuaa nɔ ngɛ nike ní pɔtɛɛ nɛ Mawu ha lɛ; slo nɔ kake nɔ́ ngɛ nɔ kpa nɔ́ he.

8 Jehanɛ, nyɛ nyumu kuyo ɔmɛ, kɛ yalɔyi ɔmɛ ɔ, i ngɛ dee ke e maa hi ha nyɛ ke nyɛ maa ya nɔ maa hi si kikɛ nɛ ɔ kaa bɔ nɛ imi hu i ngɛ ɔ.

9 Se ke nyɛ nyɛ́ we nyɛ he nɔ nyɛɛ ye ɔ, e hia kaa nyɛɛ sɛ gba si himi mi. Ejakaa lɔ ɔ hi pe nɔ́ nɛ akɔnɔ ma ba hao nyɛ.

10 ⓐ Nyɛ ni nɛmɛ nɛ nyɛ ngɛ gba si himi mi ɔ, mlaa nɛ Nyɔmtsɛ ɔ ngɛ nyɛ woe ji yo kó je gba! Enɛ ɔ, pi imi nɛ i de.

11 Se ke e na je gba kɛ̃ ɔ, e hi si jã, nɛ e ko gba, aloo e ya nɛ e kɛ e huno ɔ ya dla. Jehanɛ hu, nyumu ko ngmɛɛ e yo he.

12 Nyɛ ni nɛmɛ nɛ piɛ ɔ, nɔ nɛ imi, se pi Kristo, i ngɛ nyɛ dee ji nɛ ɔ nɛ; ke nyumu nɛ le Kristo ngɛ yo nɛ lɛɛ e li Kristo, se kɛ̃ ɔ, yo ɔ kplɛɛ kaa e kɛ lɛ maa hi si ɔ, nyumu ɔ ko ngmɛɛ e he.

13 Ke yo nɛ le Kristo ngɛ huno nɛ lɛɛ e li Kristo, se kɛ̃ ɔ, nyumu ɔ kplɛɛ kaa e kɛ lɛ maa hi si ɔ, yo ɔ kó kua lɛ gbami.

14 Ejakaa nyumu nɛ li Kristo ɔ, e yo ɔ he ɔ, a tsukɔ e he ngɔ ha Mawu. Yo nɛ li Kristo ɔ, lɛ hu e huno ɔ he ɔ, a tsukɔ e he ngɔ ha Mawu. Ke pi jã a, jinɛ a bimɛ ɔmɛ a he tsɔ we. Se amlɔ nɛ ɔ, a ba pee bimɛ nɛ a tsukɔ a he ha Mawu.

15 Se ke nyumu nɛ li Kristo ɔ suɔ kaa e maa ngmɛɛ e yo nɛ le Kristo ɔ he, aloo yo nɛ li Kristo ɔ suɔ kaa e ma kua e huno nɛ le Kristo ɔ, lɔ ɔ lɛɛ faa. Ke e ba mi jã a, mlaa ko mlaa ko nui nɔ nɛ le Kristo ɔ, nyumu ɔ jio, yo ɔ jio. Mawu tsɛ nyɛ nɛ nyɛɛ hi si ngɛ he jɔmi mi.

16 Mo yo nɛ o le Kristo, kɛ o maa pee kɛ le kaa alini mo lɛ o ma he o huno ɔ yi wami? Mo nyumu nɛ o le Kristo, kɛ o maa pee kɛ le kaa alini mo lɛ o ma he o yo ɔ yi wami?

Hii si kaa bɔ nɛ Mawu tsɛ mo ɔ

17 Nike ní nɛ Nyɔmtsɛ Yesu ha nɔ ko loko Mawu ba tsɛ lɛ ɔ, é ya nɔ nɛ e tsu he ní kaa bɔ nɛ e peeɔ ɔ. Enɛ ɔ nɛ i tsɔɔ ngɛ asafo ɔmɛ tsuo a mi.

18 Ke a po nɔ ko loko Mawu tsɛ lɛ ɔ, e ko de ke e maa gbe pa doku ɔ. Jã kɛ̃ ke a pui nɔ ko loko e ba le Mawu ɔ, e ko ha nɛ a po lɛ.

19 Ejakaa a po mo jio, a pui mo jio, pi nɔ́ ko; nɔ́ nɛ he hia ji kaa o ye Mawu mlaa amɛ a nɔ.

20 Nɔ tsuaa nɔ nɛ hi si kaa bɔ nɛ e ngɛ loko Mawu tsɛ lɛ.

21 Benɛ Mawu tsɛ mo ɔ, jamɛ a be ɔ, tse nyɔguɛ ji mo? Ko ha lɔ ɔ nɛ hao mo kulaa. Se ke blɔ ko ngɛ nɛ o kɛ maa ye o he ɔ, bɔɔ he mɔde.

22 Ejakaa nyɔguɛ nɛ Nyɔmtsɛ ɔ tsɛ lɛ ɔ ba peeɔ Nyɔmtsɛ ɔ nɔmlɔ nɛ ye e he. Jã kɛ̃ ke nɔ ko ye e he, nɛ Kristo tsɛ lɛ ɔ, e ba peeɔ Kristo nyɔguɛ.

23 Kristo hé nyɛ kɛ jua wawɛ; nyɛ ko pee nyɛ he nimli a nyɔguɛhi.

24 Ye nyɛmimɛ, enɛ ɔ he ɔ, si himi mi tsuaa si himi mi nɛ nɔ ko ngɛ benɛ a tsɛ lɛ ɔ, e kɛ Mawu nɛ hi si jã.

Nihi nɛ sɛ we gba si himi mi, kɛ yalɔyi

25 Jehanɛ, nɔ́ nɛ nyɛ ngma ngɛ yihewi nɛ gba we lolo a he ɔ, Nyɔmtsɛ ɔ ha we mi mlaa pɔtɛɛ ko. Se kɛ̃ ɔ, juɛmi nɛ i kɛ ngɛ nyɛ ga nɛ ɔ woe ɔ, Nyɔmtsɛ ɔ nitsɛ lɛ dloo mi; lɔ ɔ he ɔ, e hia kaa nɔ́ nɛ ma de nyɛ ɔ, nyɛɛ ngɔ.

26 Amlɔ nɛ ɔ, he hiami be ɔ je sisi momo. Lɔ ɔ he ɔ, i susuu kaa mo nɔ, bɔ nɛ o ngɛ ɔ, o hi si jã kɛkɛ.

27 Ke yo ngɛ o dɛ ɔ, kó de ke o ngɛ e he ngmɛɛe. Ke yo be o dɛ ɔ, ko ya hla eko.

28 Se ke o ná ngɔ yo ɔ, o pee we yayami. Jã kɛ̃ ke yo nɛ gba we lolo hu gba a, e pee we yayami. Se dengme nɛ ngɛ gba si himi mi he je ɔ, i na nɛ nyɛ je nyɛ hɛ ngɔ fɔ si mohu amlɔ nɛ ɔ.

29 Nyɛmimɛ, nɔ́ nɛ i ngɛ dee kɛkɛ ji kaa be ɔ pi hu. Kɛ je be nɛ ɔ mi kɛ yaa a, yitsɛmɛ nɛ a hi si kaa nɔ́ nɛ yo be a dɛ.

30 Ni nɛmɛ nɛ ngɛ ya foe ɔ, a pee kaa ni nɛmɛ nɛ yi kɔmɔ; nihi nɛ ngɛ muɔe ɔ, a pee kaa ni nɛmɛ nɛ be bua jɔmi; nihi nɛ ngɛ ní hee ɔ, a pee kaa nɔ́ nɛ níhi nɛ a he ɔ pi a nɔ́;

31 nihi nɛ a kɛ je ɔ ngɛ bɔe ɔ, a pee a ní kaa nihi nɛ puɛ we a be ngɛ je ɔ mi. Ejakaa je ɔ, bɔ nɛ e ngɛ nɛ ɔ, e se be kɛe.

32 I suɔ kaa nyɛɛ hi si nɛ nɔ́ ko nɔ́ ko kó hao nyɛ. Nyumu nɛ be yo ɔ ngɔɔ e he ngɔ woɔ Nyɔmtsɛ ɔ ní tsumi ɔ mi, nɛ e bɔɔ mɔde kaa e maa pee Nyɔmtsɛ ɔ suɔmi nya ní.

33 Nɔ nɛ ngɛ yo ɔ lɛɛ e haoɔ e he ngɛ je nɛ ɔ mi níhi a he, ejakaa e bɔɔ mɔde kaa e maa sa e yo ɔ hɛ mi.

34 Ke e ba mi jã a, e juɛmi peeɔ lɛ enyɔɔnyɔ. Yo nɛ be huno, aloo yiheyo kɛ e he haa Nyɔmtsɛ ɔ ní tsumi, ejakaa e suɔ kaa e ngɔ e nɔmlɔ tso ɔ, kɛ e mumi tsuo ha Nyɔmtsɛ ɔ. Yogbayo lɛɛ e haoɔ e he ngɛ je ɔ mi níhi a he, ejakaa e suɔ kaa e sa e huno hɛ mi.

35 Nyɛ nitsɛmɛ nyɛ kpakpa he nɛ i ngɛ nyɛ enɛ ɔ dee, se pi kaa i ngɛ hlae nɛ ma tsi nyɛ nya ngɛ blɔ ko nɔ. Niinɛ, i suɔ kaa nyɛɛ ba nyɛ je mi saminya. I suɔ kaa nyɛɛ ngɔ nyɛ he tsuo ngɔ wo Nyɔmtsɛ ɔ ní tsumi ɔ mi nɛ nyɛ ko ya se.

36 Nɔ́ nɛ kɔɔ nyumu, kɛ e yo nɛ e bi si, se e ngɔɛ lɛ lolo ɔ a he ji nɛ ɔ nɛ. Ke nyumu ɔ na kaa e pee we yo ɔ saminya, nɛ lɛ nitsɛ hu e nyɛ we e he nɔ nɛ e hyɛ ɔ, e ngɔ yo ɔ kaa bɔ nɛ e ngɛ hlae ɔ. Yayami ko be enɛ ɔ mi. Ee, a sɛ gba si himi mi.

37 Se ke nɔ ko muɔ e yi mi kpɔ ke e be yo ngɔe, nɛ pi kaa a nyɛ e nɔ ɔ, ke e nyɛ hyɛ e he nɔ saminya, nɛ lɛ nitsɛ e to e yi mi kaa nɔ́ nɛ e maa pee ji nɛ ɔ, lɔ ɔ lɛɛ e hi kaa e ko ngɔ yo ɔ.

38 Lɔ ɔ he ɔ, nɔ nɛ maa ngɔ yo ɔ, pee saminya. Se nɔ nɛ be yo ngɔe ɔ, e nɔ́ ɔ hi kulaa pe nɔ kaketsɛ ɔ.

39 Yogbayo ɔ, be abɔ nɛ e huno ngɛ je mi kɛ mwɔɔ ɔ, mlaa fi lɛ. Ke e huno ɔ gbo ɔ, lɔ ɔ lɛɛ e ngɛ he blɔ nɛ e gbaa nɔ tsuaa nɔ nɛ e suɔ. Se kɛ̃ ɔ, e sa kaa nyumu ɔ nɛ pee nɔ ko nɛ le Nyɔmtsɛ ɔ.

40 Se ke e hi si bɔ nɛ e ngɛ ɔ, a maa gbaa lɛ babauu mohu. Bɔ nɛ ye juɛmi deɔ mi ji nɛ ɔ nɛ, nɛ e peeɔ mi kaa imi hu Mawu mumi ngɛ ye mi.