Korinto Bi I, 11

1 ⓤ Nyɛɛ ngɔ mi ngɔ pee nɔ hyɛmi nɔ́ kaa bɔ nɛ imi hu i ngɔ Kristo ngɔ pee ye nɔ hyɛmi nɔ́ ɔ.

A ha yi nɔ ngɛ sɔlemi

2 I ngɛ nyɛ yi jee, ejakaa nyɛ kaiɔ ye ní peepee, kɛ níhi nɛ i tsɔɔ nyɛ ɔ daa. Tsɔɔmihi nɛ i na kɛ je nihi a dɛ, nɛ imi hu i ngɔ kɛ ha nyɛ ɔ, nyɛ pɛtɛ he.

3 Se i suɔ nɛ nyɛɛ nu sisi kaa Kristo ngɛ he wami ngɛ nyumuhi tsuo a nɔ kaa bɔ nɛ nyumu ji yi kɛ ha e yo, nɛ Mawu hu ji yi kɛ ha Kristo ɔ.

4 Lɔ ɔ he ɔ, ke nyumu ngɛ sɔlee, aloo e ngɛ Mawu sɛ gbi ɔ fiɛe, nɛ e kɛ nɔ́ ha e yi nɔ ɔ, e ngɛ Kristo nɛ ji yi ɔ he guɛ gbee.

5 Jã kɛ̃, yo tsuaa yo nɛ ngɛ sɔlee, aloo e ngɛ Mawu sɛ gbi ɔ fiɛe, nɛ e kɛ nɔ́ hɛ́ e yi nɔ ɔ, e huno nɛ ji e yi ɔ hɛ mi si e ngɛ puee ɔ nɛ. Slɔɔto be e kɛ yo nɛ sɛ e yi nɔ a kpɛti.

6 Ke yo kɛ nɔ́ hɛ́ e yi nɔ ɔ, lɛɛ e sã e yi nɔ mɔ. Se ke zo ngɛ lɛ pee kaa e ma sã e yi nɔ, loo e maa sɛ e yi ɔ, lɛɛ e kɛ nɔ́ nɛ ha e yi ɔ nɔ.

7 ⓥ E sɛ kaa nyumu kɛ nɔ́ haa e yi nɔ, ejakaa Mawu subai mi a bɔ lɛ ngɛ, nɛ e woɔ Mawu hɛ mi nyami. Se yo lɛɛ nyumu hɛ mi nyami womi nɔ́ ji lɛ;

8 ⓦ ejakaa a bɔɛ nyumu kɛ ji yo mi, se yo mohu nɛ a bɔ kɛ je nyumu mi.

9 Jehanɛ hu, a bɔɛ nyumu ha we yo, se yo mohu nɛ a bɔ ha nyumu.

10 Enɛ ɔ he ɔ, e sa kaa yo nɛ ha e yi nɔ kaa okadi ha hiɔwe bɔfo ɔmɛ kɛ tsɔɔ kaa a ha lɛ he blɔ ke e sɔle, loo e fiɛ Mawu sɛ gbi ɔ.

11 Se ngɛ Nyɔmtsɛ ɔ hɛ mi ɔ, yo be e dɛ he, nɛ nyumu hu be e dɛ he.

12 A je yo kɛ je nyumu mi, nɛ nyumu tsuaa nyumu hu yo lɛ fɔ lɛ. Niinɛ, nɔ́ tsuaa nɔ́ je Mawu ngɔ.

13 Kɛ nyɛ nitsɛmɛ nyɛ susuɔ kɛɛ? Anɛ e da kaa yo maa sɔle ha Mawu ngɛ ma hɛ mi, nɛ e hɛ́ e yi nɔ lo?

14 Hyɛ, anɛ adebɔ nitsɛ tsɔɔ we nyɛ kaa ke nyumu fia e yi kusuu ɔ, e ngɛ zo lo?

15 Yo lɛɛ e yi bwɔmi fuu ɔ ji e hɛ mi nyami. Mawu ha yo yi bwɔmi nɛ e kɛ ha e he.

16 Se ke nɔ ko susuɔ kaa nɔ́ nɛ i de ngɛ nɔ́ nɛ ɔ he ɔ be mi ɔ, nɔ́ nɛ ma de kɛkɛ ji kaa i kɛ Mawu asafo ɔ, wɔɔ lɛɛ wa be jami blɔ nya tomi kpa ko ngɛ enɛ ɔ se.

Nyɔmtsɛ niye ní ɔ

(<x>470 26:26-29</x>; <x>480 14:22-25</x>; <x>490 22:14-20</x>)

17 Jehanɛ ɔ lɛɛ nɔ́ nɛ ma de nyɛ nɛ ɔ, pi kaa ma je nyɛ yi. Ejakaa ke nyɛ kpe ɔ, nɔ́ kpakpa ko ji mi; ní yayahi mohu nyɛ peeɔ.

18 Kekleekle ɔ, i na le kaa ke nyɛ bua nyɛ he nya kaa Kristo asafo ɔ, kɛkɛ nyɛ gba nyɛ mi kɛ wo kuu slɔɔtohi a mi. I heɔ yeɔ kaa anɔkuale ko kɛ̃ ngɛ nɔ́ nɛ i nu nɛ ɔ mi.

19 Niinɛ, e he hia kaa mi gbami ko kɛ̃ nɛ hi nyɛ kpɛti, konɛ a na Kristo se nyɛɛli kpakpa amɛ paa.

20 Ke nyɛ nya ba bua a, pi Nyɔmtsɛ niye ní ɔ nɛ nyɛ yeɔ.

21 Ejakaa ke nyɛ ngɛ ní ɔ yee ɔ, nɔ tsuaa nɔ he sɔɔ kɛ yeɔ lɛ nitsɛ e niye ní. Nɛ benɛ hwɔ ngɛ ni komɛ yee ɔ, ni komɛ hu tɔ dã.

22 Anɛ nyɛ be nyɛ nitsɛmɛ nyɛ wehi nɛ nyɛ maa ye ní, nɛ nyɛ maa nu ní ngɛ lejɛ ɔmɛ lo? Aloo pe nyɛ ngɛ hlae nɛ nyɛɛ gbe Mawu asafo ɔ he guɛ, nɛ nyɛ pue ni nɛmɛ nɛ be nɔ́ ko ɔ a hɛ mi si? Kɛ ma de nyɛ kɛɛ? Ma je nyɛ yi lo? Dɛbi, i be nyɛ yi jee!

23 Nɔ́ nɛ i ná kɛ je Nyɔmtsɛ ɔ dɛ mi ɔ, lɔ ɔ nɛ i kɛ ha nyɛ ɔ nɛ, kaa Nyɔmtsɛ Yesu ɔ, jamɛ a nyɔ ɔ mi nɔuu nɛ a tsɔɔ e se blɔ ɔ, e kɛ̃ abolo,

24 nɛ e na Mawu si, nɛ e ku mi, nɛ e de ke, “Enɛ ɔ ji ye nɔmlɔ tso nɛ a ku ngɛ nyɛ he. Nyɛɛ pee enɛ ɔ nɛ nyɛ kɛ kai mi.”

25 ⓧ Ja nɔuu e wo kplu ɔ hu benɛ a ye ní ɔ ta a, nɛ e de ke, “Kplu nɛ ɔ ji Mawu somi he ɔ nɛ a kɛ ye muɔ sɔu nya. Nyɛɛ pee enɛ ɔ, be tsuaa be nɛ nyɛ maa nu ɔ, nɛ nyɛ kɛ kai mi.”

26 Enɛ ɔ tsɔɔ kaa be tsuaa be nɛ nyɛ maa ye abolo nɛ ɔ eko, nɛ nyɛ maa nu wai ngɛ kplu nɛ ɔ mi ɔ, nyɛ ngɛ Nyɔmtsɛ ɔ gbenɔ sane ɔ fiɛe kɛ yaa su be nɛ e maa ba.

27 Lɔ ɔ he ɔ, nɔ tsuaa nɔ nɛ yeɔ Nyɔmtsɛ ɔ we abolo ɔ, nɛ́ e nuu wai nɛ ngɛ kplu ɔ mi bɔ nɛ sɛ ɔ, e peeɔ yayami kɛ siɔ Nyɔmtsɛ ɔ nɔmlɔ tso ɔ, kɛ e muɔ ɔ.

28 Nɔ tsuaa nɔ nɛ hyɛ e tsui mi kekle loko e ye abolo ɔ, nɛ e nu wai nɛ ngɛ kplu ɔ mi ɔ.

29 Ejakaa nɔ nɛ yeɔ abolo ɔ, nɛ e nuɔ wai ngɛ kplu ɔ mi kɛkɛ, nɛ e susuu we Nyɔmtsɛ ɔ nɔmlɔ tso ɔ he, kɛ nɔ́ nɛ e ji ɔ, Mawu maa gbla e tue.

30 Enɛ ɔ he nɛ nyɛ ti nihi fuu gbɔjɔ, nɛ a be he wami, nɛ nihi babauu hu gbo ɔ nɛ.

31 Se ke wɔ nitsɛmɛ wa maa kojo wa he anɔkuale mi kekle ɔ, Mawu be wa tue gblae.

32 Se Nyɔmtsɛ ɔ kojoɔ wɔ, nɛ e gblaa wa tue, bɔ nɛ pee nɛ nyagbe ɔ, Mawu nɛ ko bu wɔ fɔ kɛ piɛ je ɔ he.

33 Lɔ ɔ he ɔ, ye nyɛmimɛ, ke nyɛ nya ba bua, nɛ nyɛ maa ye Nyɔmtsɛ ɔ niye ní ɔ, nyɛɛ mlɛ nyɛ sibi.

34 Se ke hwɔ ngɛ nɔ ko yee ɔ, e ye ní ngɛ we mi lolo, bɔ nɛ pee nɛ nyɛ he nya buami ɔ kó ba pee tue gblami mohu ha nyɛ. Níhi nɛ piɛ ɔ, ke i ba su kɛkɛ ma to blɔ nya.