Roma Bi 3

1 Lɛɛ mɛni Yuda no kɛ pe ma je no mɔ? Aloo mɛni se nami ngɛ nɔ pomi he?

2 Ee, nɔ pomi he ngɛ se nami babauu ngɛ blɔ tsuaa blɔ nɔ. Kekleekle nɔ́ ji kaa a tu Mawu munyu ɔ ngɔ wo Yuda bi ɔmɛ a dɛ.

3 E ngɛ mi kaa ni komɛ he we yi lɛɛ, se anɛ lɔ ɔ tsɔɔ kaa Mawu be anɔkuale yee lo?

4 ⓚ Dɛbi! Mawu ɔ, anɔkualetsɛ ji lɛ; pohu nimli adesahi tsuo lɛɛ lakpa a yeɔ. Kaa bɔ nɛ ngmami ɔ deɔ ɔ, “Konɛ nihi tsuo nɛ a na kaa nɔ́ tsuaa nɔ́ nɛ o deɔ ɔ ngɛ mi; Nɛ ke a kojo mo hu, o yeɔ nguɔ.”

5 Se ke nɔ́ nɛ dɛ nɛ wa peeɔ ɔ, haa nɛ a naa paa kaa nɔ́ nɛ da pɛ Mawu peeɔ ɔ, lɛɛ kɛ wa ma de kɛɛ? Anɛ ke Mawu kɛ mi mi fumi gbla wa tue ɔ, e tɔ lo? (Bɔ nɛ i bi nɛ ɔ, ja kɛkɛ adesa tuɔ munyu.)

6 Dɛbi! Ke Mawu yi dami sane ɔ, kɛ maa pee kɛɛ nɛ e maa kojo je ɔ?

7 Se nɔ ko ma bi ke, “Ke ye lakpa a haa nɛ a naa Mawu we anɔkuale ɔ saminya, nɛ lɔ ɔ woɔ e hɛ mi nyami ɔ, mɛni he je mɔ nɛ a buu mi fɔ kaa yayami peelɔ ɔ?”

8 Mɛni he je nɛ e sɛ́ kaa wa deɔ ke, “Wa maa pee yayami konɛ kpakpa nɛ je mi kɛ ba,” kaa bɔ nɛ ni komɛ poo ngɔ fɔɔ wa nɔ ke wa deɔ ɔ? Jamɛtsɛmɛ ɔmɛ ɔ, fɔ nɛ a bu mɛ ɔ sa mɛ.

Nɔ ko nɔ ko be nɛ peeɔ nɔ́ nɛ da

9 Lɛɛ kɛ ji lɛ kɛɛ? Anɛ wɔ Yuda bi wa nɔ́ mi hi pee ni kpa amɛ lo? Dɛbi, pi ja kulaa! Kaa bɔ nɛ i tsɔɔ nya momo ɔ, Yuda bi kɛ Hela bi tsuo sɔ; mɛ tsuo a ngɛ yayami he wami sisi.

10 ⓛ Kaa bɔ nɛ ngmami ɔ deɔ ɔ, “Nɔ ko nɔ ko be nɛ da; nɔ kake ngmelu po be.

11 Ní lelɔ ko be ɔ, nɔ ko nɔ ko be nɛ hlaa Mawu se blɔ.

12 Mɛ tsuo a tla blɔ; mɛ tsuo a puɛ; nɔ ko nɔ ko be nɛ peeɔ kpakpa, nɔ kake ngmelu po be.

13 ⓜ A tuɔ munyu dɔkɔdɔkɔ; se lɛ tsuo gbenɔ lɛ e kɛ baa. A munyu ngɛ kaa sanga duɔ.

14 ⓝ Gbiɛmi munyu nɛ kɛ nɔ woɔ haomi mi nɛ jeɔ a nya mi.

15 ⓞ A he sɔɔ kɛ muɔ si puemi.

16 He tsuaa he nɛ a be ngɛ ɔ, hɛ mi kpatami, kɛ kɔmɔ yemi a naa.

17 A ha we nɛ nihi a he mi jɔɔ mɛ.

18 ⓟ Mawu gbeye yemi ko kulaa be a hɛ mi.”

19 Jehanɛ ɔ, wa le kaa níhi tsuo nɛ ngɛ mlaa a mi ɔ, nihi nɛ yeɔ mlaa a nɔ ɔ a he nɛ e kɔɔ. Lɛɛ nɔ ko nɔ ko be nya jemi; je ɔ tsuo yeɔ fɔ ngɛ Mawu hɛ mi.

20 ⓠ Ejakaa ke nɔ ko ye mlaa a nɔ ɔ, lɔ ɔ tsɔɔ we kaa Mawu buu lɛ nɔ nɛ da; nɔ́ nɛ mlaa a tsuɔ ji kaa e haa nɔ leɔ kaa e pee yayami.

Nɔ́ nɛ haa Mawu buu nɔ nɔ nɛ da

21 Jehanɛ lɛɛ blɔ nɔ nɛ Mawu guu kɛ buu nɔ nɔ nɛ da a, e je tsɔɔ wɔ. Pi mlaa sane ji nɛ ɔ. Mose mlaa a, kɛ gbali ɔmɛ ye he odase.

22 ⓡ Ke nɔ ko he Yesu Kristo ye kɛkɛ Mawu bu lɛ nɔ nɛ da. Nihi tsuo nɛ heɔ Kristo yeɔ ɔ, bɔ nɛ a peeɔ haa mɛ ji nɛ ɔ nɛ; slɔɔto ko kulaa be mi.

23 Ejakaa nihi tsuo pee yayami, nɛ Mawu hɛ mi nyami ɔ bɔ mɛ.

24 Se Mawu gu dloomi nɛ e kɛ haa je ɔ yaka a nɔ kɛ wo nihi tsuo nguɔ. E pee enɛ ɔ kɛ gu Kristo Yesu nɛ ha a ye a he ɔ nɔ.

25 Mawu ngɔ Kristo ngɔ ha, konɛ kɛ gu Yesu Kristo gbenɔ ɔ nɔ ɔ, Mawu nɛ ngɔ nihi nɛ he ye ɔ a he yayami kɛ pa mɛ. Mawu pee enɛ ɔ kɛ tsɔɔ kaa dalɔ ji lɛ. Sa a, e to e tsui si ha nimli tsuo, nɛ e ku e hɛ fɔ a he yayami ɔmɛ a nɔ; konɛ jehanɛ ɔ a na kaa nɔ́ nɛ da pɛ e peeɔ; nɛ nɔ tsuaa nɔ nɛ heɔ Yesu yeɔ ɔ, Mawu woɔ lɛ nguɔ.

26

27 Lɛɛ mɛni nɔ wa maa fĩa ngɔ fɔ mɔ? Nɔ́ ko kulaa be kaa ja. Lɛɛ mɛni mɔ? Ní tsumi ngɛ mlaa a nya lo? Dɛbi! Yesu Kristo nɛ wa heɔ yeɔ mohu.

28 Lɔ ɔ he ɔ, wa yɔse kaa hemi kɛ yemi nɔ a guu kɛ woɔ nɔ nguɔ, se pi ní tsumi nɛ a tsu ngɛ mlaa a nya.

29 Anɛ Mawu ɔ, Yuda bi kɛkɛ a Mawu lo? Anɛ pi ma je li ɔmɛ hu a Mawu ji lɛ lo? Ee, ma je li ɔmɛ hu a Mawu ji lɛ.

30 ⓢ Mawu kake lɛ ngɛ kɛ ha Yuda bi, kɛ ma je li tsuo; nɛ hemi kɛ yemi nɔ Mawu guu kɛ woɔ nihi nɛ a po mɛ ɔ nguɔ. Nihi nɛ a pui mɛ ɔ hu hemi kɛ yemi ɔ nɔ nɔuu a maa gu kɛ wo mɛ nguɔ.

31 Lɛɛ waa pɛtɛ hemi ke yemi he, nɛ waa ngmɛɛ mlaa a he lo? Pi ja kulaa! Mohu ɔ, wa gu hemi kɛ yemi nɔ kɛ ngɛ nɔ mi mae kaa mlaa a hi.