Roma Bi 2

Mawu yeɔ dami sane

1 ⓕ Ye nyɛmi, anɛ o kojoɔ nihi, nɛ o buɔ mɛ fɔ lo? Ke o peeɔ ja a, lɛɛ o be nya jemi ko kulaa. Ejakaa ke o kojoɔ ni kpahi, nɛ o buu mɛ fɔ, nɛ mo hu o peeɔ jamɛ a ní ɔmɛ nɔuu ɔ, na nɛ o le kaa mo nitsɛ o he fɔ o ngɛ bue ɔ nɛ.

2 Wa le kaa Mawu buɔ nihi nɛ tsuɔ jamɛ a ní ɔmɛ bɔ nɛ fɔ ɔ le da pɛpɛɛpɛ.

3 Se mo ye nyɛmi nɛ o kojoɔ nihi nɛ tsuɔ jamɛ a ní ɔmɛ, nɛ́ mo hu o peeɔ ja nɔuu ɔ, anɛ o susuu kaa o maa ye o he, nɛ Mawu be mo kojoe lo?

4 O bui nɔ́! Mɛni he je ɔ, Mawu mi mi jɔ, e naa nɔ he tsui, nɛ e toɔ e tsui si. Blɔɔ o li kaa Mawu mi mi jɔ ha mo konɛ o tsake o tsui lo?

5 Se akɛnɛ o kplii o tsui, nɛ o pia we o he ɔ, kojomi ligbi ɔ nɛ Mawu mi mi ma fu, nɛ e maa kojo kɛ dami sane yemi ɔ, o tue gblami ɔ maa pe nine.

6 ⓖ Ejakaa Mawu maa wo nɔ tsuaa nɔ hiɔ bɔ nɛ sa lɛ ngɛ e ní tsumi ɔ nya.

7 Nihi nɛ toɔ a tsui si kɛ peeɔ kpakpa daa, nɛ a kɛ hlaa hɛ mi nyami, kɛ bu ha a he konɛ a ko gbo ɔ, Mawu ma ha mɛ neneene wami.

8 Se ni nɛmɛ nɛ mɛɛ lɛɛ mɛ nitsɛmɛ a nɔ mi pɛ a foɔ, nɛ a bui anɔkuale, nɛ nɔ́ yayami se pɛ a dii ɔ, Mawu kɛ mi mi la, kɛ mi mi fumi ma kple a nɔ.

9 Mawu ma ha nɛ haomi, kɛ nɔ́ nami maa ba yayami peeli tsuo a nɔ, Yuda bi kekle, kɛ ma je li hulɔ.

10 Se ni nɛmɛ nɛ peeɔ nɔ́ kpakpa a, Mawu maa wo a hɛ mi nyami; bu maa ba a he, nɛ e ma ha mɛ he jɔmi, Yuda bi kekle, kɛ jehanɛ ɔ, ma je li hulɔ.

11 ⓗ Ejakaa Mawu hyɛ we nɔ hɛ mi.

12 Nihi abɔ nɛ mlaa a kpakaa we mɛ, nɛ a peeɔ yayami ɔ, a hɛ mi kpataa kaa nihi nɛ mlaa a kpakaa we mɛ; nɛ nihi abɔ nɛ guu mlaa a nɔ peeɔ yayami ɔ, mlaa a nɔuu nɔ a daa kɛ kojoɔ mɛ.

13 Ejakaa pi nihi nɛ le mlaa a nɛ a buu nihi nɛ da ngɛ Mawu hɛ mi, se mohu nihi nɛ yeɔ mlaa a nɔ, mɛ a maa wo nguɔ.

14 Ke ma je li ɔmɛ nɛ yi Mose mlaa a nɔ ngɛ a fɔmi su ɔ nya a tsuɔ mlaa a nya ní ɔ, a peeɔ mlaa ha mɛ nitsɛmɛ a he; pohu mlaa ko yi a nɔ.

15 A ní peepee tsɔɔ kaa nɔ́ nɛ mlaa a ngɛ hlae kaa a pee ɔ, Mawu ngɔ wo a tsui mi momo; nɛ a he nile hu yeɔ enɛ ɔ he odase. Ejakaa be komɛ ɔ, a susumi deɔ mɛ ke nɔ́ nɛ a ngɛ pee ɔ dɛ, nɛ be komɛ hu e deɔ mɛ ke e da.

16 Sane kpakpa a nɛ i ngɛ fiɛe ɔ ngɛ tsɔɔe kaa ligbi ɔ nɛ Mawu maa gu Yesu Kristo nɔ ba kojo nihi tsuo ngɛ a laami mi sanehi a he ɔ, kikɛ nɛ ɔ níhi maa ba.

Yuda bi kɛ mlaa a

17 Nyɛɛ lɛɛ kɛ nyɛ sane ngɛ kɛɛ? Nyɛ tsɛɔ nyɛ he Yuda bi, nɛ nyɛ daa mlaa a nɔ kɛ fĩaa kaa Mawu nihi ji nyɛ.

18 Nyɛ le nɔ́ nɛ Mawu suɔ kaa nyɛɛ pee, nɛ a gu mlaa a nɔ tsɔɔ nyɛ nɛ nyɛ le nɔ́ nɛ hi.

19 Nyɛ buu nyɛ he nihi nɛ tsɔɔ hɛ yuyuili blɔ, aloo la kɛ ha nihi nɛ ngɛ diblii mi.

20 Nyɛɛ buu nyɛ he kuasiahi a tsɔseli, kɛ nihi nɛ li nɔ́ ko ɔ a ní tsɔɔli; ejakaa nyɛ le kaa niinɛ, nile kɛ anɔkuale tsuo ngɛ mlaa a mi.

21 Nyɛ nɛ nyɛ tsɔɔ ni kpahi ní ɔ, mɛni he je nyɛ tsɔɔ we nyɛ nitsɛmɛ nyɛ he ní mɔ? Nyɛ fiɛɔ ke a ko ju; se tse nyɛ juɔ?

22 Nyɛ deɔ ke a ko puɛ gba; se nyɛ puɛ we gba lo? Amagahi a he peeɔ nyɛ tai, se tse nyɛ ya juɔ ngɛ wɔ piɛhi a mi?

23 Nyɛ fĩaa ke nyɛ le mlaa a, se tse nyɛ tɔɔ mlaa a kɛ pueɔ Mawu hɛ mi si?

24 ⓘ Kaa bɔ nɛ ngmami ɔ deɔ ɔ, “Nyɛ Yuda bi nyɛ he ɔ, ma je li ɔmɛ tuɔ musu bɔmi munyuhi kɛ siɔ Mawu.”

25 Nyɛ yeɔ mlaa a nɔ jinɛ pomi nɛ a po nyɛ ɔ, se nami ngɛ he. Se nyɛ yi nɔ; lɔ ɔ he ɔ, nyɛ ngɛ kaa ni nɛmɛ nɛ a pui mɛ ɔ.

26 Ke ma je no nɛ a pui lɛ ɔ yeɔ mlaa a nɔ ɔ, anɛ Mawu be lɛ bue kaa nɔ ko nɛ a po lɛ lo?

27 Lɔ ɔ he ɔ, nyɛ Yuda bi, ma je li ɔmɛ maa kojo nyɛ, ejakaa nyɛ nɛ a ngma mlaa a ngɔ ha, nɛ́ mlaa a nya a poɔ nyɛ ɔ, nyɛ tɔɔ mlaa a. Se mɛɛ lɛɛ a yeɔ mlaa a nɔ, pohu a pui mɛ.

28 Lɛɛ mɛnɔ ji Yuda no nitsɛnitsɛ mɔ? Pi okadi nɛ a to ngɛ nɔ he lo mi kaa nɔ pomi kikɛ nɛ ɔ nɛ peeɔ nɔ Yuda no.

29 ⓙ Mohu ɔ, Yuda no nitsɛnitsɛ peemi ɔ ngɛ nɔ ɔ nitsɛ e mi, nɛ nɔ pomi ɔ hu ngɛ e tsui mi. Mawu mumi ɔ pɛ lɛ tsuɔ enɛ ɔ, pi mlaa nɛ a ngma a. Kikɛmɛ a nɔmlɔ nɛ ɔ, Mawu nitsɛ lɛ jeɔ e yi, pi nɔmlɔ adesa.