Roma Bi 15

Waa pee níhi nɛ maa sa wa nyɛmimɛ a hɛ mi

1 Wɔ nihi nɛ wa hemi kɛ yemi mi wa a, e sa kaa waa ye bua ni nɛmɛ nɛ a hemi kɛ yemi mi wɛ ɔ. Wa ko susu wɔ nitsɛmɛ pɛ wa he.

2 Mohu ɔ, wa ti nɔ tsuaa nɔ nɛ pee nɔ́ nɛ hi nɛ maa sa e nyɛmi hɛ mi, konɛ e nyɛmi ɔ nɛ na hemi kɛ yemi nɛ pi si.

3 ⓗ Ejakaa Kristo hu pee we lɛ nitsɛ e suɔmi nya ní; se mohu ngmami ɔ ke, “Níhi nɛ a de kɛ bɔ mo ahlua a, imi mohu ye hɛ mi si a pue.”

4 Nɔ́ tsuaa nɔ́ nɛ ngɛ ngmami ɔmɛ a mi ɔ, a ngma konɛ a kɛ tsɔɔ wɔ ní. Kɛkɛ ɔ, ngmami ɔmɛ ma ha wa maa to wa tsui si; nɛ a maa wo wɔ he wami nɛ wa na hɛ kɛ nɔ fɔmi.

5 Mawu ɔ nɛ haa nɔ toɔ e tsui si, nɛ e woɔ nɔ he wami nɛ ha nɛ nyɛ wo Kristo Yesu nane, nɛ nyɛɛ kɛ nyɛ sibi nɛ hi si saminya.

6 Kɛkɛ ɔ, nyɛ tsuo nyɛ maa pee kake, nɛ nyɛɛ kɛ gbi kake nɛ wo Mawu, wa Nyɔmtsɛ Yesu Kristo Tsɛ ɔ hɛ mi nyami.

A ya fiɛ sane kpakpa a ha ma je li ɔmɛ hulɔ

7 Lɔ ɔ he ɔ, nyɛ he nyɛ sibi atuu kaa bɔ nɛ Kristo hu he nyɛ atuu ɔ. Nyɛɛ pee enɛ ɔ, nɛ nyɛ kɛ wo Mawu hɛ mi nyami.

8 Ejakaa i ngɛ nyɛ dee ke Kristo ba sɔmɔ Yuda bi ɔmɛ nɛ e kɛ tsɔɔ mɛ kaa Mawu yeɔ anɔkuale, nɛ e kɛ ma si nɛ Mawu wo a nɛmɛ ɔmɛ ɔ nɔ mi.

9 ⓘ E pee ja, konɛ ma je li ɔmɛ tete nɛ a wo Mawu hɛ mi nyami, ejakaa e na mɛ hu mɔbɔ. Kaa bɔ nɛ ngmami ɔ deɔ ɔ, “Enɛ ɔ he ɔ, ma je o yi ngɛ ma je li ɔmɛ a kpɛti, Nɛ ma wo o biɛ ta kɛ la.”

10 ⓙ Ngmami ɔ kpale deɔ ke, “Nyɛ ma je li, nyɛɛ kɛ Mawu ma a nɛ nya.”

11 ⓚ Jehanɛ, e deɔ ekohu ke, “Nyɛ ma je li tsuo, nyɛ je Nyɔmtsɛ ɔ yi; Je mahi tsuo, nyɛ je e yi wawɛɛ!”

12 ⓛ Yesaya hu de ke, “Ishai nina ko maa ba; E maa te si nɛ e ba ye ma je li ɔmɛ a nɔ, Nɛ ma je li ɔmɛ maa ngɔ a hɛ ngɔ fɔ e nɔ.”

13 Mawu, nɔ nɛ haa nihi tsuo hɛ kɛ nɔ fɔmi ɔ, e ha nyɛ hyi tɔ kɛ bua jɔmi, kɛ he jɔmi tsuo ngɛ nyɛ hemi kɛ yemi ɔ nya, konɛ Mumi Klɔuklɔu ɔ nɛ wo nyɛ he wami, nɛ nyɛɛ ngɔ nyɛ hɛ kɛ fɔ Mawu nɔ daa.

Paulo tsɔɔ nɔ́ he je nɛ e ngma womi kaa kikɛ nɛ ɔ

14 Ye nyɛmimɛ, imi nitsɛ i le tsɔ kaa nyɛ nitsɛmɛ tete nyɛ mi mi hi; nyɛ le ní bɔ nɛ sa, nɛ nyɛ nyɛɔ woɔ nyɛ sibi ga.

15 Se kɛ̃, i ngma womi nɛ ɔ kɛ ngɛ ní nɛ ɔmɛ ekomɛ a nɔ ta woe kaa a he hia. I kɛ hɛdɔ ngɛ ní nɛ ɔmɛ ngmae kɛ kai nyɛ kaa Mawu dloomi ɔ nya a,

16 i ba pee Kristo Yesu tsɔlɔ nɛ ma tsu ma je li ɔmɛ a he ní. Ma tsu ní kaa osɔfo kɛ fiɛ sane kpakpa a nɛ je Mawu ngɔ ɔ, konɛ Mumi Klɔuklɔu ɔ nɛ tsu ma je li ɔmɛ a he, nɛ a pee kaa bɔ nɛ a sã, nɛ maa sa Mawu hɛ mi.

17 Lɔ ɔ he ɔ, ma nyɛ ma fĩa ngɛ Kristo Yesu mi kaa i ngɛ Mawu ní tsue.

18 Ejakaa i be nɔ́ kpa ko he munyu nyɛe ma tu pe kaa Kristo gu ye munyu tumi, kɛ ní tsumi nɔ nɛ e ha ma je li ɔmɛ ba le Mawu.

19 Okadihi, kɛ nyakpɛ níhi nɛ i pee ɔ, Mumi Klɔuklɔu ɔ lɛ tsu enɛ ɔmɛ tsuo. Lɔ ɔ he ɔ, ye sikpa a tsuo, kɛ je Yerusalem hluu kɛ ya su Ilirikum ɔ, sane kpakpa a nɛ kɔɔ Kristo he ɔ sɔuu i fiɛ.

20 Nɔ́ pɔtɛɛ nɛ i kɛ ma ye hɛ mi ji kaa he nɛ a fiɛ we sane kpakpa a nɛ kɔɔ Kristo he ɔ ngɛ lolo ɔ, ma ya fiɛ ngɛ lejɛ ɔ. Kɛkɛ ɔ, nihi be dee ke i ngɛ tsu fiae kɛ ngɛ nɔ kpa sisi tomi nɔ mae.

21 ⓜ Kaa bɔ nɛ ngmami ɔ deɔ ɔ, “Nihi nɛ a jaje we e he sane ko kɛ tsɔɔ we mɛ hyɛ ɔ maa na lɛ; Nɛ nihi nɛ nui e he hyɛ ɔ maa nu sisi.”

Paulo to kaa e maa ya Roma

22 ⓝ I ka si abɔ kaa ma ba nyɛ ngɔ, se enɛ ɔ he ɔ, i nyɛ we.

23 Se amlɔ nɛ ɔ nɛ i be nɔ́ ko peemi ngɛ hiɛ ɔ ni ɔmɛ a mi hu nɛ ɔ, ma ba su nyɛ ngɔ kaa bɔ nɛ i hla nɛ ma pee be babauu ji nɛ ɔ.

24 I heɔ yeɔ kaa ke kaa ma be kɛ ya Spania, ma ba gba nyɛ ngɔ nɛ i kɛ nyɛ nɛ hi si be bɔɔ, konɛ lɔ ɔ se ɔ, nyɛ ya je mi blɔ kɛ ho.

25 ⓞ Amlɔ nɛ ɔ lɛɛ i pue nɔ kɛ yaa Yerusalem nɛ ma ngɔ nike ní kɛ ya ha ni klɔuklɔu ɔmɛ nɛ ngɛ lejɛ ɔ.

26 Ejakaa nyɛmimɛ ɔmɛ nɛ ngɛ Makedonia, kɛ Akaya a kɛ bua jɔmi bua nɔ́ ko nya nɛ a kɛ ya ye bua ohiatsɛmɛ nɛ ngɛ ni klɔuklɔu ɔmɛ a kpɛti ngɛ Yerusalem ɔ.

27 ⓟ Mɛ nitsɛmɛ lɛ a to kaa a maa pee enɛ ɔ lɛɛ, se anɔkuale mi ɔ, a blɔ nya ní tsumi ji kaa a ye bua mɛ. Mumi mi nike ní nɛ Mawu ha Yuda bi ɔmɛ ɔ, a kɛ ma je li ɔmɛ nɛ dla; enɛ ɔ he ɔ, e sa kaa ma je li ɔmɛ hu, he lo mi ní kpakpahi nɛ Mawu ke mɛ ɔ, a kɛ eko nɛ sɔmɔ Yuda bi ɔmɛ.

28 Ke i ngɔ nike ní tsuo nɛ a bua nya a ya su mɛ ɔ, ma pue blɔ kɛ ba gu nyɛ ngɔ kɛ ho Spania ya.

29 I le kaa ke i ba nyɛ ngɔ ɔ, Kristo maa gbaa nyɛ babauu.

30 Ye nyɛmimɛ, i ngɔ Nyɔmtsɛ Yesu Kristo, kɛ suɔmi nɛ Mumi Klɔuklɔu ɔ haa nɔ ɔ kɛ ngɛ nyɛ pɛɛ kpae nɛ nyɛɛ piɛ ye he kɛ sɔle wawɛɛ nɛ Mawu nɛ ye bua mi.

31 Nyɛɛ sɔle konɛ nihi nɛ ngɛ Yudea nɛ he we Mawu yi ɔ nɛ a ko doo ye nya, nɛ jehanɛ hu, ní nɛ i yaa tsu ngɛ Yerusalem ɔ nɛ sa ni klɔuklɔu ɔmɛ a hɛ mi.

32 Kɛkɛ ɔ, ke Mawu suɔ ɔ, i kɛ bua jɔmi maa ba nyɛ ngɔ nɛ ma ba jɔɔ ye he bɔɔ.

33 He jɔmi Mawu ɔ kɛ nyɛ tsuo nɛ hi si. Amen!