Roma Bi 14

Koo kojo o nyɛmi Kristo se nyɛɛlɔ

1 ⓔ Nɔ ko nɛ hemi kɛ yemi mi wɛ ɔ, nyɛɛ kɛ lɛ ko sã nya ngɛ nɔ́ nɛ e susuɔ kaa e sa nɛ e pee, kɛ nɔ́ nɛ e ko pee he. Se mohu nyɛ he lɛ atuu kɛ ba nyɛ kpɛti.

2 Nɔ nɛ heɔ yeɔ ɔ, e yeɔ nɔ́ tsuaa nɔ́; se nɔ nɛ hemi kɛ yemi mi wɛ ɔ, lɛɛ pui pɛ e yeɔ.

3 Nɔ nɛ yeɔ nɔ́ tsuaa nɔ́ ɔ, e ko gbe nɔ nɛ yi ɔ he guɛ; nɛ nɔ nɛ yeɔ pui pɛ ɔ, e ko kojo nɔ nɛ yeɔ nɔ́ tsuaa nɔ́ ɔ, ejakaa Mawu he lɛ momo.

4 Mɛnɔ ji mo nɛ o kojoɔ nɔ kpa tsɔlɔ? Ke tsɔlɔ nɛ ɔ maa ya nɔ, loo e maa gbee si ɔ, lɛ nitsɛ e nyɔmtsɛ ɔ lɛ maa na. Ee, Nyɔmtsɛ ɔ ma ha nɛ e ya nɔ, ejakaa Nyɔmtsɛ ɔ ngɛ he wami nɛ haa nɔ yaa nɔ saminya.

5 E peeɔ ni komɛ kaa ligbi ɔmɛ ekomɛ a he hia pe ekomɛ, be mi nɛ ni komɛ susuɔ kaa ligbi ɔmɛ tsuo sɔ. Nɔ tsuaa nɔ nɛ pee e juɛmi ngɛ nɔ́ nɛ ɔ he.

6 Nɔ nɛ susuɔ kaa ligbi komɛ a he hia pe ekomɛ ɔ, Nyɔmtsɛ ɔ hɛ mi nyami e ngɛ woe; nɛ nɔ nɛ yeɔ nɔ saisaa a, lɛ hu e ngɛ Nyɔmtsɛ ɔ hɛ mi nyami woe, ejakaa e naa Mawu si ngɛ he. Nɔ nɛ yi nɔ́ saisaa a, lɛ hu e kɛ woɔ Nyɔmtsɛ ɔ hɛ mi nyami, nɛ lɛ hu e naa Mawu si.

7 Wa ti nɔ ko nɔ ko hɛ ka we kɛ ha lɛ nitsɛ e he, nɛ́ nɔ ko ma gbo ha lɛ nitsɛ e he.

8 Ke wa hɛ ngɛ ɔ, Nyɔmtsɛ wa hɛ ngɛ kɛ ha, nɛ ke wa gbo hu Nyɔmtsɛ ɔ wa gbo kɛ ha. Lɔ ɔ he ɔ, wa hɛ ngɛ jio, wa gbo jio, Nyɔmtsɛ ɔ nihi ji wɔ.

9 Ejakaa Kristo gbo, nɛ e kpale ba wami mi ekohu, konɛ e pee Nyɔmtsɛ kɛ ha ni nɛmɛ nɛ a hɛ ngɛ, kɛ ni nɛmɛ nɛ gbo ɔ tsuo.

10 ⓕ Lɛɛ mɛni he je moo o kojoɔ o nyɛmi? Aloo pohu mɛni he je nɛ o gbeɔ o nyɛmi he guɛ ɔ? Mawu hɛ mi wɔ tsuo wa maa da si ngɛ nɛ e maa kojo wɔ.

11 ⓖ Ejakaa ngmami ɔ deɔ ke, “Nyɔmtsɛ ɔ ngɛ kita kae ke Nɔ tsuaa nɔ ma kpla si ha mi Nɛ nɔ tsuaa nɔ ma gba mi ma de paa ke imi ji Mawu.”

12 Lɛɛ wa ti nɔ tsuaa nɔ maa bu lɛ nitsɛ e he akɔtaa ngɛ Mawu hɛ mi.

Ko ha nɛ o nyɛmi Kristo se nyɛɛlɔ nɛ pee yayami

13 Lɔ ɔ he ɔ, nyɛ ha wa kpa wa sibi kojomi; se mohu nyɛ pee saminya nɛ nɔ ko ko pee nɔ́ ko nɛ ma ha o nyɛmi nane ma kpata, aloo nɛ ma ha e pee yayami.

14 Nɛ i ngɛ Kristo mi ɔ, i kpá si, nɛ i le kaa niye ní ko niye ní ko be nɛ he tsɔ we. Se ke nɔ ko buu niye ní ko kaa e he tsɔ we ɔ, lɛ nɛ niye ní ɔ he tsɔ we ha.

15 Ke o ye niye ní ko, nɛ lɔ ɔ kɛ haomi ba o nyɛmi nɔ ɔ, lɛɛ o sume o nyɛmi ɔ. Ko ha ní nɛ o maa ye ɔ nɛ kpata o nyɛmi nɛ Kristo gbo ngɛ e he ɔ hɛ mi.

16 Nɔ́ ko nɛ nyɛ buu nɔ́ kpakpa a, nyɛ ko ha nɛ a tu he munyu yaya.

17 Ejakaa Mawu matsɛ yemi ɔ, pi nɔ́ nɛ a maa ye, loo nɔ́ nɛ a maa nu; se mohu kaa a pee nɔ́ nɛ da, nɛ a hi si ngɛ he jɔmi mi, nɛ a na bua jɔmi. Mumi Klɔuklɔu ɔ lɛ haa ní nɛ ɔmɛ tsuo.

18 Ke nɔ ko ngɛ Kristo sɔmɔe ngɛ kikɛmɛ a blɔ nɛ ɔ nɔ ɔ, e ngɛ Mawu suɔmi nya ní pee, nɛ e saa nimli adesahi hu a hɛ mi.

19 Lɔ ɔ he ɔ, nyɛ ha waa di níhi nɛ kɛ he jɔɔmi baa, nɛ waa kɛ maa wo wa sibi he wami ɔ a se daa.

20 Ko ya di niye ní se, nɛ o kpata nɔ́ ko nɛ Mawu pee hɛ mi. Nɔ́ tsuaa nɔ́ nɛ a yeɔ ɔ, e he tsɔ. Se nɔ́ ko nɛ o maa ye, nɛ ma ha o nyɛmi maa pee yayami ɔ, e sɛ kaa o ye.

21 Lɔ ɔ he ɔ, e hi kaa o ko ye lo, nɛ o ko nu wai, nɛ jehanɛ hu, o ko pee nɔ́ ko nɛ ma ha o nyɛmi nane ma kpata.[2]

22 Bɔ nɛ o heɔ yeɔ ngɛ munyu nɛ ɔ he ɔ, e pee o kɛ Mawu nyɛ kpɛti sane. Ke nɔ ko pee nɔ́ ko nɛ lɛ nitsɛ e le kaa nɔ́ nɛ e pee ɔ da, nɛ e he nile hu bui lɛ fɔ ngɛ he ɔ, e naa bua jɔmi saminya.

23 Se ke e yi mi peeɔ lɛ enyɔɔnyɔ ngɛ niye ní ko he nɛ e ye ɔ, Mawu maa bu lɛ fɔ, ejakaa e be hemi kɛ yemi; nɛ nɔ́ ko nɛ o peeɔ nɛ hemi kɛ yemi be mi ɔ, e ji yayami.