Ni Tsumi 9

Saulo tsake e tsui

(<x>510 22:6-16</x>; <x>510 26:12-18</x>)

1 Be nɛ ɔ mi tsuo ɔ, Saulo ya nɔ nɛ e wa Nyɔmtsɛ ɔ se nyɛɛli ɔmɛ yi mi; e woɔ a he gbeye wawɛɛ kaa e ma pue a muɔ si. E ya osɔfo nɔkɔtɔma pe kulaa a ngɔ,

2 nɛ e ya bi nɛ a ha lɛ womi nɛ e kɛ ya Damasko kpe he ɔmɛ, konɛ ke e na Nyɔmtsɛ ɔ se nyɛɛli komɛ ngɛ lejɛ ɔ, nyumuhi jio, yihi jio, e nuu mɛ kɛ ba Yerusalem.

3 Benɛ Saulo nyɛɛ blɔ ɔ nɔ kɛ yaa, nɛ e su Damasko haa a, tlukaa a, la ko kpɛ kɛ je hiɔwe kɛ ba bɔle lɛ.

4 Saulo tsɔ fia si, nɛ e nu gbi ko nɛ ngɛ lɛ bie ke, “Saulo, Saulo, mɛni he je o ngɛ mi yi mi wae?”

5 Saulo bi ke, “Nyɔmtsɛ, mo mɛnɔ?” Gbi ɔ de lɛ ke “Imi ji Yesu, nɔ nɛ o ngɛ lɛ yi mi wae ɔ nɛ!

6 Tee si ngɛ zugba, nɛ o ya ma a mi, nɛ a maa tsɔɔ mo nɔ́ nɛ sa kaa o pee!”

7 Nihi nɛ Saulo kɛ mɛ nyɛɛ ɔ tɔ mu kɛ daa si; a nu gbi ɔ mohu, se a nɛ́ nɔ ko nɔ ko.

8 Saulo te si, nɛ e bli e hɛngmɛ, se e hyɛ we nɔ́. Lɔ ɔ he ɔ, a nu e nine si kɛ ya Damasko.

9 E hyɛ we nɔ ligbi etɛ sɔuu; nɛ e yi ní, nɛ e nui nɔ́ ko hulɔ.

10 Jamɛ a be ɔ, Yesu se nyɛɛlɔ ko nɛ a tsɛɛ lɛ Anania ngɛ Damasko. Nyɔmtsɛ ɔ kɛ lɛ tu munyu ngɛ nina mi, nɛ e de ke, “Anania!” Anania he nɔ ke, “Nyɔmtsɛ, ne mi!”

11 Nyɔmtsɛ ɔ de lɛ ke, “Dla o he nɛ o ya Yuda we ɔ mi ngɛ he nɛ gbɛjegbɛ nɛ a tsɛɛ Tlɔmɔɔ ɔ ngɛ ɔ. Ke o su lejɛ ɔ, bi nyumu ko nɛ a tsɛɛ Saulo nɛ je Tarso ɔ si. E ngɛ sɔlee,

12 nɛ a je tsɔɔ lɛ kaa nyumu ko nɛ a tsɛɛ lɛ Anania a ma e ngɔ nɛ e kɛ e nine ba pue e nɔ konɛ e hyɛ nɔ́ ekohu.”

13 Se Anania he nɔ ke, “Nyɔmtsɛ, nihi fuu tu kikɛmɛ a nyumu nɛ ɔ he munyu yaya. A tsɔɔ kaa Mawu bimɛ ɔmɛ nɛ ngɛ Yerusalem ɔ, e ha nɛ a na amanehlu babauu nitsɛnitsɛ.

14 Hiɛ ɔ nɛ e ba nɛ ɔ hu, he wami e ya bi kɛ je osɔfo nikɔtɔma amɛ a ngɔ, konɛ e ba nuu nihi tsuo nɛ jaa mo ɔ.”

15 Nyɔmtsɛ ɔ de lɛ ke, “Yaa, ejakaa nɔ nɛ ɔ, imi nɛ i hla lɛ nɛ e sɔmɔ mi, nɛ e ya fiɛ ye he sane ha ma je li, matsɛmɛ, kɛ Israel ma a tsuo.

16 Ejakaa ma tsɔɔ lɛ bɔ nɛ e ma gbo dengme wawɛɛ ngɛ ye biɛ ɔ he.”

17 Lɔ ɔ he ɔ, Anania pue nɔ kɛ ho we mi he nɛ Saulo ngɛ ɔ ya. E kɛ e nine ya pue e nɔ, nɛ e de lɛ ke, “Ye nyɛmi Saulo, Nyɔmtsɛ ɔ tsɔ mi o ngɔ. Lɛ ji Yesu nɛ je e he kpo tsɔɔ mo benɛ o ma ngɛ blɔ ɔ nɔ ɔ nɛ. E tsɔ mi, konɛ ma ba ha nɛ o hyɛ nɔ́ ekohu, nɛ́ o na Mumi Klɔuklɔu ɔ.”

18 Amlɔ nɔuu ɔ, ní komɛ kaa lo toto je Saulo hɛngmɛ ɔmɛ a nɔ pue si, nɛ e bɔni nɔ́ hyɛmi ekohu. E te si, nɛ a sɔle lɛ.

19 Benɛ e ye ní ɔ, e na he wami. Saulo kɛ Yesu se nyɛɛli ɔmɛ nɛ ngɛ Damasko ɔ hi si ligbi bɔɔ ko.

Saulo fiɛ sane kpakpa a ngɛ Damasko

20 E bɔni fiɛmi jamɛ a be ɔ nɔuu ngɛ kpe he ɔmɛ ke Yesu ji Mawu Bi ɔ nɛ.

21 Nihi tsuo nɛ nu nɛ e ngɛ fiɛe ɔ, a nya kpɛ a he, nɛ a de ke, “Anɛ pi nyumu nɛ ɔ nɛ gbe Yesu se nyɛɛli basabasa ngɛ Yerusalem ɔ? Hiɛ ɔ tete nɛ e ba nɛ ɔ, anɛ pi jamɛ a nyɛɛmi ɔ nɔuu nɔ nɛ e ngɛ, konɛ e ba nuu mɛ nɛ e ngɔ mɛ kɛ ya ha osɔfo nikɔtɔma amɛ lo?”

22 Se Saulo ya nɔ nɛ e fiɛ kɛ he wami pe kekle ɔ po kɛ tsɔɔ kaa Yesu ji Kristo ɔ nɛ. Enɛ ɔ ha Yuda bi nɛ ngɛ Yerusalem ɔ a nya mi jɔ.

23 ⓛ Be saii se ɔ, Yuda bi ɔmɛ ya so Saulo yi nɔ kaa a maa gbe lɛ.

24 Se Saulo nu a somi ɔ he. Daa nyɔ kɛ pia a, nihi ngɛ ma agbo ɔmɛ a nya bue, konɛ a gbe lɛ.

25 Se Saulo we bi ɔmɛ ngɔ lɛ kɛ wo kusii mi nyɔ mi, nɛ a siu lɛ kɛ gu gbogbo nɛ a fia kɛ wo ma a he ɔ puɔ mi kɛ ya ma si ngɛ e se.

Saulo ngɛ Yerusalem

26 Benɛ Saulo ba Yerusalem ɔ, e hla kaa e kɛ e he maa bɔ kaseli ɔmɛ a he, se mɛ tsuo a ye lɛ gbeye kaa a kɛ lɛ maa bɔ; ejakaa a he we yi kaa e tsake pee Yesu se nyɛɛlɔ.

27 Se Barnaba ngɔ lɛ kɛ ya bɔfo ɔmɛ a ngɔ, nɛ e ya sɛɛ nɔ́ nɛ ba a ha mɛ. E de mɛ bɔ nɛ Saulo na Nyɔmtsɛ ɔ ngɛ Damasko blɔ ɔ nɔ nɛ e kɛ lɛ tu munyu, kɛ bɔ nɛ pee nɛ e na he wami ngɛ Yesu biɛ mi.

28 Saulo kɛ mɛ hi si, nɛ e kɛ he wami fiɛ sane kpakpa a kɛ kpa Yerusalem tsuo.

29 Ke pee ɔ, e kɛ Helene bi hu hlaa níhi a mi, nɛ a sãã nya; se mɛɛ lɛɛ a hla kaa a maa gbe lɛ.

30 Benɛ nyɛmimɛ ɔmɛ nu he ɔ, a kɛ Saulo ya Kaisarea, nɛ a wo lɛ blɔ kɛ ho Tarso ya.

31 Bɔ nɛ pee nɛ asafo ɔmɛ nɛ ngɛ Yudea, Galilea, kɛ Samaria tsuo na tue mi jɔmi ji nɛ ɔ nɛ. Nyɔmtsɛ ɔ gbeye yemi ngɛ asafo ɔmɛ a mi. Enɛ ɔ he je ɔ, Mumi Klɔuklɔu ɔ wo asafo ɔmɛ he wami, nɛ a ya nɔ, nɛ nihi babauu ba piɛ a he.

Petro ngɛ Lida kɛ Yopa

32 Petro ya kpa si kɛ slaa asafo ɔmɛ ngɛ he tsuaa he kɛ ya si e ba su ni klɔuklɔu nɛ ngɛ Lida a hu a ngɔ.

33 E ba na nyumu ko ngɛ lejɛ ɔ nɛ a tsɛɛ lɛ Aenea. Nyumu nɛ ɔ hule pue si jeha kpaanyɔ sɔuu nɛ e nyɛɛ we.

34 Kɛkɛ nɛ Petro de lɛ ke, “Aenea, Yesu Kristo tsa mo; tee si nɛ o hluɛ o sa a!” Aenea te si amlɔ.

35 Nihi tsuo nɛ ngɛ Lida, kɛ Saron ɔ na lɛ, nɛ a ngɔ a he kɛ ba ha Nyɔmtsɛ ɔ.

36 Yo ko hu ngɛ Yopa nɛ ji Yesu se nyɛɛlɔ. A tsɛɛ lɛ Tabita, aloo ngɛ Hela gbi mi ɔ, Dorka. Biɛ nɛ ɔ sisi ji Odabɔ. Daa nɛ ɔ, kpakpa sɔuu e peeɔ, titli ɔ, e hyɛɔ dɛgutsɛmɛ a nɔ.

37 Yo nɛ ɔ ba nu hiɔ, nɛ e gbo. A du ha lɛ, nɛ a kɛ lɛ ya fɔ sa nɔ ngɛ hiɔwe tsu ko mi.

38 Yopa kɛ Lida kɛ we. Lɔ ɔ he ɔ, benɛ Yesu se nyɛɛli nɛ ngɛ Yopa a nu kaa Petro ngɛ Lida a, a tsɔ ni enyɔ kɛ ya de lɛ ke, “Wa kpa mo pɛɛ nɛ o ba su wa ngɔ nɔuu; koo to tsle.”

39 Petro dla nɛ e kɛ mɛ pue nɔ kɛ ho nɔuu. Benɛ e su lejɛ ɔ, a kɛ lɛ ya hiɔwe tsu ɔ mi. Yalɔyihi babauu ba pue e nɔ kɛ ya. A kɛ yi nɔ tadehi, kɛ tade kpahi nɛ Dorka kpɛ benɛ e ngɛ je mi ɔ tsɔɔ lɛ.

40 Se Petro je mɛ kpo. Kɛkɛ nɛ e kpla si nɛ e sɔle; nɛ e plɛ e hɛ mi ngɔ kpee gbogboe ɔ, nɛ e de ke, “Tabita, tee si!” Tabita bli e hɛngmɛ; nɛ benɛ e na Petro ɔ, e wo e he nɔ, nɛ e hi si.

41 Petro nu e nine si, nɛ e wo e nɔ da si. Jehanɛ e tsɛ ni klɔuklɔu ɔmɛ, kɛ a kpɛti yalɔyi ɔmɛ tsuo kɛ ba. E kɛ Dorka ba da a hɛ mi hɛ ngmengmle.

42 Sane nɛ ɔ gbɛ fia Yopa tsuo; nɛ nihi babauu he Nyɔmtsɛ ɔ ye.

43 Petro hi Yopa be saii ngɛ lohwe he womi tsopa wolɔ ko nɛ a tsɛɛ lɛ Simon ngɔ.