Ni Tsumi 8

1 Stefano gbemi ɔ ngɔ Saulo nya. Jamɛ a ligbi ɔ nɔuu ɔ, a bɔni asafo ɔ nɛ ngɛ Yerusalem ɔ yi mi wami wawɛɛ. Nihi nɛ he ye ɔ tsuo gbɛ fĩa Yudea, kɛ Samaria kpokpa amɛ a nɔ; nɛ e piɛ bɔfo ɔmɛ pɛ.

Saulo wa asafo ɔ yi mi

2 Nyumuhi Mawu gbeye yeli komɛ ya dla Stefano gbogboe ɔ, nɛ a nyɛ ya ha lɛ kɛ awe nyami.

3 ⓙ Se Saulo lɛɛ e ka kaa e ma kpata asafo ɔ hɛ mi. E yaa wehi a mi, nɛ e ya nuɔ nyumuhi kɛ yihi, nɛ e ya woɔ mɛ tsu.

A fiɛ sane kpakpa a ngɛ Samaria

4 Nihi nɛ gbɛ fĩa a ya kpa si nɛ a fiɛ sane kpakpa a.

5 Filipo ya Samaria ma nguaa amɛ eko mi, nɛ e ya fiɛ Kristo he sane ɔ ngɔ tsɔɔ mɛ.

6 Benɛ nimli babauu ɔ bu Filipo tue, nɛ a na okadihi nɛ e pee ɔ, mɛ tsuo a ngɔ e munyu ɔ.

7 Nihi fuu nɛ mumi yayamihi ngɛ a mi ɔ, mumi ɔmɛ kpa ngmlaa wawɛɛ kɛ je a mi. A tsa nihi nɛ hule pue si, kɛ glɔtsɛmɛ babauu.

8 Lɔ ɔ he ɔ, bua jɔmi babauu ba ma a mi.

9 Nyumu ko nɛ a tsɛɛ lɛ Simon ngɛ ma a mi lejɛ ɔ. E tsuɔ kunya kɛ peeɔ níhi nɛ peeɔ Samaria bi ɔmɛ nyakpɛ nitsɛnitsɛ. E peeɔ e he kaa nɔmlɔ nguaa ji lɛ.

10 Lɔ ɔ he ɔ, ni wawi, kɛ ni nguahi tsuo buɔ lɛ, nɛ a deɔ ke, “Nɔmlɔ nɛ ɔ hɛɛ Mawu a he wami nɛ tsɛɛ kpetekpleenyɛ ɔ.”

11 Niinɛ, kunya yemi nɛ ɔ nɛ haa ni ɔmɛ a nya kpɛɛ a he ɔ, Simon je sisi kɛ.

12 Se benɛ Filipo fiɛ sane kpakpa a nɛ kɔɔ Mawu matsɛ yemi ɔ, kɛ Yesu Kristo he ɔ tsɔɔ ni ɔmɛ ɔ, a sɔle, nyumuhi kɛ yihi tsuo nɛ he ye ɔ.

13 Simon nitsɛ hu he ye, nɛ a sɔle lɛ. Lɔ ɔ se ɔ, e kɛ Filipo bɔni nyɛɛmi. Benɛ Simon na okadihi, kɛ he wami ní nguanguahi nɛ a pee ɔ, e nya kpɛ e he.

14 Bɔfo ɔmɛ nɛ ngɛ Yerusalem ɔ na le kaa Samaria bi ɔmɛ pɛtɛ Mawu munyu ɔ he, lɔ ɔ he ɔ, a tsɔ Petro kɛ Yohane kɛ ya a ngɔ.

15 Benɛ a ba lejɛ ɔ, a ba sɔle ha nihi nɛ he ye ɔ, konɛ a na Mumi Klɔuklɔu ɔ.

16 Ejakaa Mumi ɔ bɛ a ti nɔ ko nɔ lolo; se a sɔle mɛ ngɛ Nyɔmtsɛ Yesu biɛ mi kɛkɛ.

17 Jehanɛ, Petro kɛ Yohane ngɔ a nine pue ni ɔmɛ a nɔ, nɛ a na Mumi Klɔuklɔu ɔ.

18 Simon na kaa bɔfo ɔmɛ a nine nɛ a ngɔ pue nihi nɛ he ye ɔ a nɔ ɔ ha nɛ a na Mumi Klɔuklɔu ɔ. Lɔ ɔ he ɔ, e je sika kɛ ha Petro kɛ Yohane,

19 nɛ e ke, “Nyɛ ha imi hu kikɛmɛ a he wami nɛ ɔ, konɛ nɔ tsuaa nɔ nɛ ma ngɔ ye nine kɛ pue e nɔ ɔ, e na Mumi Klɔuklɔu ɔ.”

20 Se Petro de lɛ ke, “O kɛ o sika a tsuo hɛ mi nɛ kpata, ejakaa o susuu kaa Mawu nɔke nɔ́ ɔ, sika a kɛ heɔ!

21 O be blɔ nya, loo blɔ fa mi nɔ́ ko ngɛ wa ní tsumi nɛ ɔ mi; ejakaa o tsui mi dɛ ngɛ Mawu hɛ mi.

22 Pia o he mohu ngɛ nɔ́ yayami nɛ o susu ɔ he, nɛ o kpa Nyɔmtsɛ ɔ pɛɛ kaa alini a maa ngɔ yayami nɛ o susu ɔ ngɔ pa mo lo.

23 Ejakaa i na kaa hɛkɔ hyi mo tɔ kaa bɔ nɛ duɔ kuɔɔ nɔ ɔ, nɛ yayami bɔ mo pã.”

24 Kɛkɛ nɛ Simon de Petro kɛ Yohane ke, “I kpa nyɛ pɛɛ, nyɛ kpa Nyɔmtsɛ ɔ pɛɛ ha mi, konɛ níhi nɛ nyɛ de nɛ ɔmɛ ekoeko ko ba ye nɔ.”

25 Benɛ Petro kɛ Yohane ye odase, nɛ a fiɛ Nyɔmtsɛ ɔ munyu ɔ ngɔ tsɔɔ ni ɔmɛ se ɔ, a kpale a se kɛ ho Yerusalem ya. Benɛ a kpale kɛ yaa a, a fiɛ sane kpakpa a ngɛ Samaria kɔpehi fuu a mi.

Filipo kɛ Etiopia sɔmɔlɔ nɔkɔtɔma a

26 Nyɔmtsɛ ɔ bɔfo ko ba de Filipo ke, “Dla o he nɛ o ya leneyi je, nɛ o nyɛɛ blɔ nɛ je Yerusalem kɛ yaa Gaza a nɔ.” (A nyɛɛ we blɔ nɛ ɔ nɔ hu.)

27 Filipo dla e he, nɛ e ho. Benɛ e yaa a, e na Etiopia manyɛ ɔ tsɔlɔ nɔkɔtɔma ko nɛ a puɛ lɛ. Lɛ nɛ e hyɛɛ manyɛ ɔ juetli nɔ. Nyumu nɛ ɔ ya Yerusalem ya ja Mawu, nɛ e kpale kɛ yaa e ma mi ngɛ e zugba lɛ mi. Benɛ e yaa a tsuo e ngɛ gbalɔ Yesaya womi ɔ kanee.

28

29 Kɛkɛ nɛ Mumi Klɔuklɔu ɔ de Filipo ke, “Nyɛɛ kɛ ya lɛ nɛ ɔ he haa.”

30 Kɛkɛ nɛ Filipo sa fo kɛ ya na lɛ ɔ, nɛ e nu nɛ nyumu ɔ ngɛ gbalɔ Yesaya womi ɔ kanee. Filipo bi lɛ ke, “Nɔ́ nɛ o ngɛ kanee ɔ, anɛ o ngɛ sisi nue?”

31 Sɔmɔlɔ nɔkɔtɔma a he nɔ ke, “Kɛ ma pee kɛɛ nɛ ma nu sisi kaa ja nɔ ko tsɔɔ mi?” Kɛkɛ nɛ e de Filipo ke e kuɔ lɛ ɔ nɛ e ba hi si ngɛ e kasa nya.

32 ⓚ Ngmami ɔ mi he nɛ e ngɛ kanee ɔ ji nɛ ɔ nɛ: “A ngɔ lɛ kɛ ho kaa jijɔ nɛ a yaa gbe! Nɛ bɔ nɛ jijɔ bi peeɔ kpoo ngɛ e he bwɔmi sãlɔ hɛ mi ɔ, ja nɔuu e pee. nɛ e kpɛ we e kuɔ si.

33 A wa lɛ yi mi; a ye lɛ sane yaya. Mɛnɔ ma nyɛ maa gba e nina he sane? Ejakaa a po e wami nɔ kpiti ngɛ je ɔ mi.”

34 Sɔmɔlɔ nɔkɔtɔma a bi Filipo ke, “I kpa mo pɛɛ, mɛnɔ he munyu gbalɔ ɔ ngɛ tue ɔ? Lɛ nitsɛ e he, loo nɔ kpa?”

35 Kɛkɛ nɛ Filipo wo e nya nɔ nɛ e bɔni munyu tumi. E je sisi kɛ ngmami ɔ nɛ sɔmɔlɔ nɔkɔtɔma a ngɛ kanee ɔ, nɛ e gba Yesu he sane kpakpa a.

36 Benɛ a ngɛ blɔ ɔ nɔ kɛ yaa a, a ya su he ko nɛ nyu ngɛ; kɛkɛ nɛ sɔmɔlɔ nɔkɔtɔma a de ke, “O nɛ nyu; mɛni maa tsi ye sɔlemi nya?” [

37 Filipo de lɛ ke, “Ke o heɔ yeɔ kɛ o tsui tsuo ɔ, lɛɛ blɔ ngɛ he faa.” E he nɔ ke, “I heɔ yeɔ kaa Yesu Krsito ji Mawu Bi ɔ nɛ.”]

38 Kɛkɛ nɛ sɔmɔlɔ nɔkɔtɔma a fa nɛ zugba lɛ ɔ da si. E kɛ Filipo tsuo kple si, nɛ a ho nyu ɔ mi ya; nɛ Filipo sɔle lɛ.

39 Benɛ a je nyu ɔ mi ɔ, Nyɔmtsɛ ɔ Mumi ɔ ngɔ Filipo kɛ je. Sɔmɔlɔ nɔkɔtɔma a nɛ́ lɛ hu; se e pue nɔ kɛ ho kɛ nyami babauu.

40 Filipo ya je Azoto. E fiɛ sane kpakpa a ngɛ ma amɛ tsuo a mi hluu kɛ ya su Kaisarea.