Yohane 7

Yesu kɛ e nyɛmimɛ ɔmɛ

1 Enɛ ɔ se ɔ, Yesu kpa si ngɛ Galilea pɛ, se e sume nɛ e ya Yudea zugba a mi, ejakaa Yuda bi ɔmɛ ngɛ lɛ hlae nɛ a gbe.

2 ⓨ Benɛ Yuda bi ɔmɛ a Gbasisihimi nyami be ɔ ngɛ sue ɔ,

3 Yesu nyɛminyumu ɔmɛ de lɛ ke, “Jee hiɛ ɔ, nɛ o ya Yudea, konɛ o se nyɛɛli ɔmɛ nɛ a na níhi nɛ o ngɛ tsue ɔ.

4 Ke nɔ ko suɔ kaa ma nɛ le lɛ saminya a, níhi nɛ e peeɔ ɔ, e laa we nɔ. Ní ɔmɛ tsuo nɛ o ngɛ pee ɔ, ha nɛ je ɔ tsuo nɛ nu he.”

5 E nyɛminyumu ɔmɛ tete he we lɛ yi.

6 Yesu he nɔ ke, “Ye be ɔ sui lolo; se nyɛɛ lɛɛ be tsuaa be hi ha nyɛ.

7 Je ɔ be nyɛ nyɛe, se a nyɛɔ mi, ejakaa a yeɔ odase kɛ siɔ mɛ ngɛ ní yayamihi nɛ a peeɔ ɔ he.

8 Nyɛɛ ya nɛ nyɛ ya ye nyami be ɔ. Imi lɛɛ i be yae, ejakaa be nɛ maa da mi ɔ na we nɛ e su.”

9 Nɛ e de jã a, e tlɔ Galilea.

Yesu ya Gbasisihimi nyami ɔ

10 Nɛ Yesu nyɛminyumu ɔmɛ je ɔ, pee se ɔ, lɛ hu e pue nɔ kɛ ho. Se e je we e he si paa; mohu e ngɛ e he lae.

11 Yuda ma nimeli ɔmɛ hla lɛ ngɛ lejɛ ɔ; nɛ a bi si ke, “Jije e ngɛ?”

12 Ma a tsuo tu Yesu he munyu kusikusi. Benɛ ni komɛ de ke, “Nɔmlɔ kpakpa ji lɛ” ɔ, ni komɛ hu de ke, “Dɛbi, e ngɛ ma a nane tɔtɔe”.

13 Se kɛ̃ ɔ, nɔ ko nɔ ko nyɛ we nɛ e tu Yesu he munyu ngɛ ma a hɛ mi paa, ejakaa a ngɛ Yuda bi ɔmɛ gbeye yee.

14 Benɛ nyami ɔ ngɛ nɔ yae ɔ kɛkɛ nɛ Yesu ya hia si ngɛ sɔlemi we ɔ, nɛ e bɔni ní tsɔɔmi.

15 Yuda bi ɔmɛ a hɛ mi pee mɛ yaa, nɛ a bi ke, “Nɔmlɔ nɛ kase we ní ɔ, kɛ peeɔ kɛɛ nɛ e le ní kikɛ nɛ ɔ.”

16 Yesu he nɔ ke, “Nɔ́ nɛ i ngɛ nyɛ tsɔɔe ɔ ji imi nitsɛ ye yi mi; nɔ nɛ tsɔ mi ɔ nɛ ngɔ ha mi.

17 Nɔ tsuaa nɔ nɛ suɔ kaa e maa pee Mawu suɔmi nya ní ɔ, e maa na kaa nɔ́ nɛ i ngɛ tsɔɔe ɔ je Mawu ngɔ, se pi imi nitsɛ ye he wami nya.

18 Ke nɔ ko tuɔ munyu ngɛ lɛ nitsɛ e he wami nya a, e ngɛ hɛ mi nyami hlae ha e he. Se anɔkualetsɛ lɛɛ e hlaa kaa e maa wo nɔ nɛ tsɔ lɛ ɔ mohu hɛ mi nyami, nɛ sisimi be e mi.

19 Pi Mose nɛ wo nyɛ mlaa a? Nɛ nyɛ ti nɔ ko nɔ ko yi nɔ ɔ? Mɛni he je nyɛ ngɛ hlae nɛ nyɛɛ gbe mi ɔ?”

20 Ma a tsuo he nɔ ke, “Mo nɔmlɔ nɛ ɔ, mumi yayami ngɛ o mi! Mɛnɔ ngɛ mo hlae nɛ e gbe?”

21 Yesu he nɔ ke, “Nyakpɛ nɔ́ kake pɛ i pee nɛ nyɛ tsuo nyɛ hɛ mi pee nyɛ yaa.

22 ⓩ Mose nɛ fa ke nyɛɛ po nyɛ binyumu ɔmɛ. (Pohu pi Mose nɛ de; nyɛ nɛmɛ ɔmɛ nɛ a je sisi.) Lɔ ɔ he ɔ, Hejɔɔmi ligbi ɔ, nyɛ poɔ bimwɔyo.

23 ⓐ Ke Hejɔɔmi ligbi ɔ, nyɛ poɔ nɔ, konɛ a ko tɔ Mose mlaa a, mɛni he je nyɛ mi mi fuɔ mi kaa i tsa hiɔtsɛ Hejɔɔmi ligbi ɔ?

24 Ke nyɛ ngɛ kojoe ɔ, nyɛ kpa nɔ hɛ mi hyɛmi, nɛ́ nyɛɛ ye dami sane.”

Yesu ji Mesia a lo?

25 Kɛkɛ nɛ Yerusalem bi ɔmɛ a ti ni komɛ bi ke, “Anɛ pi nyumu nɛ ɔ nɛ ma nimeli ɔmɛ ngɛ hlae nɛ a gbe ɔ?

26 Hyɛ kaa jehanɛ lɛɛ e daa si paa ngɛ ní tsɔɔe nɛ a de we lɛ nɔ́ ko. Eko piɔ a na kaa lɛ ji Kristo ɔ niinɛ.

27 Kristo ɔ nɛɛ, anɛ nɔ ko maa le he nɛ e maa je lo? Tse wɔ tsuo wa le he nɛ nɔmlɔ nɛ ɔ je.”

28 Jehanɛ, benɛ Yesu ngɛ ní ɔ tsɔɔe ngɛ sɔlemi we ɔ, e kpa ngmlaa kɛ bi ke, “Anɛ nyɛ le mi tutuutu? He nɛ i je ɔ, nyɛ le? Pi imi nitsɛ ye he wami nya nɛ i ba. Nɔ nɛ tsɔ mi ɔ, anɔkualetsɛ ji lɛ; nyɛɛ nyɛ li lɛ.

29 Imi lɛɛ i le lɛ, ejakaa e ngɔ nɛ i je, nɛ lɛ ji nɔ nɛ tsɔ mi.”

30 Kɛkɛ nɛ a pee kaa a maa nu Yesu amlɔ nɔuu, se nɔ ko nɔ ko nyɛ we nɛ e ta e he, ejakaa e be ɔ sui lolo.

31 Ma mi bi ɔmɛ a ti nihi babauu he Yesu ye, lɔ ɔ he ɔ, a bi ke, “Anɛ Mesia a nɛ maa ba a ma nyɛ to okadi pe nɔmlɔ nɛ ɔ lo?”

A tsɔ nihi nɛ́ a ya nu Yesu

32 Benɛ Farisi bi ɔmɛ nu nɛ ma kpekpemi ɔ ngɛ Yesu he munyu tue kusikusi ɔ, a kɛ osɔfo nikɔtɔma amɛ tsɔ nihi ke a ya nu lɛ kɛ ba.

33 Yesu de mɛ ke, “E piɛ be bɔɔ pɛ nɛ i kɛ nyɛ maa hi si, kɛkɛ ma kpale kɛ ho nɔ nɛ tsɔ mi ɔ ngɔ ya.

34 Nyɛ ma hla mi, se nyɛ be mi nae; ejakaa he nɛ i yaa a, nyɛ be nyɛe maa ba lejɛ ɔ.”

35 Yuda ma nimeli ɔmɛ bi mɛ nitsɛmɛ a he ke, “Jije po e yaa nɛ wa be lɛ nae hu ɔ? Anɛ e maa ho Hela ma nguaa amɛ a mi ya ngɛ wa nyɛmimɛ ɔmɛ a ngɔ, nɛ e ya tsɔɔ Hela bi ɔmɛ ní lo?

36 E de ke, wa ma hla lɛ, se wa be lɛ nae; nɛ he nɛ e yaa hu, wa be nyɛe maa ya. Kɛ e ngɛ tsɔɔe kɛɛ?”

Pa nɛ haa nɔ nyu nɛ wami ngɛ mi

37 ⓑ Nyagbe ligbi ɔ nɛ ji nyami ligbi nguaa pe kulaa a, Yesu te da si, nɛ e de kɛ ngmlaa ke, “Nɔ tsuaa nɔ nɛ kuma ngɛ lɛ yee ɔ, e ba ye ngɔ nɛ e ba nu nyu.

38 ⓒ A ngma ke, ‘Nɔ tsuaa nɔ nɛ heɔ mi yeɔ ɔ, pa nɛ baa nyu babaaba nɛ wami ngɛ mi maa fo dɔ kɛ je e tsui mi.’ ”

39 Blɔɔ, Mumi ɔ he Yesu de enɛ ɔ nɛ, ejakaa nɔ tsuaa nɔ nɛ heɔ lɛ yeɔ ɔ nine maa su Mumi ɔ nɔ. Se jamɛ a be ɔ, Mumi ɔ bɛ lolo, ejakaa a na we nɛ a wo Yesu hɛ mi nyami.

Ni ɔmɛ a mi gba

40 Benɛ ma mi bi ɔmɛ nu munyu nɛ ɔmɛ ɔ, a ti ni komɛ de ke, “Niinɛ, nɔmlɔ nɛ ɔ ji gbalɔ ɔ nɛ.”

41 Ni komɛ hu de ke, “Lɛ ji Mesia a nɛ.” Se ni kpa komɛ lɛɛ a bi ke, “Mesia a, Galilea nɛ e maa je lo?

42 ⓓ Ejakaa a ngma ke Mesia a maa pee Matsɛ David nina; nɛ jehanɛ hu, Betlehem, he nɛ Matsɛ David hi ɔ, lejɛ ɔ a ma fɔ lɛ ngɛ.”

43 Benɛ a de nɔ́ nɛ ɔ, kɛkɛ nɛ ni ɔmɛ a mi gba enyɔ ngɛ Yesu he.

44 Ni komɛ pee kaa a maa nu Yesu, se nɔ ko nɔ ko nyɛ we nɛ e ta e he.

Yuda ma nimeli ɔmɛ he we yi

45 Benɛ tsɔli ɔmɛ kpale kɛ ba a, osɔfo nikɔtɔma amɛ, kɛ Farisi bi ɔmɛ bi mɛ ke, “Mɛni he je nyɛɛ kɛ lɛ bɛ ɔ?”

46 Tsɔli ɔmɛ he nɔ ke, “Bɔ nɛ nɔmlɔ nɛ ɔ tuɔ munyu ɔ, nɔ ko tu we munyu ja gblee.”

47 Farisi bi ɔmɛ bi tsɔli ɔmɛ ke, “Anɛ e pee nyɛ hu kuasia lo?

48 Anɛ nyɛ nu hyɛ kaa ma nimeli ɔmɛ, aloo Farisi bi ɔmɛ a ti nɔ kake ngmelu po he lɛ ye lo?

49 Ma kpekpemi nɛ ɔ, a gbiɛ mɛ pɛ, ejakaa a li Mose mlaa a.”

50 ⓔ Farisi bi ɔmɛ a ti nɔ kake nɛ a tsɛɛ lɛ Nikodemo, nɛ́ be ko ɔ e ba Yesu ngɔ ɔ ngɛ lejɛ ɔ. E de ma a ke,

51 “Wa mlaa a nya a, e sɛ kaa wa buɔ nɔ ko fɔ be mi nɛ wa bi we e nya mi kaa mɛni e pee lo.”

52 A he nɔ ke, “Saminya! Tse mo hu Galilea no ji mo! Yaa kpa ngmami ɔmɛ a mi kaa o maa na gbalɔ ko nɛ je Galilea lo!”