Yohane 6

Yesu ha nihi akpe enuɔ niye ní

(<x>470 14:13-21</x>; <x>480 6:30-44</x>; <x>490 9:10-17</x>)

1 Enɛ ɔmɛ a se ɔ, Yesu po Galilea taku ɔ nɛ a tsɛɛ Tiberia taku hulɔ ɔ.

2 Nimli babauu nyɛɛ e se, ejakaa a na nɛ e tsa hiɔtsɛmɛ kɛ to okadi kaa Mawu Bi ji lɛ.

3 Yesu kɛ e kaseli ɔmɛ kuɔ yo ɔ, nɛ a ya hi si.

4 Be nɛ Yuda bi ɔmɛ maa ye Hetsɔmi nyami ɔ su ta.

5 Yesu wo e yi nɔ, nɛ e na nimli babauu nɛ bu kɛ ma e ngɔ. Lɔ ɔ he ɔ, e bi Filipo ke, “Jije wa ma he niye ní ngɛ nɛ maa su nimli nɛ ɔmɛ a nya?”

6 (Enɛ ɔ po e de gu kɛ hla Filipo juɛmi, ejakaa lɛ nitsɛ e le nɔ́ nɛ e maa pee.)

7 Filipo he nɔ ke, “Sika hiɔ[1] lafa enyɔ nya abolo po be mɛ sue nya mi bɔ kakaaka.”

8 Kɛkɛ nɛ e kaseli ɔmɛ a ti nɔ kpa hu nɛ a tsɛɛ lɛ Andrea, Simon Petro nyɛmi ɔ de ke,

9 “Jokuɛ nyumuyo ko ngɛ hiɛ ɔ nɛ hɛɛ abolo bɔbɔɛ enuɔ nɛ a kɛ ngma pee, kɛ lo tsɔwi enyɔ, se lɔ ɔmɛ po tsa sui nɔ́ ko kɛ ha ma kpekpemi nɛ ɔ.”

10 Jehanɛ ɔ, Yesu de mɛ ke, “Nyɛ ha nɛ ni ɔmɛ nɛ a hi si.” Nga babauu ngɛ lejɛ ɔ tsuo. Lɔ ɔ he ɔ, ni ɔmɛ tsuo hi si. Nyumu ɔmɛ kɛkɛ a yibɔ maa su akpe enuɔ.

11 Yesu kukuɔ abolo ɔ, nɛ e na Mawu si; kɛkɛ nɛ e dla ha ni ɔmɛ tsuo nɛ hii si ngɛ lejɛ ɔ. E dla lo ɔ hu ja nɔuu, nɛ nɔ tsuaa nɔ ná bɔ nɛ maa su e nya.

12 Benɛ mɛ tsuo a ye nɛ a tɔ ɔ, Yesu de kaseli ɔmɛ ke, “Nyɛ bua bibliwi nɛ piɛ ɔ nya nɛ eko kó dã.”

13 A pee jã, nɛ abolo bɔbɔɛ enuɔ nɛ a kɛ ngma pee, nɛ a ye piɛ ɔ, bibliwi nɛ a bua nya a hyi kusii nyɔngma kɛ enyɔ.

14 Nihi nɛ na okadi nɛ ɔ nɛ Yesu pee ɔ de ke, “Niinɛ, gbalɔ ɔ nɛ ma je ɔ mi ɔ ji nɛ ɔ nɛ.”

15 Benɛ Yesu na kaa a ngɛ hlae nɛ a nu lɛ pani nya, nɛ a wo lɛ matsɛ ɔ, e sã e he si, nɛ lɛ nɔ kake e je kpoo kɛ kuɔ yo ɔ ekohu.

Yesu nyɛɛ nyu hɛ mi

(<x>470 14:22-33</x>; <x>480 6:45-52</x>)

16 Benɛ pu maa ho si nɔmi ya a, Yesu kaseli ɔmɛ pue nɔ kɛ ho taku ɔ nya ya.

17 A ya sɛ lɛ mi, nɛ a ngɔ a hɛ mi kɛ pi Kapernaum, nɛ a ngɛ taku ɔ poe kɛ yaa. Jehanɛ ɔ du bu, se loloolo ɔ, a nɛ Yesu hɛ mi.

18 Jamɛ a be ɔ, kɔɔhiɔ nɛ nya wa ko hia ngɛ pa a nɔ, nɛ oslɔke ngɛ kue hamahama.

19 Kaseli ɔmɛ hlui lɛ ɔ kɛ ya saii, maa pee kaa si tomi etɛ, loo eywiɛ; kɛkɛ nɛ a na Yesu nɛ nyɛɛ nyu ɔ hɛ mi kɛ ma, nɛ e miɔ nɛ e su lɛ ɔ he. Sawale nu mɛ,

20 se Yesu de mɛ ke, “Nyɛ ko ye gbeye! Imi!”

21 A he lɛ kɛ wo lɛ ɔ mi kɛ bua jɔmi; amlɔ ɔ nɔuu ɔ, lɛ ɔ ya sa kpo he he nɛ a yaa a.

Ni ɔmɛ hla Yesu

22 E nɔ jena a, ma kpekpemi ɔ nɛ tlɔ taku ɔ se ɔ na kaa lɛ kpa ko be lejɛ ɔ. A le hu kaa Yesu sɛ́ lɛ ɔ mi kɛ kaseli ɔmɛ, se kaseli ɔmɛ pɛ nɛ a pue nɔ kɛ ho.

23 Lɛ kpa komɛ je Tiberia ba sa kpo he he nɛ Nyɔmtsɛ ɔ na Mawu si, nɛ ma kpekpemi ɔ ye abolo ɔ ngɛ ɔ.

24 Benɛ ma kpekpemi ɔ na kaa Yesu be lejɛ ɔ, nɛ a nɛ́ e kaseli ɔmɛ hulɔ ɔ, a wo lɛ ɔmɛ, nɛ a pue nɔ kɛ ho Kapernaum ya ya hla Yesu.

Yesu ji abolo nɛ haa nɔ wami

25 Benɛ ni ɔmɛ ba na Yesu ngɛ taku ɔ se ɔ, a bi lɛ ke, “Tsɔɔlɔ, mɛni be o ba hiɛmɛ nɛ ɔ?”

26 Yesu he nɔ ke, “I ngɛ nyɛ dee anɔkuale mi ke, pi okadihi nɛ nyɛ na a a he nɛ nyɛ ngɛ mi hlae; se mohu abolo ɔ nɛ nyɛ ye nɛ nyɛ tɔ ɔ he nɛ nyɛ ngɛ mi hlae ɔ nɛ.

27 Nyɛ ko gbo ngma nɛ puɛɔ ɔ he dengme. Mohu ɔ, nyɛ hla ngma nɛ hii si kɛ yaa neneene. Enɛ ɔ ji nɔ́ nɛ Nɔmlɔ Bi ɔ ma ha nyɛ ɔ nɛ, ejakaa Tsɛ Mawu ɔ nɛ hla lɛ.”

28 Lɔ ɔ he ɔ, a bi Yesu ke, “Kɛ wa maa pee kɛ pee Mawu suɔmi nya ní kɛɛ?”

29 Yesu he nɔ́ ke, “Mawu suɔ kaa nyɛ he nɔ nɛ e tsɔ ɔ nyɛɛ ye.”

30 A he nɔ nɛ a bi lɛ ke, “Mɛni okadi o maa to wɔ, konɛ wa he mo waa ye? Mɛni o maa pee?

31 ⓥ Wa nɛmɛ ɔmɛ ye mana ngɛ nga a nɔ. E ngɛ ngmami ɔmɛ a mi ke, ‘E ha abolo je hiɔwe kɛ ba ha mɛ nɛ a ye.’ ”

32 Yesu de mɛ ke, “I ngɛ nyɛ dee anɔkuale mi ke nɔ́ nɛ Mose ha nyɛ ɔ, pi lɔ ɔ ji abolo nɛ je hiɔwe ɔ. Tsaatsɛ ji nɔ nɛ haa nyɛ abolo nitsɛnitsɛ nɛ je hiɔwe.

33 Mawu we abolo ɔ ji nɔ nɛ je hiɔwe kɛ ba a, nɛ lɛɛ e ma ha je ɔ wami.”

34 Jehanɛ ɔ, a de Yesu ke, “Nyɔmtsɛ, ha wɔ abolo nɛ ɔ eko daa.”

35 Yesu de mɛ ke, “Imi ji abolo nɛ haa nɔ wami ɔ nɛ. Ke nɔ ko ba ye ngɔ ɔ, hwɔ be lɛ yee gblegbleegble; nɛ nɔ nɛ he mi ye ɔ, kuma be lɛ yee gblegbleegble.

36 Kaa bɔ nɛ i de nyɛ momo ɔ, nyɛ na mi lɛɛ, se nyɛ he we yi.

37 Nɔ tsuaa nɔ nɛ Tsaatsɛ ngɔ ha mi ɔ maa ba ye ngɔ. Nɔ tsuaa nɔ nɛ baa ye ngɔ ɔ, i be lɛ fiee kɔkɔɔkɔ.

38 Ejakaa i je hiɔwe kɛ ba nɛ ma ba pee nɔ nɛ tsɔ mi ɔ suɔmi nya ní, se pi imi nitsɛ ye suɔmi nya ní.

39 Nɔ nɛ tsɔ mi ɔ, nɔ́ nɛ e suɔ ji kaa nihi tsuo nɛ e tu ngɔ wo ye dɛ mi ɔ, ngmelu kake kó je mi; se mohu nyagbe ligbi ɔ, ma tle mɛ tsuo si.

40 Ejakaa Tsaatsɛ suɔ kaa nɔ tsuaa nɔ nɛ na Bi ɔ, nɛ e heɔ lɛ yeɔ ɔ, e na neneene wami. Nɛ nyagbe ligbi ɔ, ma tle mɛ si kɛ ba wami mi.”

41 Benɛ Yesu de ke, “Imi ji abolo nɛ je hiɔwe ɔ”, ni ɔmɛ tu munyu huitihuiti kɛ si lɛ;

42 nɛ a bi ke, “Anɛ pi Yosef bi Yesu ɔ ji nɛ ɔ? Tse wa le e tsɛ kɛ e nyɛ! Nɛ lɛɛ e ke e je hiɔwe ɔ? Kɛ pee kɛɛ nɛ e deɔ jã mɔ?”

43 Yesu de mɛ ke, “Nyɛ kpa munyu huitihuiti tumi.

44 Nɔ ko nɔ ko be nyɛe maa ba ye ngɔ kaa ja Tsɛ ɔ nɛ tsɔ mi ɔ gbla lɛ kɛ ba ye ngɔ; nɛ nyagbe ligbi ɔ, ma tle lɛ si.

45 ⓦ Nɔ́ nɛ gbali ɔmɛ ngma ji nɛ ɔ nɛ: ‘Mawu maa tsɔɔ nɔ tsuaa nɔ ní.’ Munyu nɛ Tsɛ ɔ tu ɔ, nɔ tsuaa nɔ nɛ maa nu, nɛ e maa kase ní kɛ je mi ɔ maa ba ye ngɔ.

46 Se enɛ ɔ tsɔɔ we kaa nɔ ko na Tsɛ ɔ hyɛ; ja imi nɛ i je Mawu ngɔ ɔ, imi pɛ nɛ i na lɛ.

47 I ngɛ nyɛ dee anɔkuale mi ke nɔ tsuaa nɔ nɛ heɔ yeɔ ɔ, e nine su neneene wami nɔ.

48 Imi ji abolo nɛ haa nɔ wami ɔ nɛ.

49 Nyɛ nɛmɛ ɔmɛ ye mana ngɛ nga a nɔ, nɛ a gbo.

50 Se abolo nɛ je hiɔwe ɔ lɛɛ ke nɔ ko ye ɔ, e be gboe.

51 Imi ji abolo nɛ je hiɔwe nɛ haa nɔ wami. Nɔ nɛ maa ye kikɛmɛ a abolo nɛ ɔ eko ɔ maa hi si kɛ maa ya neneene. Abolo nɛ ma ha lɛ ɔ ji imi nitsɛ ye he lo nɛ i ngɔ kɛ ha, bɔ nɛ pee nɛ je ɔ tsuo yi nɛ na wami.”

52 Jehanɛ Yuda bi ɔmɛ sɔuu bɔni nya sami, nɛ a bi ke, “Kɛ nɔmlɔ nɛ ɔ maa ngɔ e he lo ha wɔ nɛ waa ye kɛɛ?”

53 Yesu de mɛ ke, “I ngɛ nyɛ dee anɔkuale mi ke, ke nyɛ yi Nɔmlɔ Bi ɔ he lo, nɛ́ nyɛɛ nu e muɔ ɔ, nyɛ be wami nae.

54 Nɔ tsuaa nɔ nɛ maa ye ye he lo, nɛ e maa nu ye muɔ ɔ ma na neneene wami; nɛ nyagbe ligbi ɔ, ma tle lɛ si.

55 Ejakaa ye he lo ɔ ji niye ní nɛ sa nɛ a ye, nɛ ye muɔ ɔ, nɔ́ nɛ sa nɛ a nu.

56 Nɔ tsuaa nɔ nɛ yeɔ ye he lo, nɛ e nuu ye muɔ ɔ hii ye mi, nɛ imi hu i hii e mi.

57 Tsɛ ɔ nɛ tsɔ mi ɔ hɛ ngɛ; nɛ e ha nɛ imi hu ye hɛ ngɛ. Jã kɛ̃, nɔ tsuaa nɔ nɛ yeɔ ye he lo ɔ, ma ha lɛ wami.

58 Abolo nɛ je hiɔwe ɔ ji nɛ ɔ nɛ. Abolo nɛ ɔ be kaa nɔ́ nɛ nyɛ nɛmɛ ɔmɛ ye nɛ pee se a gbo ɔ. Mohu ɔ, nɔmlɔ nɛ maa ye abolo nɛ ɔ maa hi si kɛ maa ya neneene.”

59 Yesu de ní nɛ ɔmɛ benɛ e ngɛ ní tsɔɔe ngɛ kpe he ɔ ngɛ Kapernaum.

Neneene wami munyuhi

60 Yesu se nyɛɛli ɔmɛ a ti nihi babauu nɛ nu nɔ́ nɛ ɔ, de ke, “Ei! Tsɔɔmi nɛ ɔ he wa lo! Mɛnɔ maa nu sisi.”

61 Benɛ Yesu kɔ se kaa e kaseli ɔmɛ ngɛ munyu huitihuiti tue ngɛ níhi nɛ e de mɛ ɔ a he ɔ, e bi mɛ ke, “Anɛ enɛ ɔ maa wo nyɛ nine mi nyu lo?

62 Ke nyɛ na Nɔmlɔ Bi ɔ nɛ kpale kɛ yaa hiɔwe he nɛ e je kɛ ba a, kɛ nyɛ maa pee kɛɛ?

63 Mawu mumi ɔ nɛ haa nɔ wami ɔ nɛ. Adesa he wami pi nɔ́ ko kulaa. Munyuhi nɛ i kɛ nyɛ tu nɛ ɔ ma ha nyɛ Mawu mumi nɛ haa nɔ wami ɔ.

64 Se kɛ̃, nyɛ ti ni komɛ he we yi.” (Kɛ je sisije ɔ, Yesu lɛɛ e le ni nɛmɛ nɛ be lɛ hee maa ye; nɛ nɔmlɔ nɛ maa tsɔɔ e se blɔ ɔ hu e le lɛ.)

65 Yesu ya nɔ de ke, “Enɛ ɔ nɔuu he je nɛ i de nyɛ ke nɔ ko nɔ ko be nyɛe maa ba ye ngɔ kaa ja Tsɛ ɔ nitsɛ ha lɛ he blɔ ɔ nɛ.”

66 Jehanɛ ɔ, munyu nɛ ɔmɛ a he je ɔ, Yesu se nyɛɛli ɔmɛ a ti nihi babauu kpale a se, nɛ a kɛ lɛ nyɛɛ we hu.

67 Lɔ ɔ he ɔ, e bi ni nyɔngma kɛ enyɔ ɔmɛ ke, “Nyɛ hu nyɛ suɔ kaa nyɛɛ maa je lo?”

68 ⓧ Simon Petro he nɔ ke, “Nyɔmtsɛ, mɛnɔ ngɔ wa maa ya? Mo lɛ o ngɛ neneene wami munyu ɔmɛ.

69 Amlɔ nɛ ɔ, wɔɔ lɛɛ wa he ye, nɛ wa na le hulɔ kaa mo ji Mawu Nɔ Klɔuklɔu ɔ nɛ.”

70 Yesu bi mɛ ke, “Anɛ pi imi nɛ i hla nyɛ ni nyɔngma kɛ enyɔ ɔmɛ lo? Lɛ kɛ pee kɛɛ nɛ nyɛ ti nɔ kake peeɔ Abosiami ɔ?”

71 Blɔɔ, Simon Iskariot bi Yuda e ngɛ dee ɔ nɛ. Ejakaa Yuda a, ni nyɔngma kɛ enyɔ ɔmɛ a ti nɔ kake ji lɛ. Se pee se ɔ, lɛ ji nɔ nɛ ba tsɔɔ Yesu se blɔ.