Mose V, - Introduction

NYA TSƆƆMI

Mose kɛ Israel bi ɔmɛ nyɛɛ nga kplanaa a nɔ hluu kɛ ya su blɔ ɔ nyagbe he ngɛ Moab zugba a nɔ, kɛ yaa ngɔ Kanaan zugba a. Munyuhi nɛ Mose tu kɛ tsɔɔ Israel bi ɔmɛ ngɛ lejɛ ɔ, a to nya pɛpɛɛpɛ, nɛ a ngma kɛ wo Mose Womi Enuɔne ɔ mi.

Sanehi nɛ a he hia wawɛɛ nɛ a naa ngɛ womi ɔ mi ji nɛ ɔmɛ nɛ: (1) Mose de Israel bi ɔmɛ ke a kai ní nguanguahi nɛ Mawu pee ha mɛ ngɛ jeha nyingmi eywiɛ nɛ be ɔ mi, bɔ nɛ e kpaka mɛ kɛ gu nga kplanaa a nɔ, konɛ a bu Mawu tue, nɛ a ye lɛ anɔkuale. (2) Mose ti mlaa nyɔngma amɛ a mi, nɛ e tsɔɔ kekleekle mlaa a sisi saminya, konɛ ma a nɛ kpá a yi mi kɛ ja Nyɔmtsɛ ɔ nɔ kake pɛ. Jehanɛ, mlaa slɔɔtoslɔɔtohi nɛ maa hɛɛ Israel ma a ngɛ zugba nɛ a wo mɛ he si ɔ nɔ ɔ, Mose ti mi ha mɛ ekohu. (3) Somi nɛ Mawu kɛ e ma a so ɔ, Mose kpale tsɔɔ mɛ sisi ekohu. E de kɛ piɛ he ke, níhi nɛ mlaa a ngɛ hlae nɛ a pee ɔ, ma a nɛ hyɛ nɛ a pee pɛpɛɛpɛ. (4) A ha Yoshua blɔ nya kaa Mose se ɔ, e nyɛɛ Mawu ma a hɛ mi. Mose la kɛ je Mawu yi kaa e ye mɛ anɔkuale. Mose gbaa Israel wɛtso ɔmɛ, nɛ lɔ ɔ se ɔ, e gbo ngɛ Moab zugba a nɔ ngɛ Yordan pa a beleku je.

Munyu tso nɛ ngɛ womi ɔ mi ji kaa Mawu he e ma a yi wami; lɛ nitsɛ nɛ e hla mɛ; e gbaa mɛ, nɛ e suɔ mɛ saminya. Lɔ ɔ he ɔ, e ma a nɛ kai anɔkuale nɛ ɔ, konɛ mɛ hu a suɔ Mawu, nɛ a bu lɛ tue, bɔ nɛ pee nɛ a yi nɛ na wami, nɛ Mawu nɛ gbaa mɛ daa.

Womi ɔ mi munyu komɛ nɛ a he hia saminya ji nɔ́ nɛ a ngma ngɛ 6.4-6. Munyu nɛ ngɛ lejɛ ɔ, nɛ́ pee se ɔ, Yesu ba tsɔɔ kaa lɔ ɔ ji mlaa nɛ he hia pe kulaa a ji, “Suɔ Nyɔmtsɛ o Mawu ɔ kɛ o tsui tsuo, kɛ o klaa tsuo, kɛ o he wami tsuo.”

Bɔ nɛ a dla womi ɔ mi ha

• Mose kɛ ma a kekleekle ní sɛɛmi 1.1—4.49
• Mose kɛ ma a ní sɛɛmi enyɔne 5.1—26.19
  a. Mlaa nyɔngma amɛ 5.1—10.22
  b. Mlaahi, blɔ nya tomihi, kɛ kɔkɔ bɔmihi 11.1—26.19
• Blɔ nyahi nɛ a to kɛ ha Kanaan zugba a mi sɛmi 27.1—28.68
• A pee somi ɔ ehe 29.1—30.20
• Nyagbe munyuhi nɛ Mose tu 31.1—33.29
• Mose gbo 34.1-12