Mose V, 29

Yawɛ kɛ Israel so ngɛ Moab zugba a nɔ

1 Somi nɛ Yawɛ fa Mose ke e kɛ Israel bi ɔmɛ nɛ a so ngɛ Moab zugba a nɔ ɔ mi munyu komɛ ji nɛ ɔmɛ nɛ. E slo somi nɛ Yawɛ nitsɛ kɛ Israel ma a so ngɛ Sinai yo ɔ he ɔ.

2 Mose tsɛ Israel ma a tsuo kɛ kpe, nɛ e de mɛ ke, “Nyɛ nitsɛmɛ nyɛ na nɔ́ nɛ Yawɛ pee Egipt matsɛ ɔ, e tsɔli ɔmɛ, kɛ e zugba a tsuo.

3 Nyɛ na gbenɔ hiɔ gbeyegbeye ɔmɛ, okadi ɔmɛ, kɛ nyakpɛ ní nguangua amɛ nɛ Yawɛ pee ɔ.

4 Se kɛ ba si mwɔnɛ ligbi nɛ ɔ, e ha we nɛ nyɛɛ nu níhi nɛ nyɛɛ kɛ kpe ɔ a sisi lolo.

5 Jeha nyingmi eywiɛ sɔuu Yawɛ kpaka nyɛ kɛ gu nga kplanaa a nɔ; nyɛ heha ní gba we ngɛ nyɛ he, nɛ nyɛ tokota amɛ hu tsɔ we.

6 Nyɛ na we abolo nɛ nyɛɛ ye, nɛ nyɛ na we wai, loo dã nɛ nya wa ko nɛ nyɛɛ nu; se Yawɛ ha nyɛ nyɛ hiami ní ɔmɛ, bɔ nɛ pee nɛ e kɛ tsɔɔ nyɛ kaa lɛ ji nyɛ Mawu ɔ nɛ.

7 ⓠ Jehanɛ, benɛ wa ba su hiɛmɛ nɛ ɔ, Heshbon matsɛ, Sihon, kɛ Bashan matsɛ, Og hia ta kɛ kpee wɔ. Se wa ye a nɔ,

8 ⓡ nɛ wa ngɔ a zugba a, nɛ wa dla mi ngɔ ha Ruben wɛtso ɔ, Gad wɛtso ɔ, kɛ Manase wɛtso fa a.

9 Lɔ ɔ he ɔ, nyɛɛ ye somi ɔ mi munyu ɔmɛ tsuo a nɔ pɛpɛɛpɛ, bɔ nɛ pee nɛ nyɛɛ ye manye ngɛ nɔ́ tsuaa nɔ́ nɛ nyɛ maa pee mi.

10 “Mwɔnɛ ɔ, nyɛ tsuo nyɛ daa si ngɛ Yawɛ nyɛ Mawu ɔ hɛ mi. Nyɛ, nyɛ ma nimeli, tsɔli, nyumuhi,

11 yihi, jokuɛwi, kɛ nyɛ nibwɔhi nɛ gbaa lɛ́, nɛ a yaa pa ha nyɛ ɔ tsuo ngɛ hiɛ ɔ.

12 Nyɛ ba hiɛmɛ nɛ ɔ, konɛ nyɛɛ fua ngɔ fɔ somi nɛ Yawɛ, nyɛ Mawu ɔ kɛ nyɛ ngɛ soe ɔ nɔ, nɛ nyɛɛ pɛtɛ níhi nɛ sa nɛ nyɛ tsu ngɛ mi ɔ a he.

13 Nyɛ ngɛ enɛ ɔ pee konɛ Yawɛ kɛ nyɛ nɛ da si kaa lɛ nitsɛ e ma, nɛ e pee nyɛ Mawu, kaa bɔ nɛ e wo nyɛɛ kɛ nyɛ nɛmɛ Abraham, Isak, kɛ Yakob si ɔ.

14 Somi nɛ ɔ, pi nyɛ kɛkɛ nɛ Yawɛ kɛ ngɛ soe, nɛ e mi ní tsumi ɔmɛ hu, pi nyɛ kɛkɛ nɛ a ngɛ kɛ ha.

15 Se e kɛ wɔ tsuo nɛ ngɛ soe ɔ nɛ; wɔ ni nɛmɛ nɛ wa daa si ngɛ e hɛ mi mwɔnɛ ɔ, kɛ wa nina nɛ a fɔ we mɛ lolo ɔ tsuo.

16 “Nyɛ kai bɔ nɛ wa hi Egipt zugba a nɔ, kɛ bɔ nɛ wa nyɛɛ kɛ gu je ma amɛ a zugba a nɔ.

17 Nyɛ na a musu ní hiemi ní ɔmɛ, amagahi nɛ a kɛ tso, kɛ tɛ, kɛ sika hiɔ, kɛ sika tsu pee ɔ.

18 ⓢ Nyɛ nɛ nyɛ daa si ngɛ hiɛ ɔ mwɔnɛ ɔ, nyɛɛ hyɛ saminya nɛ nɔ ko nɔ ko kó je Yawɛ, wa Mawu ɔ se kɛ ya ja ma je li a mawu ɔmɛ, nyumu jio, yo jio, weku jio, wɛtso jio. Nɔ́ nɛ ɔ ngɛ kaa tso sipoku nɛ maa wa, nɛ maa ngɔ e duɔ kɛ gbla haomi kɛ ba nyɛ nɔ.

19 Nyɛɛ hyɛ saminya nɛ nyɛ nihi tsuo nɛ nyɛ ngɛ somi munyu nɛ ɔmɛ nue mwɔnɛ ɔ ngɛ hiɛmɛ nɛ ɔ, nyɛ ti nɔ ko kó mlɔɔ e he kaa ke e pee lɛ nitsɛ e tsui wami nya ní ɔ, e maa hi ha lɛ ligbi ko. Ke nɔ ko pee ja a, nyɛ tsuo nyɛ hɛ mi ma kpata, nɔ kpakpa, kɛ nɔ yayami tsuo nɛ slɔɔto ko be mi.

20 Yawɛ be nɔ nɛ tue wa nɛ ɔ he yayami ngɔe kɛ pa lɛ. Niinɛ, Yawɛ mi mi ma fu wawɛɛ kɛ wo lɛ, nɛ gbiɛmihi tsuo nɛ a ngma ngɛ womi nɛ ɔ mi ɔ maa ba e nɔ kɛ yaa si Yawɛ ma kpata e hɛ mi kulaa kɛ pi si.

21 Yawɛ ma je e hɛ kɛ pi lɛ, nɛ e maa gbla e tue. Gbiɛmihi tsuo nɛ a ngma ngɛ Yawɛ mlaa womi nɛ ɔ mi, nɛ a to kɛ ha nihi nɛ ma tɔ̃ somi nɛ ɔ nɔ ɔ maa ba e nɔ.

22 “Hwɔɔ se yi nɔ bi nɛ ji nyɛ nina, kɛ nibwɔhi nɛ je ma se zugbahi a nɔ tsuo maa na haomihi, kɛ amanehluhi nɛ Yawɛ kɛ ba nyɛ zugba a nɔ ɔ.

23 ⓣ La zu, kɛ ngo maa ha ngmɔ ɔmɛ tsuo a nɔ. Nɔ́ ko nɔ́ ko be hie dumi ngɛ nɔ hu, nɛ nga po be puɛe ngɛ nɔ. Nyɛ zugba a maa pee kaa Sodom kɛ Gomora, kɛ Adma kɛ Zeboiim nɛ Yawɛ kpata a hɛ mi benɛ e mi mi fu wawɛɛ ɔ.

24 Ke e ba mi ja a, je ɔ tsuo ma bi si ke, ‘Mɛni he je nɛ Yawɛ pee e zugba a kikɛ nɛ ɔ?

25 Mɛni he je e mi mi fu wawɛɛ kikɛ nɛ ɔ?’ Heto nɛ a ma na ji, ‘Nɔ́ he je nɛ e ba ja a ji kaa Yawɛ ma a yi somi nɛ a kɛ lɛ, a nɛmɛ a Mawu ɔ so ɔ nɔ. Lɛ ji nɔ nɛ kpaka mɛ kɛ je Egipt ɔ nɛ.

26 A ya sɔmɔ mawu kpahi nɛ a ja we hyɛ, mawuhi nɛ Yawɛ wo mɛ mlaa ke a ko ja kɔkɔɔkɔ ɔ.

27 Enɛ ɔ he nɛ Yawɛ mi mi fu e ma a, nɛ e kɛ haomi ɔmɛ tsuo nɛ a ngma ngɛ womi nɛ ɔ mi ɔ ba a nɔ ɔ nɛ.

28 Yawɛ mi mi wo la wawɛɛ nitsɛ, nɛ e kɛ mi mi la nɛ nya wa nɛ ɔ hia mɛ kɛ je a zugba a nɔ, nɛ e sake mɛ ngɔ pue ma se zugba ko nɔ, nɛ lejɛ ɔ a ngɛ kɛ mwɔɔ.’

29 “Laami ní komɛ ngɛ nɛ Yawɛ, wa Mawu ɔ je we kpo ngɔ tsɔɔ wɔ, se e je e mlaa a kpo ngɔ ha wɔ kɛ wa nina, bɔ nɛ pee nɛ waa ye nɔ kɛ ya neneene.