Mose V, 28

Tue bumi kɛ e he gbaami

(<x>30 26:3-13</x>; <x>50 7:12-24</x>)

1 ⓞ “Ke nyɛ bu Yawɛ, nyɛ Mawu ɔ gbi tue, nɛ nyɛ ye e mlaa amɛ tsuo nɛ i ngɛ nyɛ woe mwɔnɛ ɔ a nɔ ɔ, lɛɛ e ma wo nyɛ nɔ gojoo pe je ma amɛ tsuo.

2 Nyɛɛ bu Yawɛ, nyɛ Mawu ɔ gbi tue, konɛ gbaami nɛ ɔmɛ nɛ a pee nyɛ nɔ́.

3 “Yawɛ maa gbaa nyɛ ma amɛ, kɛ nyɛ ngmɔ ɔmɛ.

4 “Yawɛ ma ha nyɛ ma fɔ bimɛ babauu; nyɛ zugba a maa ba ní, nɛ nyɛ we mi lohwehi, nɛ ji nyɛ na amɛ, kɛ nyɛ to ɔmɛ hu maa bɔ.

5 “Yawɛ maa gbaa nyɛ niba ní, kɛ niye ní nɛ nyɛ peeɔ kɛ jeɔ mi ɔ.

6 “Yawɛ maa gbaa nyɛ, nyɛ ba we mi jio, nyɛ hia blɔ jio.

7 “Yawɛ maa ye nyɛ he nyɛli ɔmɛ tsuo nɛ maa te si kɛ wo nyɛ ɔ a nɔ. Ke a gu he kake kɛ ba tua nyɛ ɔ, a maa gu he slɔɔto kpaago kɛ gbɛ fĩa.

8 “Yawɛ, nyɛ Mawu ɔ maa gbaa nyɛ ní tsumi nɔ, nɛ nyɛ gba amɛ ma hyi tɔtɔɔtɔ. E maa gbaa nyɛ ngɛ zugba a nɛ e kɛ ngɛ nyɛ hae ɔ nɔ.

9 “Ke nyɛ bu Yawɛ, nyɛ Mawu ɔ gbi tue, nɛ nyɛ ye mlaa amɛ nɛ e ngɛ nyɛ woe ɔ tsuo a nɔ ɔ, e maa pee nyɛ lɛ nitsɛ e ma, kaa bɔ nɛ e wo si ɔ.

10 Lɔ ɔ loko je ma amɛ tsuo maa na kaa Yawɛ hla nyɛ nɛ nyɛɛ pee lɛ nitsɛ e ma, nɛ a maa ye nyɛ gbeye.

11 Yawɛ ma ha nyɛ bimɛ, we mi lohwehi, kɛ ngmɔ niba ní babauu ngɛ zugba nɛ e wo nyɛ nɛmɛ ɔmɛ si ke e maa ngɔ kɛ ha nyɛ ɔ nɔ.

12 Yawɛ ma ha hiɔmi maa nɛ ngɛ e be mi; e maa gbaa nyɛ ní tsumi tsuo pɛpɛɛpɛ. Mahi babauu ma ba pa ní ngɛ nyɛ dɛ, se nyɛɛ lɛɛ e be nyɛ hiae kaa nyɛ ya pa nɔ́ ko ngɛ ma ko ma ko dɛ.

13 Yawɛ maa pee nyɛ je ma amɛ tsuo a hɛ mi nyɛɛlɔ; ma amɛ maa nyɛɛ nyɛ se; pi nyɛ nɛ nyɛ maa hi se. Ke nyɛ maa bu Mawu mlaa amɛ tue, nɛ nyɛ maa ye a nɔ pɛpɛɛpɛ, nɛ nyɛ maa pee bɔ nɛ i ngɛ nyɛ fae mwɔnɛ ɔ, Mawu ma ha nyɛ maa ya nɔ ngɛ nɔ́ tsuaa nɔ́ mi, nɛ nyɛ be se yae kɔkɔɔkɔ.

14 Nyɛ ko kpale kɛ je mlaa nɛ ɔmɛ a he kɔkɔɔkɔ; nyɛ ko ya ja mawu kpahi, nɛ nyɛ ko sɔmɔ mɛ hulɔ.

Tue gbomi kɛ e se sane

(<x>30 26:14-46</x>)

15 “Se ke nyɛ bui Yawɛ, nyɛ Mawu ɔ gbi tue, nɛ nyɛ yi e fami ɔmɛ, kɛ e mlaa amɛ tsuo nɛ i ngɛ nyɛ woe mwɔnɛ ɔ a nɔ pɛpɛɛpɛ ɔ, gbiɛmi nɛ ɔmɛ tsuo maa ba nyɛ nɔ.

16 “Yawɛ maa gbiɛ nyɛ ma amɛ, kɛ nyɛ ngmɔ ɔmɛ.

17 “Yawɛ maa gbiɛ nyɛ niba ní, nɛ nyɛ be nyɛe maa pee niye ní kɛ je mi.

18 “Yawɛ maa gbiɛ nyɛ bimɛ, nɛ a he be hiɛe. E maa gbiɛ nyɛ na amɛ, kɛ to ɔmɛ; a be bɔe, nɛ nyɛ zugba a hu ma gbo; nyɛ be nɔ́ kpakpa ko nae ngɛ mi.

19 “Yawɛ maa gbiɛ nyɛ, nyɛ ba we mi jio, nyɛ hia blɔ jio.

20 “Ke nyɛ kua Yawɛ, nɛ nyɛ ya pee yayami ɔ, lɔ ɔ lɛɛ e kɛ gbiɛmi nɛ ɔmɛ maa ba nyɛ nɔ: nyɛ ma didaa; nyɛ maa pee basaa, nɛ nyɛ maa bɔ ahlua ngɛ nɔ́ tsuaa nɔ́ nɛ nyɛ ma tsu mi. E ma tsa nɔ ja kɛ yaa si nyɛ hɛ mi ma kpata tlukaa.

21 Yawɛ ma ha hiɔ nɛ gbee nɔ maa ba nyɛ nɔ nɔtonɔto kɛ yaa si e ma kpata nɔ tsuaa nɔ hɛ mi ngɛ zugba a nɛ nyɛ yaa ngɔ ɔ nɔ.

22 Yawɛ ma ha hiɔ nɛ sãã nɔ kaa gugue hiɔ maa ba; e ma ha nɛ aslã kɛ fuumi hiɔ maa ba. Jehanɛ, nyu hwɔ maa ye, pu maa tso, nɛ je mi maa dɔ la wawɛɛ; kɛkɛ ɔ, nyɛ ngmɔ mi níhi a hɛ mi ma kpata. Haomi nɛ ɔmɛ be tae kɛ yaa si nyɛ gbenɔ be.

23 Hiɔmi be nɛe, nɛ zugba a he maa wa kaa dade.

24 Yawɛ ma ha bunyuku, kɛ zia maa je hiɔwe kɛ ba pue nyɛ nɔ kɛ yaa si nyɛ hɛ mi ma kpata.

25 “Yawɛ ma ha nyɛ he nyɛli ɔmɛ maa ye nyɛ nɔ. Nyɛ maa gu he kake kɛ ya tua mɛ, se a maa gbɛ nyɛ ngɔ fĩa basaa, nɛ zugba a nɔ matsɛ yemi ɔmɛ tsuo maa ye gbeye ngɛ nɔ́ nɛ ba nyɛ nɔ ɔ he.

26 Ke nyɛ gbo ɔ, lohwe pɛlitsɛmɛ ma ba ye nyɛ, nɛ a be nɔ ko nae nɛ maa fie mɛ ngɛ nyɛ gbogboe ɔ he.

27 Yawɛ ma ha tslɔɔ maa fuu nyɛ kaa bɔ nɛ e pee Egipt bi ɔmɛ ɔ. Nyɛ maa hia pa, nɛ sakpa kɛ ngmo nɛ be tsa ba ma pue nyɛ nɔ.

28 Yawɛ ma ha nyɛ maa fo godo, nyɛ hɛngmɛhi ma yu, nɛ nyɛ juɛmi maa pee basaa.

29 Nyɛ maa hi si tataae piani katakata kaa nɔ nɛ hyɛ we nɔ́, nɛ nyɛ be blɔ nae. Nyɛ nɔ́ ko nɔ́ ko be nɔ yae? A maa wa nyɛ yi mi, nɛ a maa fia nyɛ ojo be tsuaa be; se nyɛ be nɔ ko nae nɛ maa je ngmlaa ha nyɛ.

30 “Nyɛ ma bi yo si, se nyumu kpa maa ngɔ lɛ; nyɛ maa ma tsu, se nyɛ be mi hie; nyɛ ma hu wai ngmɔ, se nyɛ be e mi wai yiblii ɔ eko yee.

31 A maa gbe nyɛ na ngɛ nyɛ hɛ mi paa, se nyɛ be e lo ɔ eko nae maa ye. Nyɛ hɛ mi paa nɛ a ma kpɔ̃ nyɛ tejihi pani nya kɛ je kɛ ho, nɛ a be kpalee kɛ ba ha nyɛ hu. A maa ngɔ nyɛ tohi kɛ ha nyɛ he nyɛli, nɛ nɔ ko nɔ ko be ngmlaa jee ha nyɛ.

32 Nyɛ hɛ mi paa nɛ a maa ngɔ nyɛ binyumu ɔmɛ kɛ yi ɔmɛ kɛ ha ma je li. Daa ligbi ɔ, nyɛ maa hi nyɛ bimɛ blɔ hyɛe wawɛɛ kaa a maa kpale kɛ ba lo, se lɛ tsuo maa pee yaka.

33 Nyɛ zugba a nɔ niba ní nɛ nyɛ gbo he dengme ɔ hu, je ma ko nɛ nyɛ li ma ba ye lɛ tsuo; nyɛ be nɔ́ kpakpa ko nae, se a maa wa nyɛ yi mi, nɛ a maa pee nyɛ posoo kaa zugba zu.

34 Hɛdo ní nɛ nyɛ maa na a, ma ha nyɛ maa fo godo.

35 Yawɛ ma ha nyɛ maa hia pa yeyee nɛ be tsa ba ngɛ nyɛ nane he. Tslɔɔ maa fuu nyɛ kɛ je nyɛ yi mi kɛ ya si nyɛ nane si.

36 “Yawɛ maa ngɔ nyɛ, kɛ nyɛ matsɛ ɔ kɛ ya ma se he nɛ nyɛ li, he nɛ nyɛ nɛmɛ tete hí hyɛ; nyɛ ma ya sɔmɔ mawuhi nɛ a kɛ tso kɛ tɛ pee ngɛ lejɛ ɔ.

37 Ma amɛ, he nɛ Yawɛ maa ngɔ nyɛ kɛ ya a, a mi bi ɔmɛ maa ye gbeye ngɛ nyakpɛ nɔ́ nɛ ba nyɛ nɔ nɛ ɔ he; a maa muɔ nyɛ, nɛ a maa ye nyɛ he fɛu.

38 “Nyɛ ma du ní babauu ngɛ nyɛ ngmɔ mi, se ní bɔɔ pɛ nyɛ ma kpa; ejakaa baalɛ maa ye nyɛ niba ní ɔmɛ.

39 Nyɛ maa pee wai ngmɔ, nɛ nyɛ ma gbo dengme kɛ hyɛ nɔ saminya, se nyɛ be wai yiblii ɔ kpae, nɛ nyɛ be wai ɔ hu eko nae maa nu; ejakaa gɔgɔ maa ye wai tso ɔmɛ.

40 Oliv tsohi maa puɛ ngɛ nyɛ zugba a nɔ he tsuaa he, se nyɛ be nu ɔ eko nae; ejakaa oliv tso ɔmɛ a yiblii ɔ ma kplɔ pue si.

41 Nyɛ ma fɔ binyumuhi kɛ yihi lɛɛ, se a be nyɛ bimɛ pee; ejakaa a maa nuu mɛ nyɔguɛ ngɛ ta mi kɛ je.

42 Baalɛ maa sɛ nyɛ tso ɔmɛ a mi, nɛ a ma puɛ niba ní ɔmɛ.

43 “Jehanɛ, nibwɔhi nɛ ngɛ nyɛ zugba a nɔ ɔ maa ya nɔ ma plɔke; se nyɛɛ lɛɛ si kɛkɛ nyɛ maa hi gbee.

44 A ma na ní, nɛ a maa pa nyɛ eko, se nyɛɛ lɛɛ nyɛ be ní nae nɛ nyɛ maa pa mɛ eko. Nyagbe mi ɔ, mɛ lɛ a maa ye nyɛ nɔ.

45 “Haomi nɛ ɔmɛ tsuo maa ba nyɛ nɔ, nɛ e ma tsa nɔ jã kɛ̃ kɛ yaa su be nɛ nyɛ hɛ mi ma kpata pɛsɛpɛsɛ; ejakaa nyɛ bui Yawɛ, nyɛ Mawu ɔ gbi tue, nɛ nyɛ yi e mlaa amɛ tsuo nɛ i wo nyɛ ɔ a nɔ.

46 Haomi ɔmɛ maa pee okadi, kɛ kɔkɔ bɔmi nɛ je Mawu ngɔ ha nyɛɛ kɛ nyɛ nina kɛ maa ya neneene.

47 Yawɛ gbaa nyɛ ngɛ blɔ tsuaa blɔ nɔ, se nyɛ sume nɛ nyɛ sɔmɔ lɛ kɛ bua jɔmi, kɛ nyami nɛ je tsui mi.

48 Lɔ ɔ he ɔ, nyɛ ma sɔmɔ nyɛ he nyɛli ɔmɛ nɛ Yawɛ ma ha nɛ a te si kɛ wo nyɛ ɔ. Hwɔ kɛ kuma maa ye nyɛ; nyɛ maa hɛɛ nyɛ he gu, nɛ nɔ́ tsuaa nɔ́ maa hia nyɛ. Nyɛ he nyɛli maa wa nyɛ yi mi wawɛɛ kɛ yaa si a ma kpata nyɛ hɛ mi pɛsɛpɛsɛ.

49 Yawɛ ma ha je ma ko nɛ nyɛ nui a gbi maa je zugba a nyagbe he ɔmɛ nɛ a kɛ nyɛ ba hwu. A ma ba tua nyɛ tlukaa kaa bɔ nɛ kɔle gblɔɔ nɔ́ ɔ.

50 Ma nɛ ɔ yi mi maa wa; a be nɔkɔtɔma bue, nɛ jokuɛyo hu a be lɛ mɔbɔ nae.

51 A maa ye nyɛ we mi lohwe ɔmɛ, kɛ nyɛ ngmɔ niba ní ɔmɛ tsuo; se nyɛɛ lɛɛ nyɛ ma gbo kɛ hwɔ. He nyɛli ɔmɛ be ngma, loo wai, loo nu, loo na, loo to piɛe ha nyɛ; nɛ nyɛ ma gbo.

52 A ma ba tua nyɛ ngɛ ma amɛ tsuo nɛ ngɛ zugba a nɛ Yawɛ ngɛ nyɛ hae ɔ nɔ, hluu kɛ yaa si be nɛ gbogbo gojogojoo ɔmɛ nɛ nyɛ ngɔ nyɛ hɛ kɛ fɔ a nɔ ɔ tsuo maa hule pue si.

53 “Ke nyɛ he nyɛli ɔmɛ ngɛ nyɛ ma amɛ a yi sae, nɛ nyɛ yi fi, nɛ hwɔ bɔni nyɛ yemi wawɛɛ ɔ, nyɛ maa ye nyɛ nitsɛ nyɛ mi mi bimɛ nɛ ji nyɛ binyumu ɔmɛ, kɛ nyɛ biyi ɔmɛ nɛ Yawɛ, nyɛ Mawu ɔ ngɔ ha nyɛ ɔ a lo.

54 Ke a ba sá ma a yi kikɛ nɛ ɔ, nyumu nɛ ji odehe mi odehe nɛ mi mi jɔ po yi ma fi, nɛ e maa ye lɛ nitsɛ e bimɛ ɔmɛ ekomɛ; ejakaa e nɛ niye ní kpa ko. E be e nyɛminyumu, loo lɛ nitsɛ e yo nɛ e suɔ lɛ saminya, loo e bimɛ ɔmɛ nɛ piɛ ɔ lo ɔ eko hae.

55

56 ⓟ Yo odehe mi odehe nɛ na ní kpɔtɔɔ, nɛ e hia we lɛ kaa e nyɛɛ kɛ ya he ko po maa pee jã kɛ̃. Ke he nyɛli ɔmɛ ba sá ma a yi ɔ, lɛ hu e yi ma fi ngɛ niye ní blɔ fa mi; e maa ye bimwɔyo he nɛ lɛ nitsɛ e fɔ ɔ ngɛ laami mi, nɛ e maa ye fɔmi se ɔ hulɔ. Lɛ nɔ kake e maa laa maa ye, nɛ e be e huno nɛ e suɔ lɛ saminya a, loo e bimɛ ɔmɛ eko hae.

57

58 “Ke nyɛ bui Mawu tsɔɔmi ɔmɛ tsuo, nɛ́ nyɛ pee bɔ nɛ a ngma ngɛ womi nɛ ɔ mi, nɛ nyɛ wui Yawɛ, nyɛ Mawu ɔ biɛ nɛ ngɛ nyakpɛ kɛ gbeye ɔ hɛ mi nyami ɔ,

59 e ma ha hiɔhi nɛ be tsa ba, kɛ gbenɔ hiɔ nɛ nɔ ko nɔ ko be nya nyɛe maa tsi maa nu nyɛɛ, kɛ nyɛ nina tsuo.

60 E ma ha haomihi nɛ ngɛ gbeye nɛ ba ngɛ Egipt ɔ maa ba nyɛ nɔ, nɛ nyɛ be nyɛ zu nɔ bae kɔkɔɔkɔ.

61 Jehanɛ, e ma ha hiɔ munomunohi, kɛ gbenɔ hiɔ yayamihi nɛ a wui a nɔ ta ngɛ Mawu womi ɔ nɛ a ngma mlaa amɛ, kɛ tsɔɔmi ɔmɛ ngɛ mi ɔ maa ba nyɛ nɔ, nɛ nyagbe ɔ, a ma kpata nyɛ hɛ mi pɛsɛpɛsɛ.

62 E ngɛ mi kaa nyɛ ma ba fɔ babauu nɛ nyɛ he maa hiɛ kaa dodoehi ngɛ hiɔwe lɛɛ, se nyɛ ti nihi bɔɔ pɛ nɛ a yi ma na wami; ejakaa nyɛ bui Yawɛ, nyɛ Mawu ɔ gbi tue.

63 Kaa bɔ nɛ Yawɛ bua jɔ nyɛ he, nɛ e ha nyɛ plɔke, nɛ nyɛ he hiɛ babauu ɔ, jã kɛ̃ e bua maa jɔ e he, nɛ e ma kpata nyɛ hɛ mi pɛsɛpɛsɛ. A maa fie nyɛ kɛ je zugba nɛ nyɛ yaa ngɔ ɔ nɔ.

64 “Yawɛ maa gbɛ nyɛ ngɔ fĩa je ma amɛ tsuo a mi, kɛ maa je je ɔ nyagbe he kake kɛ maa ya nyagbe he kake, nɛ lejɛ ɔ nyɛ ma sɔmɔ mawuhi nɛ a kɛ tso kɛ tɛ pee, mawuhi nɛ nyɛ, loo nyɛ nɛmɛ ja we hyɛ.

65 Nyɛ be tue mi jɔmi nae ngɛ he ko he ko; he ko be nɛ nyɛ ma tsɛ ke nyɛ nitsɛmɛ nyɛ nɔ́; Yawɛ ma ha nyɛ tsui maa hi poe; nyɛ hɛ kɛ nɔ fɔmi maa ta, nɛ nyɛ nine mi maa je wu.

66 Daa nɛ ɔ, nyɛ maa hi gbenɔ muɔ nya. Nyɛ tsui maa hi poe nyɔ kɛ pia; e maa pee nyɛ kaa nyɛ ma gbo tlukaa.

67 Nɔ́ tsuaa nɔ́ nɛ nyɛ hɛngmɛ maa na a maa wo nyɛ he gbeye, nɛ nyɛ tsui maa po.

68 E ngɛ mi kaa Yawɛ de ke nyɛ be kpalee kɛ ya Egipt gblegbleegble lɛɛ, se e maa wo nyɛ lɛ, nɛ e maa kpale nyɛ kɛ ya lejɛ ɔ. Nyɛ ma hla kaa nyɛ maa jua nyɛ he kaa nyɔguɛ ha nyɛ he nyɛli ɔmɛ ngɛ lejɛ ɔ, se a be nɔ ko nae nɛ ma he nyɛ.”