Mose V, 23

Nihi nɛ a ko futu Yawɛ ma a

1 “Nyumu nɛ a ta lɛ, loo e sungmɛ ywia, loo a po e nyumu tso ngɛ e he ɔ, e ko futu Yawɛ ma a mi bi ɔmɛ a kpe mi.

2 “Ke nyumu kɛ yo tsu we gba si himi kusumi, nɛ a fɔ bi ɔ, bi nɛ ɔ be he blɔ nɛ e futuu Yawɛ ma a mi bi ɔmɛ a kpe mi kɔkɔɔkɔ. Yi nɔhi nɛ maa ba ngɛ e se kɛ yaa si nyɔngmane ɔ po be he blɔ.

3 ⓓ “Amon no, loo Moab no kó futu Yawɛ ma mi bi ɔmɛ a kpe mi kɔkɔɔkɔ. Yi nɔhi nɛ maa ba ngɛ a se kɛ yaa si nyɔngmane ɔ po be he blɔ.

4 ⓔ Benɛ o je Egipt kɛ ma a, mɛ nɛ a kua mo niye ní kɛ nyu hami ɔ nɛ. Lɔ ɔ se hu, a ya bɔ Beor bi, Balaam nɛ je Petor ma a mi ngɛ Mesopotamia a apaa ke e ba gbiɛ mo.

5 ⓕ Se akɛnɛ Yawɛ, o Mawu ɔ suɔ mo he je ɔ, e bui Balaam tue; mohu e plɛ gbiɛmi ɔ kɛ pee gbaami ha mo.

6 Lɔ ɔ he ɔ, ligbi abɔ nɛ o ngɛ je mi nɛ ɔ, koo piɛ a he kɛ tsu nɔ́ ko nɔ́ ko nɛ ma ha nɛ a ma na a he, loo a ma plɔke.

7 “Koo hie Edom no; ejakaa o nyɛmi ji lɛ. Koo hie Egipt no; ejakaa o ya hi e zugba a nɔ hyɛ.

8 Bimɛ nɛ a ma fɔ ha mɛ, kɛ je yi nɔ nɛ ji etɛ ɔ kɛ yaa a, mɛɛ lɛɛ a ma nyɛ ma futu Yawɛ ma mi bi ɔmɛ.

Ta nga nɔ he tsɔmi

9 “Ke o hia ta nɛ o kɛ o he nyɛli yaa kpe ɔ, moo hyɛ saminya nɛ o ko pee nɔ́ ko nɛ ma ble mo.

10 Ke nyumu ko ngɛ nyɛ kpɛti nɛ e he nyu be ngɛ e he nyɔ mi ngɛ e sa mi, nɛ lɔ ɔ he ɔ, e he tsɔ we ɔ, é ya ta sito he ɔ se, nɛ e hi lejɛ ɔ.

11 Kɛ yaa gbɔkuɛ nya si ɔ, e du e he; nɛ ke pu nɔ si ɔ, e kpale kɛ ba ta sito he ɔ.

12 “Tó he ko ngɛ ta sito he ɔ se, nɛ e pee he nɛ o maa ya nane nɔ ngɛ.

13 Moo hɛɛ tso kɛ piɛ o ta hwumi ní ɔmɛ a he, konɛ ke o mi mi sá mo ɔ, o kɛ tso ɔ nɛ tsua si, nɛ o kɛ tso ɔ kɛ̃ nɛ tsi muɔ ɔ.

14 Ha nɛ o ta sito he ɔ nɛ pee klɔuklɔu; ejakaa Yawɛ, o Mawu ɔ kɛ mo ngɛ lejɛ ɔ, konɛ e baa o yi, nɛ o ye o he nyɛli ɔmɛ a nɔ kunimi. Koo pee afa nɔ́ ko nɛ ma ha nɛ Yawɛ maa je o he.

Mlaa munomunohi

15 “Ke nyɔguɛ ko kú kɛ je e nyɔmtsɛ ngɔ, nɛ e ba po mo ɔ, koo kpale lɛ kɛ ya ha e nyɔmtsɛ ɔ.

16 É hi o ngɔ ngɛ ma amɛ eko nɛ e suɔ mi kɛkɛ; koo wa lɛ yi mi.

17 ⓖ “Ke nyɛ ngɛ Mawu jae ɔ, Israel no ko kó pee e he yaholɔ; nyumu jio, yo jio.

18 Jehanɛ hu, hiɔ nɛ a woɔ yaholɔ, loo nyumu nɛ e kɛ e nyɛmi nyumu hwɔɔ ɔ, a ko ngɔ kɛ ba Yawɛ hɛ mi kaa siwo nɔ yemi bɔ. Yawɛ hiee nihi nɛ tsuɔ ní nɛ ɔmɛ.

19 ⓗ “Ke o pa sika, loo niye ní, loo nɔ́ kpa ko ngɔ ha o nyɛmi Israel fɔfɔɛ ɔ, ko he lɛ hekpa.

20 Se ke o pa nɔ́ ko ha nɔ nɛ pi Israel no ji lɛ ɔ, o ma nyɛ ma he lɛ hekpa. Ke o ye mlaa nɛ ɔ nɔ ɔ, Yawɛ, o Mawu ɔ maa gbaa nɔ́ tsuaa nɔ́ nɛ o ma tsu ngɛ zugba a nɛ o yaa ngɔ ɔ nɔ ha mo.

21 ⓘ “Ke o wo Yawɛ, o Mawu ɔ si ɔ, ye nɔ; koo to tsle. Yawɛ hyɛɛ blɔ kaa o ye o siwo ɔ nɔ; nɛ ke o pee we ja a, e ji tɔmi.

22 Ke o wui Yawɛ si kulaa a, e pi tɔmi.

23 Se ke o je mo nitsɛ o tsui mi nɛ o wo si ɔ, ye nɔ pɛpɛɛpɛ.

24 “Ke o ya sɛ o nyɛmi wai ngmɔ mi ɔ, o ma nyɛ maa ye wai yiblii ɔ bɔ nɛ o suɔ nɛ o tɔ; se koo ngɔ eko kɛ wo o níhi a mi kɛ je.

25 Ke o ya sɛ o nyɛmi ngma ngmɔ mi ɔ, o ma nyɛ maa ku eko nɛ o kpe; se koo dɔ ngma kpami ha ngɔ fɔ o nyɛmi ɔ ngma a nɔ.