Mose V, 22 - Laravel

1 ⓨ “Ke o na o nyɛmi Israel fɔfɔɛ e na, loo to nɛ laa blɔ ɔ, koo be e he, se mohu mo kpaka lɛ kɛ ya ha o nyɛmi ɔ.

2 Ke o kɛ o nyɛmi ɔ he kɛ, loo o li lohwetsɛ ɔ, lɛɛ mo kpaka lɛ kɛ ya mo nitsɛ o we mi. Ke nɔtsɛ ɔ ba bi si ɔ, ngɔɔ e ní kɛ ha lɛ.

3 Jã kɛ̃ o pee, ke o na o nyɛmi Israel fɔfɔɛ e teji, loo e tade, loo e nɔ́ kpa ko nɛ laa a.

4 “Ke o na o nyɛmi Israel no teji, loo na nɛ nɔ si ɔ, koo je e he, se mohu wa o nyɛmi ɔ, konɛ lohwe ɔ nɛ te nɛ e da e nane nɔ ekohu.

5 “Yo kó wo nyumu tade, nɛ nyumu hu kó wo yo tade; Yawɛ o Mawu ɔ sume nihi nɛ peeɔ jamɛ a níhi.

6 “Ke o na lohwe pɛlitsɛ tsu ngɛ tso nɔ, loo ngɛ zugba, nɛ lohwe nyɛ ɔ buu si ngɛ e hlui ɔmɛ, aloo e bi ɔmɛ a nɔ ɔ, koo nu lohwe nyɛ ɔ.

7 Moo nu bi ɔmɛ, nɛ o ngmɛɛ a nyɛ ɔ he, konɛ níhi a mi nɛ hi ha mo, nɛ o wami se nɛ kɛ, nɛ o plɔke.

8 “Ke o po we he ɔ, moo hyɛ nɛ o wo o tsu yi bumi ɔ he aklabatsa kɛ bɔle lɛ kɛ kpe. Ke o pee ja a, lɛɛ ke nɔ ko sane kɛ je tsu ɔ yi mi kɛ ba nɔ si nɛ e gbo ɔ, tɔmi ɔ ji mo.

9 ⓩ “Ko du nɔ́ kpa ko ngɛ ngmɔ mi he nɛ o du wai ngɛ ɔ; ke o pee ja a, o be he blɔ kaa o yeɔ wai yiblii ɔ, loo nɔ́ kpa a nɛ o du ɔ.

10 “Ko bla na kɛ teji kɛ wo kuɛpã kake he kɛ hu.

11 “Koo wo tade nɛ a bla to he bwɔmi, kɛ doti kɛ lo.

12 ⓐ “Moo kpɛ deke kɛ wo bo nɛ o haa a nya eywiɛ ɔmɛ tsuo.

Nyumu kɛ yo bɔmi nɛ he tsɔ we he mlaahi

13 “Waa ngɔ lɛ kaa nyumu ko ya ngɔ yiheyo ko, nɛ benɛ e kɛ lɛ ya hwɔ ɔ, e sume lɛ hu.

14 Enɛ ɔ he ɔ, e po sanehi nɛ be mi kɛ fɔ yiheyo ɔ nɔ ke pi yomiyo ji lɛ, ejakaa e nɛ lɛ ngɛ we benɛ e kɛ lɛ ya hwɔ ɔ.

15 “Ke nɔ́ ko kaa ja ba mi ɔ, yiheyo ɔ fɔli nɛ a ngɔ sa nɔ bo hiɔ kɛ e mi muɔ nɛ ayɛflo ɔ kɛ e huno ɔ hwɔ nɔ kpeemi ligbi ɔ kɛ ya tsɔɔ ma nimeli ɔmɛ ngɛ kojomi he ɔ. Enɛ ɔ a kɛ maa na anɔkuale ɔ, kaa niinɛ yomiyo ji a bi ɔ nɛ.

16 Yiheyo ɔ tsɛ ma de nimeli ɔmɛ ke, ‘Nyumu nɛ ɔ ba bi ye biyo si, nɛ e kɛ lɛ sɛ gba si himi mi; se jehanɛ e sume lɛ hu,

17 lɔ ɔ he ɔ, e po he guɛ gbemi munyu kɛ fɔ e nɔ ke biyo ɔ pi yomiyo benɛ e ngɔ lɛ ɔ. Se okadi nɛ tsɔɔ kaa ye biyo ɔ yomiyo ji lɛ ɔ ji nɛ ɔ nɛ.’ Bitsɛ ɔ nɛ bli sa nɔ bo ɔ mi kɛ tsɔɔ ma nimeli ɔmɛ.

18 Kɛkɛ ɔ, ma nimeli ɔmɛ nɛ a nu yiheyo ɔ huno ɔ, nɛ a fiaa lɛ kpa.

19 A ma he lɛ sika hiɔ yi lafa, aloo susumi nɔ́ nɛ a tsɛɛ kilo ɔ kake kɛ piɛ he kɛ ha yiheyo ɔ tsɛ ɔ; ejakaa nyumu ɔ wo Israel yomiyo he ní. Jehanɛ hu a ha nɛ e ngɔ yo ɔ; e be he blɔ kaa e fieɔ lɛ kɛ yaa si e ma gbo.

20 “Se ke sane ɔ ngɛ mi niinɛ, nɛ okadi nɔ́ ko be nɛ tsɔɔ kaa e huno ɔ na lɛ ngɛ we ɔ,

21 lɛɛ a kɛ yiheyo ɔ nɛ ba e tsɛ we ɔ agbo ɔ nya, nɛ́ e ma a mi nyumu ɔmɛ nɛ a fiaa lɛ tɛ nɛ e gbo. E tsu zo ní ngɛ wa ma mi bi ɔmɛ a kpɛti, kaa e le nyumu be mi nɛ e ngɛ e tsɛ we mi loko a ba ngɔ lɛ. Pee jã kɛ je yayami nɛ ɔ kɛ je nyɛ kpɛti.

22 “Ke a nu nyumu ko nɛ e kɛ nɔ kpa e yo ngɛ hwɔe ɔ, á gbe mɛ ni enyɔ ɔmɛ tsuo. Pee jã kɛ je yayami nɛ ɔ kɛ je nyɛ kpɛti.

23 “Waa ngɔ lɛ kaa a nu nyumu ko nɛ e kɛ yiheyo nɛ a bi e si ha nɔ ko ya na bɔmi ngɛ ma a mi.

24 A kɛ mɛ ni enyɔ ɔmɛ tsuo nɛ je ma a mi, nɛ a ya fiaa mɛ tɛ nɛ a gbo. A gbe yiheyo ɔ, ejakaa ma a mi he nɛ a tsu zo ní nɛ ɔ ngɛ ɔ, kaa e kpa ngmlaa jinɛ ni komɛ maa nu, nɛ a ma ba je ngmlaa ha lɛ. Nyumu ɔ hu, á gbe lɛ, ejakaa e kɛ yiheyo nɛ nɔ ko bi e si ya na bɔmi. Pee jã kɛ je yayami nɛ ɔ kɛ je nyɛ kpɛti.

25 “Se ke nga mi nɛ nyumu ko ya nu yiheyo ko nɛ a bi e si ngɛ, nɛ e kɛ lɛ na bɔmi ɔ, lɔ ɔ lɛɛ á gbe nyumu ɔ pɛ,

26 a ko pee yiheyo ɔ nɔ́ ko, ejakaa e pee we nɔ́ ko nɛ sa gbenɔ. Munyu nɛ ɔ ngɛ kaa bɔ nɛ nɔ ko woɔ nɔ ká nɛ e ya gbee lɛ ɔ pɛ.

27 Nyumu ɔ ya nu yiheyo nɛ a bi e si ɔ ngɛ nga mi, nɛ eko ɔ e kpa ngmlaa lɛɛ, se nɔ ko be nɛ ma ba je ngmlaa ha lɛ.

28 ⓑ “Ke nyumu ko na yomiyo nɛ a bi we e si, nɛ e nu lɛ kã nya nɛ e kɛ lɛ na bɔmi, nɛ a nu mɛ ɔ,

29 nyumu ɔ nɛ wo yomiyo ɔ tsɛ ɔ sika hiɔ yi nyingmi enuɔ nɛ ji yo se ní ɔ; nɛ a ha nɛ e ngɔ yo ɔ, ejakaa e puɛ lɛ. E ko ngmɛɛ yo ɔ he kɛ yaa si e ma gbo.