Marko 5

Yesu tsa nyumu ko nɛ mumi yayami ngɛ e mi

(<x>470 8:28-34</x>; <x>490 8:26-39</x>)

1 Yesu kɛ e kaseli ɔmɛ ba Galilea wo ɔ se ngɛ Gerasa bi ɔmɛ a zugba a mi.

2 Benɛ Yesu kple si kɛ je lɛ ɔ mi pɛ kɛkɛ nɛ nyumu ko nɛ mumi yayami ngɛ e mi nɛ je yɔkɔ ɔmɛ a mi kɛ lɛ ba kpe.

3 Kikɛmɛ a nyumu nɛ ɔ yɔkɔhi a mi e hii, nɛ nɔ ko nɔ ko nyɛ we nɛ e fi lɛ hu kɛ kɔsɔkɔsɔ po.

4 A bɔ lɛ pã, nɛ a wo lɛ kɔsɔkɔsɔ si abɔ, se be tsuaa be ɔ, e tsɔɔ kɔsɔkɔsɔ ɔ, nɛ e kuɔɔ pã a; lɔ ɔ he ɔ, nɔ ko nɔ ko nyɛ we nyumu nɛ ɔ he nɛ e jɔɔ.

5 Nyɔ kɛ pia tsuo yɔkɔ ɔmɛ kɛ ɔmɛ a mi e hii; e kpaa ngmlaa nɛ e kɛ tɛ poɔ e he.

6 Se benɛ e na Yesu ngɛ lokoo ɔ, e tu fo kɛ ba e ngɔ, nɛ e ba kpla si ngɛ e hɛ mi,

7 nɛ e kpa ngmlaa wawɛɛ ke, “Yesu, Mawu nɛ ngɛ hiɔwe lokoo ɔ bi, mɛni o ngɛ hlae ngɛ ye dɛ? I na Mawu kaa kó pĩ mi!”

8 (E de enɛ ɔ, ejakaa Yesu ke e yi ke, “Mo mumi yayami, jee nyumu ɔ mi!”)

9 Kɛkɛ nɛ Yesu bi lɛ ke, “Kɛ a tsɛɛ mo kɛɛ?” Nyumu ɔ he nɔ ke, “Ye biɛ ji Asafo, ejakaa wa he hiɛ.”

10 E kpa Yesu pɛɛ hluu ke e ko fie mumi yayami ɔmɛ kɛ je lejɛ ɔ ní ɔmɛ a mi.

11 Kpotoo kuu nguaa ko ngɛ lejɛ ɔ nɛ a ngɛ ní yee ngɛ yoku ɔ he.

12 Mumi yayami ɔmɛ kpa Yesu pɛɛ ke, “Ha nɛ wa ya sɛ kpotoo ɔmɛ a mi.”

13 E kplɛɛ, nɛ mumi yayami ɔmɛ je nyumu ɔ mi ya sɛ kpotoo ɔmɛ a mi. Kuu nguaa a tsuo, maa pee akpe enyɔ ɔ sa fo kɛ kple si kɛ ya sɛ wo ɔ mi, nɛ a gbo.

14 Kpotoo nɔ hyɛli ɔmɛ tu fo nɛ a ya sɛɛ nɔ́ nɛ ɔ ngɛ ma a, kɛ kɔpe ɔmɛ a mi. Ni ɔmɛ je kpo konɛ a ba hyɛ nɔ́ nɛ ba a.

15 A ba Yesu ngɔ, nɛ a ba na nyumu ɔ nɛ jinɛ mumi yayamihi asafo ngɛ e mi ɔ. E hii si kɛ e he tade, nɛ e hɛ mi tsɔ lɛ. Enɛ ɔ pee mɛ gbeye.

16 Nihi nɛ na nɔ́ nɛ ba nyumu ɔ nɛ mumi yayamihi hi e mi ɔ, kɛ kpotoo ɔmɛ a nɔ ɔ, sɛɛ sane ɔ ha ni ɔmɛ nɛ ba a.

17 Lɔ ɔ he ɔ, a kpa Yesu pɛɛ ke e je a zugba a mi.

18 Jehanɛ benɛ Yesu ngɛ lɛ ɔ mi sɛe ɔ, nyumu ɔ nɛ jinɛ mumi yayami ngɛ e mi ɔ kpa Yesu pɛɛ ke e kɛ lɛ maa ya.

19 Se Yesu kplɛɛ we; mohu e de lɛ ke, “Kpale o se, nɛ o ho we mi ya! Yaa o weku li a ngɔ nɛ o ya sɛɛ ní nguanguahi nɛ Nyɔmtsɛ ɔ pee ha mo ɔ; de mɛ bɔ nɛ e na mo mɔbɔ.”

20 Lɔ ɔ he ɔ, nyumu ɔ pue nɔ kɛ ho, nɛ e ya bɔni ní nguahi nɛ Yesu pee ha lɛ ɔ fiɛmi ngɛ Ma Nyɔngma[2] amɛ a mi. Nɛ nihi tsuo nɛ nu ɔ, a nya kpɛ a he.

Yairo biyo ɔ, kɛ yo ɔ nɛ ta Yesu tade he ɔ

(<x>470 9:18-26</x>; <x>490 8:40-56</x>)

21 Yesu sɛ lɛ ɔ mi kɛ kpale kɛ ho wo ɔ se ya, nɛ nihi babauu ba bu e nɔ ngɛ wo ɔ nya.

22 Kɛkɛ nɛ kpe he ɔ nɔkɔtɔma nɛ a tsɛɛ lɛ Yairo ɔ ba lejɛ ɔ. Benɛ e na Yesu ɔ, e ba kpla si ngɛ e nane nya,

23 nɛ e fa kue wawɛɛ ha lɛ ke, “Ye biyo wayoo miɔ nɛ e ma gbo. Ba nɛ o kɛ o nine ba pue e nɔ, konɛ e na he wami, nɛ e yi nɛ na wa.”

24 Yesu kɛ nyumu ɔ ho. Nihi babauu nyɛɛ e se nɛ a mia lɛ.

25 Yo ko ngɛ lejɛ ɔ nɛ muɔ ngɛ dɛe ngɛ e he jeha nyɔngma kɛ enyɔ sɔuu.

26 E kpa tsopatsɛmɛ a nɔ hluu nɛ e dɛ mi ta, se hiɔ ɔ bɛ si; mohu pe e ngɛ nɔ puee.

27 Yo nɛ ɔ nu Yesu he sane, lɔ ɔ he ɔ, e ba je e se je ngɛ ni ɔmɛ a kpɛti, nɛ e ta e tade ɔ he.

28 Ejakaa e de ngɛ e yi mi ke, “Ke i ná ta e tade ɔ he kɛkɛ ɔ, ma na he wami.”

29 Benɛ e ta Yesu tade ɔ he ɔ, amlɔ nɔuu ɔ, muɔ ɔ jɔɔ dɛmi, nɛ e nu he ngɛ e nɔmlɔ tso ɔ mi kaa a tsa lɛ.

30 Yesu nu he ngɛ e mi kaa he wami je e mi, nɛ e plɛ si kake too nɛ e bi ke, “Mɛnɔ ta ye tade ɔ he ɔ?”

31 E kaseli ɔmɛ he nɔ ke, “O ngɛ hyɛe kaa asafo ɔ ngɛ mo miae, nɛ o pa ngɛ bie ke, mɛnɔ ta o he lo?”

32 Yesu hyɛ ni ɔmɛ a kpɛti kɛ be kaa e maa na nɔ nɛ ta e he ɔ lo.

33 Akɛnɛ yo ɔ le nɔ́ nɛ a pee ha lɛ he je ɔ, e kɛ gbeye yemi, kɛ he domi ba kpla si ngɛ Yesu hɛ mi, nɛ e de lɛ anɔkuale ɔ tsuo.

34 Yesu de lɛ ke, “Biyo, o hemi kɛ yemi tsa mo! O hiɔ ɔ nɛ jɔ! Yaa ngɛ he jɔmi mi.”

35 Benɛ Yesu ngɛ munyu ɔ tue ɔ, ni komɛ je Yairo nɛ ji kpe he nɔkɔtɔma a we ɔ mi ba de lɛ ke, “O biyo ɔ gbo; mɛni he je o pa ngɛ tsɔɔlɔ ɔ nya dooe?”

36 Benɛ Yesu nu munyu nɛ a tu ɔ, e de Yairo ke, “Koo ye gbeye; mo he ye kɛkɛ!”

37 E ha we nɛ nɔ ko nɔ ko nɛ nyɛɛ e se, ja Petro, Yakobo, kɛ Yakobo nyɛmi Yohane pɛ.

38 A ba Yairo we ɔ mi, nɛ Yesu ba na kaa lejɛ ɔ pee hoo. Nihi wo yana nɛ a ngɛ awe nyae.

39 Benɛ e sɛ we ɔ mi ɔ, e de mɛ ke, “Mɛni he je nyɛ ngɛ hoo pee nɛ nyɛ ngɛ ya foe kikɛ nɛ ɔ? Jokuɛ ɔ gbo we; mahe kɛkɛ e ngɛ hwɔe.”

40 Se ni ɔmɛ muɔ lɛ. Kɛkɛ nɛ e fie mɛ tsuo kɛ je kpo, nɛ e ngɔ jokuɛ ɔ tsɛ kɛ e nyɛ, kɛ nihi nɛ piɛ e he ɔ kɛ sɛ tsu mi he nɛ jokuɛ ɔ hwɔɔ si ngɛ ɔ.

41 E nu jokuɛ ɔ nine si, nɛ e de lɛ ke, “Talita kum.” E sisi ji, “Jokuɛ yo, i ngɛ mo dee ke tee si!”

42 Amlɔ ɔ, jokuɛ yo ɔ te si nɛ e bɔni nyɛɛmi. (E ye jeha nyɔngma kɛ enyɔ.) Ni ɔmɛ a nya kpɛ a he nitsɛnitsɛ ngɛ nɔ nɛ ba nɛ ɔ he.

43 Se Yesu wo mɛ si veveeve ke a ko ha nɔ ko nɔ ko nɛ le nɔ nɛ ba a. Kɛkɛ nɛ e fa ke a ha lɛ nɔ́ ko nɛ e ye.