Marko 4

Ní dulɔ he abɛ

(<x>470 13:1-9</x>; <x>490 8:4-8</x>)

1 ⓞ Yesu bɔni ní tsɔɔmi ekohu ngɛ Galilea wo ɔ nya. Nihi nɛ ba bua a he nya ngɛ e ngɔ ɔ, a he hiɛ babauu, lɔ ɔ he ɔ, e sɛ lɛ ko mi nɛ e ya hi si. Lɛ ɔ ngɛ wo ɔ nɔ, nɛ ni ɔmɛ tsuo pueɔ si ngɛ wo ɔ nya.

2 E tsɔɔ mɛ níhi fuu ngɛ abɛ gbi mi. E de mɛ ke,

3 “Nyɛɛ bu tue! Nyumu ko pue nɔ kɛ ho nɛ e ya du ní.

4 Benɛ e ngɛ wu ɔmɛ fĩae ɔ, ekomɛ ya pue blɔ tue, nɛ lohwe pɛlitsɛmɛ ba kukuɔ.

5 Ekomɛ ya pue tɛ sa nɔ he nɛ zu fuu be. A puɛ oya, ejakaa zu ɔ mi kuɔ we.

6 Se benɛ pu je ɔ, e sã mɛ nɛ a ngla, ejakaa a be sipoku nɛ ya zu mi bɔ nɛ sa.

7 Wu ɔmɛ ekomɛ ya pue miohi a kpɛti. Mio ɔ mia mɛ benɛ a ngɛ wae ɔ, nɛ a wui yiblii ko.

8 Se wu ɔmɛ ekomɛ ya pue zugba kpakpa nɔ. Mɛɛ lɛɛ a puɛ nɛ a wa, nɛ a wo yiblii, eko nyingmi etɛ, eko nyingmi ekpa, kɛ eko lafa.”

9 Yesu gbe munyu nɛ ɔ nya ke, “Nɔ nɛ ngɛ tue nɛ nuɔ nɔ́ ɔ, e nu.”

Nɔ́ he je nɛ Yesu bu abɛhi

(<x>470 13:10-17</x>; <x>490 8:9-10</x>)

10 Benɛ e piɛ Yesu nɔ kake too ɔ, nihi nɛ ba bu lɛ tue ɔ, a ti ni komɛ kɛ kaseli nyɔngma kɛ enyɔ ɔmɛ bi lɛ abɛ ɔ sisi.

11 E de mɛ ke, “Nyɛɛ lɛɛ a ha nyɛ he blɔ kaa nyɛɛ le laami sanehi nɛ ngɛ Mawu matsɛ yemi ɔ mi; se ni kpa amɛ lɛɛ abɛ gbi mi a deɔ mɛ sane ɔmɛ ngɛ,

12 ⓟ konɛ ‘Ke a na a, a ko kɔ se, nɛ ke a nu ɔ, a ko nu sisi. Ke pi jã a, a maa kpale kɛ ba Mawu ngɔ, nɛ e kɛ a he yayami ɔmɛ maa pa mɛ.’ ”

Yesu tsɔɔ ní dulɔ he abɛ ɔ sisi

(<x>470 13:18-23</x>; <x>490 8:11-15</x>)

13 Kɛkɛ nɛ Yesu bi mɛ ke, “Anɛ nyɛ nui abɛ nɛ ɔ sisi? Lɛɛ kɛ nyɛ maa pee kɛɛ nɛ nyɛ maa nu abɛ ɔmɛ tsuo a sisi mɔ?

14 Bɔ nɛ Mawu munyu fiɛlɔ tsuɔ ní ɔ, lɔ ɔ a kɛ to ní dulɔ he ɔ nɛ.

15 Ni komɛ ngɛ kaa wu nɛ ya nɔ blɔ mi. Ke a nu munyu ɔ, kɛkɛ Abosiami ba je munyu ɔ ngɛ a mi.

16 Ni komɛ hu ngɛ kaa wu nɛ ya nɔ tɛ sa zugba mi. Ke a nu munyu ɔ, a heɔ lɛ nɔuu kɛ bua jɔmi.

17 Se e he we si ngɛ a mi; nɛ e se kɛ we. Lɔ ɔ he ɔ, ke amanehlu, loo yi mi wami te si ngɛ munyu ɔ he ɔ, a ngmɛɛɔ he oya.

18 Ni kpa komɛ hu ngɛ kaa wu nɛ a du ngɛ mio mi. Ni nɛ ɔmɛ nuɔ munyu ɔ,

19 se je nɛ ɔ mi he nya gbami, ní nami he suɔmi, kɛ ní kpahi a he akɔnɔ sɛɛ a mi, nɛ a gbee munyu ɔ ngɛ a mi, nɛ a wui yiblii.

20 Se ni kpa komɛ ngɛ kaa wuhi nɛ ya nɔ zu kpakpa nɔ. Mɛɛ lɛɛ ke a nu munyu ɔ, a pɛtɛɛ he, nɛ a woɔ yiblii, eko nyingmi etɛ, eko nyingmi ekpa, kɛ eko lafa.”

Kane nɛ a kɛ ma sowe sisi

(<x>490 8:16-18</x>)

21 ⓠ Yesu tsa nɔ ke, “Anɛ nɔ ko suɔ kane kɛ maa sowe, loo sa tso sisi? Anɛ pi kane tso nɔ nɛ e kɛ maa?

22 ⓡ Nɔ́ ko be nɛ a kɛ laa nɛ a be kpo jee, nɛ nɔ́ ko be nɛ a pee ngɛ diblii mi nɛ a kɛ be la hɛ mi bae.

23 Nɔ nɛ ngɛ tue nɛ nuɔ nɔ́ ɔ, e nu.”

24 ⓢ E de mɛ hu ke, “Nyɛ susu nɔ́ nɛ nyɛ ngɛ nue nɛ ɔ he saminya! Mlaahi nɛ nyɛ kɛ kojoɔ ni kpahi ɔ, lɔ ɔ Mawu kɛ maa kojo nyɛ; nɛ nyɛ kojomi ɔ nya maa wa wawɛɛ.

25 ⓣ Nɔ nɛ ngɛ nɔ́ ko ɔ, a ma ha lɛ eko ngɔ piɛ he; se nɔ nɛ be nɔ́ ko tsɔ ko ɔ, bɔɔ nɛ e ngɛ ɔ tete a ma kpɔ ngɛ e dɛ.”

Bɔ nɛ wu nɛ a du puɛɔ nɛ e waa

26 Yesu tsa nɔ ke, “Mawu matsɛ yemi ɔ ngɛ kaa bɔ nɛ a duɔ wu nɛ e waa. Nyumu ko ya fĩaa ní ngɛ e zugba nɔ.

27 E ya hwɔɔ si nyɔ mi, nɛ ke je na a, e teɔ si. Be nɛ ɔ mi tsuo ɔ, wu ɔmɛ ngɛ puɛe nɛ a ngɛ wae, se kɛ̃ e li nɔ́ nɛ ngɛ nɔ yae.

28 Zugba a nitsɛ lɛ haa ní ɔmɛ waa nɛ a woɔ yiblii, ba mumu ɔ kekle, kɛkɛ ɔ tso ɔ, nɛ lɔ ɔ se ɔ, ngma a nitsɛ ngɛ tso ɔ yi mi.

29 ⓤ Ke ngma a wa a, nyumu ɔ ngɔɔ ngma kpami ha a kɛ yaa amlɔ nɔuu, ejakaa ngma kpami be ɔ su.”

Wu nyafii pe kulaa a

(<x>470 13:31-32</x>, <x>470 13:34</x>; <x>490 13:18-19</x>)

30 Yesu bi mɛ ke, “Mɛni he wa maa ngɔ Mawu matsɛ yemi ɔ kɛ to? Aloo mɛni abɛ wa maa bu kɛ tsɔɔ nya?

31 E ngɛ kaa nɔ ko nɛ ngɔ wu nyafii pe kulaa ngɛ je ɔ mi ya du.

32 Be bɔɔ se ɔ, wu ɔ puɛɔ nɛ e ba kleɔ pe pu mi tso ɔmɛ tsuo. E tsɛ̃ɔ kɔni nguanguahi, nɛ lohwe pɛlitsɛmɛ peeɔ a tsu ngɛ kɔni ɔmɛ a nɔ.”

33 Yesu gu abɛhi fuu nɛ ngɛ kaa enɛ ɔmɛ a nɔ nɛ e kɛ fiɛ munyu ɔ tsɔɔ ni ɔmɛ bɔ nɛ a ma nyɛ nu sisi.

34 Abɛhi a mi pɛ e kɛ mɛ tuɔ munyu ngɛ, se ke e piɛ e kɛ e kaseli ɔmɛ pɛ ɔ, e tsɔɔ mɛ abɛ ɔmɛ tsuo a sisi.

Yesu jɔɔ wo nɔ kɔɔhiɔ nɛ nya wa he

(<x>470 8:23-27</x>; <x>490 8:22-25</x>)

35 Jamɛ a ligbi ɔ nɔuu, benɛ e su gbɔkuɛ nya si ɔ, Yesu de e kaseli ɔmɛ ke, “Nyɛ ha waa po wo ɔ kɛ ya e se je.”

36 Lɔ ɔ he ɔ, kaseli ɔmɛ si nimli kpekpemi ɔ, nɛ a ya piɛ Yesu he ngɛ lɛ ɔ mi, nɛ a kɛ lɛ ho. Lɛ kpa komɛ hu fie a se.

37 Kɛkɛ nɛ wo nɔ kɔɔhiɔ nɛ nya wa hia, nɛ oslɔke bɔni kumi kɛ ngɛ lɛ ɔ mi woe, nɛ nyu miɔ nɛ e ma hyi lɛ ɔ.

38 Be nɛ ɔ mi tsuo ɔ, Yesu tslɔ sɔnue kɛ hwɔɔ si ngɛ lɛ ɔ supa je. Kaseli ɔmɛ ba tsɛ̃ɛ̃ lɛ nɛ a de lɛ ke, “Tsɔɔlɔ, nɛ wa hɛ mi ngɛ kpatae nɛ ɔ, pi o he sane ko lo?”

39 Yesu te si, nɛ e nga kɔɔhiɔ ɔ yi, nɛ e de wo ɔ ke, “Ngmɛɛ dii!” Kɔɔhiɔ ɔ jɔɔ fiami, nɛ wo ɔ ngmɛ dii.

40 Kɛkɛ nɛ Yesu de e kaseli ɔmɛ ke, “Mɛni he je nyɛ ngɛ gbeye yee kikɛ nɛ ɔ? Kɛ pee kɛɛ loko nyɛ be hemi kɛ yemi ɔ?”

41 Se mɛɛ a he mi po, nɛ a bi a he ke, “Mɛnɔ ji nɛ ɔ nɛ kɔɔhiɔ kɛ wo tete buɔ lɛ tue nɛ ɔ!”