Mateo 26

A so Yesu yi nɔ

(<x>480 14:1-2</x>; <x>490 22:1-2</x>; <x>500 11:45-53</x>)

1 Benɛ Yesu tu munyu nɛ ɔmɛ tsuo gbe nya a, e de e kaseli ɔmɛ ke,

2 ⓩ “Kaa bɔ nɛ nyɛ le ɔ, e piɛ ligbi enyɔ pɛ nɛ a maa ye Hetsɔmi ɔ, nɛ a maa ngɔ Nɔmlɔ Bi ɔ ngɔ ha nɛ a ya sɛu lɛ.”

3 Jamɛ a be ɔ mi ɔ, osɔfo nikɔtɔma amɛ, kɛ ma nimeli ɔmɛ ya bua a he nya ngɛ osɔfo nɔkɔtɔma pe kulaa Kayafa mɔ ɔ mi,

4 nɛ a ya so bɔ nɛ a maa pee kɛ nu Yesu ga mi, nɛ a gbe lɛ.

5 A de ke, “Wa be nɔ́ nɛ ɔ pee nyami be ɔ mi, konɛ basabasa kó ba ma a mi.”

A pɔ Yesu nu ngɛ Betania

(<x>480 14:3-9</x>; <x>500 12:1-8</x>)

6 Jehanɛ Yesu ba su Betania, nɛ e ba Simon we ɔ mi. Simon nɛ ɔ nu he womi nɔ hiɔ yaya hyɛ.

7 ⓐ Benɛ Yesu ngɛ ní yee ɔ, yo ko hɛɛ alabastro tɔ kɛ e mi nu kɛ e he via nɛ he jua wa kɛ ba e ngɔ. Nɛ e plɛ nu ɔ kɛ pue Yesu yi mi.

8 Benɛ e kaseli ɔmɛ na a, a mi mi fu, nɛ a bi ke, “Kɛ ji yaka ní puɛmi nɛ ɔ sisi kɛɛ?

9 Nu kɛ e he via nɛ ɔ, a ko jua we sika fuu, nɛ a ngɔ ha ohiatsɛmɛ lo?”

10 Se Yesu na a juɛmi ɔ momo. Lɔ ɔ he ɔ, e bi mɛ ke, “Mɛni he je nyɛ ngɛ yo ɔ nya dooe? E tsu ní tsumi saminyayoo ha mi.

11 ⓑ Ejakaa nyɛɛ kɛ ohiatsɛmɛ ɔmɛ maa hi si daa; se imi lɛɛ pi daa nɛ i kɛ nyɛ maa hi si.

12 Nu kɛ e he via nɛ ɔ nɛ e plɛ ngɔ pue ye nɔmlɔ tso nɔ ɔ, e kɛ dla mi ngɔ to ye pumi be.

13 Niinɛ, i ngɛ nyɛ dee ke, je nɛ ɔ mi he tsuaa he nɛ a maa fiɛ sane kpakpa nɛ ɔ ngɛ ɔ, a maa sɛɛ nɔ́ nɛ yo nɛ ɔ pee nɛ ɔ hu kɛ kai lɛ.”

Yuda kplɛɛ kaa e maa tsɔɔ Yesu se blɔ

(<x>480 14:10-11</x>; <x>490 22:3-6</x>)

14 Kɛkɛ nɛ kaseli nyɔngma kɛ enyɔ ɔmɛ a kpɛti nɔ kake nɛ a tsɛɛ lɛ Yuda Iskariot ɔ pue nɔ kɛ ho osɔfo nikɔtɔma amɛ a ngɔ ya,

15 ⓒ nɛ e ya de mɛ ke, “Ke i je Yesu ngɔ wo nyɛ dɛ mi ɔ, mɛni nyɛ ma ha mi?” A kane sika hiɔ yi nyingmi etɛ ngɔ ha lɛ,

16 nɛ kɛ je jamɛ a be ɔ mi ɔ, Yuda hla Yesu he blɔ, konɛ e ngɔ lɛ kɛ wo a dɛ mi.

Yesu kɛ e kaseli ɔmɛ ye Hetsɔmi niye ní ɔ

(<x>480 14:12-21</x>; <x>490 22:7-13</x>, <x>490 22:21-23</x>; <x>500 13:21-30</x>)

17 Abolokplolo nyami be ɔ we kekleekle ligbi ɔ, kaseli ɔmɛ ba Yesu ngɔ ba bi lɛ ke, “Jije o suɔ kaa wa ya dla ha mo nɛ o ye Hetsɔmi ɔ ngɛ?”

18 E de mɛ ke, “Nyɛɛ ya asimasi ngɔ ngɛ ma a mi, nɛ nyɛ ya de lɛ ke, ‘Tsɔɔlɔ ɔ ke, Ye be ɔ su; i kɛ ye kaseli ɔmɛ ma ba ye Hetsɔmi ɔ ngɛ o we ɔ mi.’ ”

19 Kaseli ɔmɛ ya pee bɔ nɛ Yesu de mɛ ɔ, nɛ a pee niye ní ɔ nɛ a kɛ maa ye Hetsɔmi ɔ ngɔ to.

20 Gbɔkuɛ ɔ, Yesu kɛ e kaseli nyɔngma kɛ enyɔ ɔmɛ ya hi si ngɛ okplɔɔ ɔ he.

21 Benɛ a ngɛ ní ɔ yee ɔ, Yesu de ke, “Niinɛ, i ngɛ nyɛ dee ke, nyɛ ti nɔ kake maa tsɔɔ ye se blɔ.”

22 Nɔ́ nɛ ɔ ha kaseli ɔmɛ hao wawɛɛ, nɛ a bɔni lɛ bimi kakaaka ke, “Nyɔmtsɛ, imi lo?”

23 ⓓ Yesu he nɔ ke, “Nɔ nɛ maa tsɔɔ ye se blɔ ɔ, e kɛ mi ngɛ ní yee ngɛ kaa nɛ ɔ mi.

24 Nɔmlɔ Bi ɔ ma gbo kaa bɔ nɛ a ngma ngɛ e he ɔ, se musu tloo nɔ nɛ maa tsɔɔ e se blɔ ɔ! Afani nɛ a fɔ we jamɛ a nɔmlɔ ɔ!”

25 Yuda, nɔ nɛ tsɔɔ e se blɔ ɔ, bi lɛ ke, “Tsɔɔlɔ, imi lo?” Yesu he nɔ ke, “Ja o de ɔ nɛ.”

Nyɔmtsɛ ɔ niye ní ɔ

(<x>480 14:22-26</x>; <x>490 22:14-20</x>; <x>530 11:23-25</x>)

26 Benɛ a ngɛ ní ɔ yee ɔ, Yesu kɛ̃ abolo nɛ e gbaa nɔ, nɛ e ku mi, nɛ e ngɔ ha e kaseli ɔmɛ, nɛ e ke, “Nyɛ he nɛ nyɛɛ ye! Enɛ ɔ ji ye nɔmlɔ tso ɔ nɛ.”

27 Enɛ ɔ se ɔ, e wo kplu, nɛ e na Mawu si, nɛ e ngɔ ha mɛ, nɛ e ke, “Nyɛ tsuo nyɛɛ nu.

28 ⓔ Enɛ ɔ ji ye muɔ nɛ a kɛ sɔu Mawu somi ɔ nya. A plɛ ye muɔ ɔ ngɔ pue si ha nihi fuu, konɛ a ngɔ a he yayamihi ngɔ pa mɛ.

29 I ngɛ nyɛ dee ke, i be wai nɛ ɔ nue hu gblegbleegble kɛ yaa si ligbi ɔ nɛ i kɛ nyɛ maa nu wai he ɔ ngɛ Tsaatsɛ matsɛ yemi ɔ mi.”

30 Kɛkɛ nɛ a la yi jemi la, nɛ a je kpo, nɛ a pue nɔ kɛ ho Oliv yo ɔ nɔ ya.

Yesu gba ngɔ to kaa Petro ma kua lɛ

(<x>480 14:27-31</x>; <x>490 22:31-34</x>; <x>500 13:36-38</x>)

31 ⓕ Jehanɛ ɔ, Yesu de mɛ ke, “Nyɔ nɛ ɔ mi ɔ, nyɛ tsuo nyɛ maa tu fo kɛ je ye he. Ejakaa a ngma ke, ‘Ma fia to hyɛlɔ ɔ nɔ, nɛ to kuu ɔ maa gbɛ fĩa.’

32 ⓖ Se ke a tle mi si kɛ ba wami mi ekohu ɔ, ma sɛ nyɛ hlami kɛ maa ya Galilea.”

33 Petro ka Yesu kita, nɛ e de ke, “Ke ni ɔmɛ tsuo si mo ɔ, imi lɛɛ i be mo sie gblegbleegble!”

34 Yesu de Petro ke, “Niinɛ, i ngɛ mo dee ke, nyɔ nɛ ɔ mi ɔ, loko kungwɔ ma kpa nɔ́ ɔ, o ma de si etɛ ke o li mi.”

35 Petro de lɛ ke, “Dɛbi! Ke i kɛ mo ma gbo tete po, i be mo kuae kɔkɔɔkɔ!” Kaseli nɛ piɛ ɔ, mɛ hu a tu munyu ja nɔuu.

Yesu ya sɔle ngɛ Getsemane

(<x>480 14:32-42</x>; <x>490 22:39-46</x>)

36 Enɛ ɔ se ɔ, Yesu kɛ e kaseli ɔmɛ ya he ko nɛ a tsɛɛ ke Getsemane, nɛ e de mɛ ke, “Nyɛɛ hi si ngɛ hiɛ ɔ, nɛ ma ya hɛ mi bɔɔ ma ya sɔle.”

37 E ngɔ Petro, kɛ Zebedeo binyumuhi enyɔ ɔmɛ ngɔ piɛ e he. Aywilɛho nu lɛ, nɛ e hao;

38 nɛ e de mɛ ke, “Aywilɛho nɛ nya wa miɔ nɛ e maa gbe mi; nyɛɛ hi si ngɛ hiɛ ɔ nɛ nyɛɛ kɛ mi nɛ fɔ nyɔ.”

39 E ya e hɛ mi bɔɔ, nɛ e ya kpla si, nɛ e ngɔ e hɛ mi ngɔ bu si, nɛ e sɔle ke, “Tsaatsɛ, ke e maa hi ɔ, je amanehlu kplu nɛ ɔ kɛ je ye he kɛ ya se! Se kɛ̃ ɔ, a pee bɔ nɛ mo o suɔ; pi nɔ́ nɛ i suɔ.”

40 Benɛ e kpale kɛ ba kaseli etɛ ɔmɛ a ngɔ ɔ, e na kaa a hwɔ mahe. Lɔ ɔ he ɔ, e de Petro ke, “Lɛɛ nyɛ nyɛ we nɛ nyɛɛ kɛ mi nɛ fɔ nyɔ ngmlɛfia kake po?

41 Nyɛɛ fɔ nyɔ nɛ nyɛɛ sɔle, konɛ nyɛ ko sɛ ka mi. Mumi ɔ lɛɛ e suɔ kaa e maa pee jã, se he lo ɔ gbede.”

42 Yesu pue nɔ kɛ ho si enyɔne, nɛ e ya sɔle ke, “Tsaatsɛ, ke a be amanehlu kplu nɛ ɔ jee kɛ je ye he kɛ ya se, nɛ ja i nu ɔ, lɛɛ a pee bɔ nɛ o suɔ.”

43 E kpale kɛ ba kaseli ɔmɛ a ngɔ ekohu, nɛ e ba na kaa a hwɔ mahe, ejakaa nyɔ gbe mɛ.

44 Yesu si mɛ ekohu, nɛ e ho ya sɔle si etɛne, nɛ e tu jamɛ a munyu ɔ nɔuu.

45 Jehanɛ ɔ lɛɛ e kpale kɛ ba e kaseli ɔmɛ a ngɔ, nɛ e ba de mɛ ke, “Nyɛ he mi jɔ nyɛ nɛ nyɛ ngɛ mahe hwɔe kɛ mwɔɔ? Hyɛ! Ngmlɛfia a su ta, nɛ a maa ngɔ Nɔmlɔ Bi ɔ kɛ wo yayami peeli a dɛ mi.

46 Nyɛɛ te nɛ waa ho. Hyɛ, nɔ nɛ ngɛ ye se blɔ tsɔɔe ɔ lɛ ma a nɛ!”

A nu Yesu

(<x>480 14:43-50</x>; <x>490 22:47-53</x>; <x>500 18:3-12</x>)

47 Benɛ Yesu ngɛ munyu ɔ tue kɛ mwɔɔ ɔ, Yuda, ni nyɔngma kɛ enyɔ ɔmɛ a kpɛti nɔ kake ɔ ba hia kpo kɛ nihi babauu ngɛ e se; nɛ a hɛɛ klaatehi kɛ tso kpotihi. Nimli nɛ ɔmɛ ɔ, osɔfo nikɔtɔma amɛ; kɛ ma nimeli ɔmɛ nɛ tsɔ mɛ.

48 Nɔ nɛ ngɛ e se blɔ tsɔɔe ɔ to mɛ okadi ke, “Nɔ nɛ i ma fĩɔ e nya he ɔ, lɛ ji nɔ nɛ nyɛ ngɛ hlae ɔ nɛ. Nyɛɛ nu lɛ!”

49 Yuda ba Yesu ngɔ amlɔ ba de ke, “Tsɔɔlɔ he manye.” Kɛkɛ nɛ e fiɔ Yesu nya he.

50 Yesu de lɛ ke, “Huɛ, nɔ́ nɛ o ma peemi ɔ, pee esɔ!” Kɛkɛ nɛ ni ɔmɛ ba yu Yesu nɔ, nɛ a nu lɛ pani nya.

51 Amlɔ ɔ, nihi nɛ kɛ Yesu ngɛ ɔ a ti nɔ kake hia klaate, nɛ e kɛ po osɔfo nɔkɔtɔma pe kulaa a tsɔlɔ tue.

52 Yesu de lɛ ke, “Ngɔɔ o klaate ɔ ngɔ to e to he; ejakaa nihi tsuo nɛ hiaa klaate ɔ, a kɛ klaate ma kpata a hɛ mi.

53 Anɛ o susu kaa i be nyɛe ma kpa Tsaatsɛ pɛɛ, nɛ amlɔ nɛ ɔ nɔuu e maa tsɔ hiɔwe bɔfohi asafo nyɔngma kɛ enyɔ kɛ se kɛ ba nɛ a ba je ngmlaa ha mi lo?

54 Ke e ba jã a, lɛɛ ngmami ɔmɛ nɛ deɔ ke kikɛ nɛ ɔ e sa kaa níhi nɛ ba a, kɛ jamɛ a ngmami ɔmɛ maa pee kɛ ba mi kɛɛ?”

55 ⓗ Jehanɛ ɔ, Yesu kɛ ma kpekpemi ɔ tu munyu nɛ e de ke, “Imi lɛ nyɛ ma numi kɛ klaatehi kɛ tso kpotihi kaa a nuu ojo fialɔ ɔ? Daa nɛ ɔ, i hii sɔlemi we ɔ, nɛ i tsɔɔ ní, se nyɛ nui mi.

56 Se a pee ní nɛ ɔmɛ tsuo, konɛ níhi nɛ gbali ɔmɛ ngma a nɛ ba mi.” Amlɔ ɔ, kaseli ɔmɛ tsuo tu fo nɛ a si lɛ.

Yesu ngɛ kpe ngua a hɛ mi

(<x>480 14:53-65</x>; <x>490 22:54-55</x>, <x>490 22:63-71</x>; <x>500 18:13-14</x>, <x>500 18:19-24</x>)

57 Ni nɛmɛ nɛ nu Yesu ɔ ngɔ lɛ kɛ ya Kayafa, osɔfo nɔkɔtɔma pe kulaa a ngɔ, he nɛ mlaa tsɔɔli ɔmɛ, kɛ ma nimeli ɔmɛ ya bua a he nya ngɛ ɔ.

58 Petro nyɛɛ a se ngɛ lokoo kɛ ya su kue ɔ he, ngɛ osɔfo nɔkɔtɔma pe kulaa a we ɔ mi. E sɛ we ɔ mi, nɛ e ya hi si ngɛ ta buli ɔmɛ a kasa nya, konɛ e kɛ hyɛ bɔ nɛ nyagbe ɔ maa ba ha.

59 Osɔfo nikɔtɔma amɛ, kɛ kpe ngua a tsuo hla kaa a maa na lakpa odase ko ngɛ Yesu he, konɛ a gbe lɛ;

60 se a nɛ eko. Nihi fuu ba ba ye lakpa odase mohu, se nɔ́ ko ji mi. A hɛɛ mi hluu ɔ, nyumuhi enyɔ ba,

61 ⓘ nɛ a ba de ke, “Nyumu nɛ ɔ de ke, ‘Ma nyɛ ma ku Mawu sɔlemi we ɔ pue si, nɛ ligbi etɛ se ɔ, ma fia ekohu.’ ”

62 Kɛkɛ nɛ osɔfo nɔkɔtɔma pe kulaa a te da si, nɛ e bi Yesu ke, “Odase nɛ ni nɛ ɔmɛ ngɛ yee kɛ ngɛ mo sie ɔ, o be he nɔ́ ko dee?”

63 Se Yesu pɛ̃ e nya mi. Osɔfo nɔkɔtɔma pe kulaa a kɛ lɛ tu munyu ekohu ke, “I ngɛ mo kita kae ngɛ Mawu hɛ kalɔ ɔ biɛ mi kaa ke mo ji Kristo, Mawu Bi ɔ, de wɔ!”

64 ⓙ Yesu de lɛ ke, “Ja o de ɔ nɛ! Se i ngɛ nyɛ dee ke, kɛ je be nɛ ɔ kɛ yaa a, nyɛ maa na Nɔmlɔ Bi ɔ nɛ hii si ngɛ Ope ɔ hiɔ nɔ, nɛ e ma ngɛ hiɔwe bɔku ɔmɛ a mi!”

65 ⓚ Kɛkɛ nɛ osɔfo nɔkɔtɔma pe kulaa a hía tade klɔii ɔ nɛ e wo ɔ, nɛ e de ke, “E bɔ musu! Anɛ odase yeli kpahi a he pa hia wɔ lo? Jehanɛ lɛɛ, tse nyɛ nu kaa e bɔ musu!

66 Kɛ nyɛ ngɛ dee kɛɛ?” A he nɔ ke, “E sa gbenɔ!”

67 ⓛ Kɛkɛ nɛ a su lada ngɔ pue e hɛ mi, nɛ a fiaa lɛ ní. Ni komɛ hu gba lɛ ma,

68 nɛ a de ke, “Kristo, de wɔ! Mɛnɔ lɛ fia mo nɔ́ ɔ?”

Petro kua Yesu

(<x>480 14:66-72</x>; <x>490 22:56-62</x>; <x>500 18:15-18</x>, <x>500 18:25-27</x>)

69 Be nɛ ɔ mi tsuo ɔ, Petro hii si ngɛ kue ɔ mi ngɛ kpo ɔ nɔ. Kɛkɛ nɛ osɔfo nɔkɔtɔma pe kulaa a mawayo ko ba e ngɔ ba de lɛ ke, “Mo hu tse o kɛ Yesu, Galilea no ɔ lɛ ngɛ!”

70 Se Petro de ngɛ ni ɔmɛ tsuo a hɛ mi ke, “Dɛbi! Nɔ́ nɛ o ngɛ dee nɛ ɔ, i li he nɔ́ ko.”

71 Kɛkɛ nɛ e je lejɛ ɔ kɛ ya gu kue ɔ we agbo ɔ nya. Se mawayo kpa ko hu na lɛ, nɛ e de nihi nɛ ngɛ lejɛ ɔ ke, “Nyumu nɛ ɔ kɛ Yesu nɛ je Nazaret ɔ lɛ ngɛ.”

72 Petro kplɛɛ we nɔ ekohu, nɛ e de ke, “I na Mawu kaa i li nyumu ɔ!”

73 Be bɔɔ se ɔ, nihi nɛ daa si ngɛ lejɛ ɔ ba Petro ngɔ ba de lɛ ke, “Anɔkuale mi ɔ, ni ɔmɛ a ti nɔ kake ji mo; ejakaa o munyu tumi tete jeɔ mo si!”

74 Jehanɛ ɔ lɛɛ, Petro de ke, “I na Mawu kaa nɔ́ nɛ i ngɛ dee ɔ, anɔkuale! Ke pi ja a, Mawu nɛ gbla ye tue! I li nyumu ɔ!” Amlɔ ɔ, kungwɔ kpa nɔ́.

75 Nɛ Petro kai munyu ɔ nɛ Yesu tu lɛ ke, “Loko kungwɔ ma kpa nɔ́ ɔ, o ma de si etɛ ke o li mi” ɔ. Nɛ e je kpo, nɛ e ya fo ya wawɛɛ.