Zakaria 6

Ta zugba lɛ eywiɛ ɔmɛ a he nina

1 I na nina kpa hulɔ. Jehanɛ lɛɛ i na ta zugba lɛ eywiɛ komɛ nɛ je kpo ngɛ yo enyɔ komɛ a kpɛ kɛ ma. Akɔblee sɔuu ji yo ɔmɛ.

2 ⓚ Okpɔngɔ tsu komɛ ngɛ kekleekle ta zugba lɛ ɔ gblae; enyɔne ɔ, okpɔngɔ yumuhi,

3 ⓛ etɛne ɔ, okpɔngɔ futaahi, nɛ eywiɛne ɔ lɛɛ okpɔngɔ huatahuatahi nɛ a ngɛ lɛ gblae.

4 Kɛkɛ nɛ i bi bɔfo ɔ nɛ kɛ mi tu munyu ɔ ke, “Ye nyɔmtsɛ, mɛni ta zugba lɛ nɛ ɔmɛ tsɔɔ?”

5 ⓜ E he nɔ ke, “Kɔɔhiɔ nɛ ngɛ je kɔ nya eywiɛ ɔmɛ ji nɛ ɔmɛ nɛ; je ɔ tsuo Nyɔmtsɛ ɔ hɛ mi nɛ a je kɛ yaa nɛ ɔ nɛ.”

6 Ta zugba lɛ ɔ nɛ okpɔngɔ yumu ɔmɛ ngɛ gblae ɔ yaa omleyi je, nɛ ta zugba lɛ nɛ okpɔngɔ hiɔ ɔmɛ ngɛ gblae ɔ yaa bonyoku je, nɛ nɔ́ nɛ okpɔngɔ huatahuata amɛ ngɛ gblae ɔ yaa zugba nɛ ngɛ leneyi je ɔ nɔ.

7 Benɛ okpɔngɔ ɔmɛ ngɛ kpo jee kɛ ma a, e sɔɛ ha mɛ kulaa kaa a ma ya slaa je ɔ mi. Bɔfo ɔ de mɛ ke, “Nyɛɛ ya nɛ nyɛ ya slaa je ɔ mi!” Kɛkɛ nɛ a pue nɔ kɛ ho, nɛ a ya slaa je ɔ mi.

8 Jehanɛ, bɔfo ɔ de mi kɛ ngmlaa ke, “Okpɔngɔ ɔmɛ nɛ ya slaa omleyi je ɔ ha Yawɛ abofu ɔ nya ba si.”

Yawɛ fa ke á bu Yoshua matsɛ pɛɛ

9 Jehanɛ Yawɛ ha mi sɛ gbi nɛ ɔ.

10 E de mi ke, “Heldai, Tobiya, kɛ Yedaya nɛ a nuu kɛ ho ma se ya ngɛ Babilonia nɛ a kpale kɛ ba a, hé sika tsu kɛ sika hiɔ ngɛ a dɛ, nɛ o pue nɔ jamɛ a ligbi ɔ nɔuu kɛ ya Zefania bi Yosia we ɔ mi.

11 Ngɔɔ sika hiɔ, kɛ sika tsu nɛ a kɛ ba ke ɔ kɛ pee matsɛ pɛɛ, nɛ o kɛ bu Yehozadak bi Yoshua, osɔfo nɔkɔtɔma pe kulaa a.

12 ⓝ De lɛ ke bɔ nɛ Yawɛ Tabohiatsɛ ɔ de ji nɛ ɔ nɛ: ‘Nɔ ko ji nɛ ɔ nɛ. A tsɛɛ lɛ Tso Kɔni. E ma gba kɔni nɛ e ma ba ma Yawɛ we ɔ ekohu.

13 Lɛ nɛ e maa ma Yawɛ we ɔ. Osɔfo ko maa piɛ e he kɛ tsu ní ɔ. Tue mi jɔmi maa hi a kpɛti, nɛ a maa nu a sibi sisi saminya.’

14 A kɛ matsɛ pɛɛ nɛ ɔ maa to Yawɛ we ɔ mi kɛ kai Heldai, Tobiya, Yedaya, kɛ Zefania bi Yosia tsuo.”

15 Nihi nɛ ngɛ se lokoo maa ba nɛ a ba piɛ nyɛ he kɛ ma Yawɛ we ɔ. Kɛkɛ ɔ, nyɛ maa le kaa Yawɛ Tabohiatsɛ ɔ nitsɛ nɛ tsɔ mi nyɛ ngɔ. Ke nyɛ maa bu Yawɛ, nyɛ Mawu ɔ tue anɔkuale mi ɔ, lɛɛ ní nɛ ɔmɛ tsuo maa ba mi.