Zakaria 5

Womi kpo ɔ nɛ ngɛ tee ngɛ kɔɔhiɔ mi ɔ he nina

1 Jehanɛ i na nina kpa ko. I na womi kpo ko nɛ te kɛ bee.

2 Bɔfo ɔ bi mi ke, “Mɛni o na?” I he nɔ ke, “I na womi kpo ko nɛ ngɛ tee kɛ bee; e kami maa pee gugue enuɔ, nɛ e blimi maa pee gugue enyɔ kɛ fa.”

3 E ya nɔ nɛ e de mi ke, “Gbiɛmi nɛ maa ba zugba a tsuo nɔ ji nɛ ɔ nɛ. A ngma ngɛ womi ɔ ba fa kake ke, ‘Nɔ tsuaa nɔ nɛ maa ju ɔ, a po lɛ ngɔ fɔ he.’ Nɛ a ngma ngɛ ba fa kake hu ke, ‘Nɔ tsuaa nɔ nɛ kãã lakpa kita a, a po lɛ ngɔ fɔ he.’

4 Yawɛ Tabohiatsɛ ɔ ke e ma ha gbiɛmi nɛ ɔmɛ maa ba zugba a tsuo nɔ, nɛ we mi he nɛ nɔ ko maa ju ngɛ ɔ, a ma kpata we ɔ hɛ mi; nɛ we tsuaa we nɛ nɔ ko ma kã lakpa kita ngɛ mi ɔ, a ma kpata we ɔ hɛ mi kɛ e mi tso kɛ tɛ tsuo.”

Yo nɛ ngɛ kusii mi ɔ he nina

5 Bɔfo ɔ nɛ kɛ mi tu munyu ɔ ba je e he si tsɔɔ mi ekohu, nɛ e de mi ke, “Wo o hɛ nɔ nɛ o hyɛ nɔ́ nɛ je kpo kɛ ma nɛ ɔ!”

6 I bi lɛ ke, “Mɛni enɛ ɔ tsɔɔ?” E he nɔ ke, “Kusii. Ee, kusii nɛ ɔ daa si ha yayami tsuo nɛ a pee ngɛ zugba a nɔ ɔ.”

7 Sumui a kɛ pee kusii ɔ nya nɔ́ ɔ; a bli kusii ɔ nya, nɛ yo ko hii si ngɛ mi!

8 Bɔfo ɔ de ke, “Yo nɛ ɔ daa si ha yi wu tso ní peemi.” Kɛkɛ nɛ e nyɛ yo ɔ nɔ kɛ wo kusii ɔ mi, nɛ e ngɔ nya nɔ́ ɔ kɛ bu nya.

9 Benɛ ma wo ye hɛ nɔ nɛ ma hyɛ ɔ, ne yi enyɔ komɛ nɛ ngɛ tee kɛ ma ye ngɔ kɛ a pɛlihi kaa pa nɔ kayo pɛli. Kɛkɛ nɛ a ba ngɔ kusii ɔ kɛ ho kɔɔhiɔ mi ya.

10 I bi bɔfo ɔ nɛ kɛ mi tu munyu ɔ ke, “Jije a ngɔ kusii ɔ kɛ yaa?”

11 E he nɔ ke, “A kɛ yaa Babilonia. A maa ma tsu ha kusii ɔ ngɛ lejɛ ɔ. Ke a ma tsu ɔ gbe nya a, a maa ngɔ kusii ɔ kɛ ya ma e ma he ngɛ lejɛ ɔ.”