Zakaria 3

Osɔfo nɔkɔtɔma pe kulaa a he nina

1 ⓒ I na nina kpa ko. Yawɛ ha nɛ i na osɔfo nɔkɔtɔma pe kulaa Yoshua nɛ daa si ngɛ Yawɛ bɔfo ɔ hɛ mi; nɛ Abosiami ba daa si ngɛ Yoshua hiɔ nɔ, konɛ e po Yoshua nya.

2 ⓓ Yawɛ de Abosiami ke, “Abosiami, Yawɛ nɛ wo mo hiɔ! Yawɛ, nɔ nɛ hla Yerusalem kɛ pee e nɔ́ ɔ nɛ wo mo hiɔ. Nyumu nɛ ɔ, anɛ pi la tso nɛ ngɛ tsoe nɛ a hia kɛ je la nya nɛ ɔ.”

3 Yoshua daa si ngɛ Yawɛ bɔfo ɔ hɛ mi kɛ e he tade sɛmusɛmu.

4 Kɛkɛ nɛ Yawɛ bɔfo ɔ de nihi nɛ daa si ngɛ e hɛ mi ɔ ke, “Nyɛ je tade sɛmusɛmu ɔ ngɛ e he.” Jehanɛ Yawɛ bɔfo ɔ de Yoshua ke, “I je o he yayami ɔmɛ; ma ha mo tade saminyayoo nɛ o wo.”

5 E fa nihi nɛ daa si ngɛ e hɛ mi ɔ ke a hla yi fimi nɔ́ nɛ he tsɔ kɛ fi Yoshua yi ha lɛ, nɛ a wo lɛ tade saminyayoo ɔ. Nɛ Yawɛ bɔfo ɔ daa si ngɛ hyɛe.

6 Kɛkɛ nɛ Mawu bɔfo ɔ de Yoshua ke,

7 bɔ nɛ Yawɛ Tabohiatsɛ ɔ de ji nɛ ɔ nɛ: “Ke o maa ye mlaa amɛ a nɔ, nɛ o maa hɛɛ ye blɔ nya tomi ɔmɛ a mi ɔ, ma ha nɛ o ye ye we ɔ, kɛ e he kue ɔmɛ a nɔ. Ma ha mo blɔ he ngɛ nihi nɛ daa si ngɛ ye hɛ mi ɔ a kpɛti.

8 ⓔ Jehanɛ Yoshua, mo osɔfo nɔkɔtɔma pe kulaa, kɛ o nyɛmimɛ nɛ hii si ngɛ o hɛ mi, nyɛɛ bu tue. Níhi nɛ maa ba hwɔɔ se he okadi ma de nyɛ nɛ ɔ nɛ. Ma ha ye tsɔlɔ nɛ ji Tso Kɔni ɔ maa ba.

9 I ngɔ tɛ kake too kɛ e hɛ mi kpaago kɛ ngɛ Yoshua hɛ mi mae. Ma kpɛ́ ningma ngɛ tɛ ɔ mi, nɛ ma ha yayami maa ta zugba a nɔ ligbi kake too.

10 ⓕ Jamɛ a be ɔ, nyɛ maa kpee nyɛ sibi kɛ ba nyɛ wai ngmɔ ɔmɛ a mi, kɛ nyɛ ngmɔkɔ tso ɔmɛ a sisi. Yawɛ lɛ de.”