Mose IV, 36

Yigbayihi a gbosi ní he blɔ nya tomi

1 Nikɔtɔmahi nɛ ngɛ Makir binyumu Gilead, nɛ ji Yosef binyumu Manase bibi ɔ weku ɔ mi ɔ ba Mose, kɛ Israel ma nimeli ɔmɛ a ngɔ;

2 ⓞ nɛ a ba de mɛ ke, “Yawɛ fa mo, wa nyɔmtsɛ ɔ, ke o fɔ sɔ kɛ dla zugba a ha Israel bi ɔmɛ. Jehanɛ se hu, Yawɛ fa mo ke o ngɔ wa nyɛminyumu Zelofehad gbosi ní ɔ ngɔ ha e biyi ɔmɛ.

3 Se mohu, ke a ya gba nyumuhi ngɛ Israel wɛtso kpa amɛ a mi ɔ, tse a weto ní ɔ nɛ ji wɔɔ wa nɛmɛ a gbosi ní ɔ ma ya pee wɛtso nɛ a ya dumɔ ɔ a nɔ lo? Ke e ba ja a, lɛɛ tse wɔɔ wa gbosi ní ɔ nɔ ma gbɔ mɔ!

4 Ke Heyemi jeha a su, nɛ a kpale gbosi níhi tsuo ngɔ ha nɔtsɛmɛ ɔ, a maa ngɔ Zelofehad biyi ɔmɛ a gbosi ní ɔ ngɔ piɛ wɛtso nɛ a ya dumɔ ɔ a nɔ ɔ he. Kɛkɛ ɔ, wɔɔ lɛɛ wa nɛmɛ a weto ní ɔ nɔ ma gbɔ.”

5 Kɛkɛ nɛ Mose wo Israel bi ɔmɛ mlaa nɛ ɔ, kaa bɔ nɛ Yawɛ fa lɛ ɔ ke, “Sane nɛ Yosef binyumu Manase wɛtso ɔ kɛ ba a, sane ɔ da.

6 Lɔ ɔ he ɔ, Yawɛ ke, Zelofehad biyi ɔmɛ ngɛ he blɔ nɛ a gbaa nɔ tsuaa nɔ nɛ a suɔ; se mohu a gba ngɛ a tsɛmɛ a wɛtso ɔ mi pɛ,

7 bɔ nɛ pee nɛ Israel bi ɔmɛ a gbosi ní nɛ ko je wɛtso kake mi kɛ ya wɛtso kpa mi; se mohu, Israel no tsuaa Israel no nɛ ye gbosi ní ngɛ e tsɛ wɛtso mi.

8 Biyo tsuaa biyo nɛ yeɔ gbosi ní ngɛ Israel wɛtso ko mi ɔ, e gba e we puɔ nya no ko ngɛ e wɛtso ɔ mi, bɔ nɛ pee nɛ Israel no tsuaa Israel no nɛ ye e tsɛ gbosi ní,

9 nɛ gbosi ní kó je wɛtso kake mi kɛ ya wɛtso kpa mi, se mohu Israel wɛtso tsuaa wɛtso nɛ pɛtɛ lɛ nitsɛ e weto ní he.”

10 Zelofehad biyi ɔmɛ, Mahla, Tirza, Hogla, Milka, kɛ Noa pee kaa bɔ nɛ Yawɛ fa Mose ɔ, nɛ a gba a tsɛ nyɛminyumuhi a binyumuhi

11

12 ngɛ Yosef binyumu Manase weku ɔ mi. Lɔ ɔ he ɔ, a gbosi ní ɔmɛ tlɔ a tsɛ wɛtso ɔ mi.

13 Mlaahi nɛ Yawɛ wo Israel bi ɔmɛ, kɛ blɔ nya tomihi nɛ e ha mɛ kɛ gu Mose nɔ, ngɛ Moab nga kplanaa a nɔ, ngɛ Yordan pa a se, ngɛ Yeriko hanɔ ji nɛ ɔmɛ nɛ.