Mose IV, 14

Ma a tu munyu huitihuiti

1 Jamɛ a nyɔ ɔ mi ɔ, ma a tsuo wo yana, nɛ a kɛ aywilɛho kpa huhui.

2 Israel ma mluku ɔ tsuo hɔɔ nya si ngɔ wo Mose kɛ Aaron a he, nɛ a de ke, “Wa ná nɛ jinɛ wa gbo ngɛ Egipt zugba a nɔ, loo ngɛ nga nɛ ɔ nɔ po!

3 Mɛni he je Yawɛ kpaka wɔ kɛ yaa zugba nɛ ɔ nɔ, nɛ wa ya gbo ngɛ klaate nya, nɛ a ngɔ wa yihi, kɛ wa bimɛ nyɔguɛ ɔ? Anɛ e be hie mohu kaa waa kpale wa se kɛ ho Egipt ya lo?”

4 Lɔ ɔ he ɔ, a de a he ke, “Nyɛ ha waa hla wa nyatsɛ nɛ waa kpale kɛ ho Egipt ya.”

5 Kɛkɛ nɛ Mose kɛ Aaron ngɔ a hɛ mi ngɔ bu si ngɛ Israel ma mluku ɔ tsuo a hɛ mi.

6 Nun bi Yoshua, kɛ Yefune bi Kaleb, nɛ ji slaali ɔmɛ a ti nihi enyɔ hía a he tadehi,

7 nɛ a de Israel ma mluku ɔ tsuo ke, “Zugba a nɛ wa ya kpa nɔ nɛ wa slaa lɛ ɔ, e ji zugba nɛ hi saminya.

8 Ke Yawɛ ngɛ wa he tsui ɔ, e ma kpaka wɔ kɛ ya lejɛ ɔ; nɛ e maa ngɔ zugba nɛ hi, nɛ baa ní nɛ ɔ ngɔ ha wɔ.

9 ⓡ Se, nyɛ ko tsɔ Yawɛ hɛ mi atuã. Nimli nɛ ngɛ zugba a nɔ hu, nyɛ ko ye mɛ gbeye; wa maa ye a nɔ kunimi hɛngmɛfia. A he wami nya ba si, se wɔɔ lɛɛ Yawɛ kɛ wɔ ngɛ. Lɔ ɔ he ɔ, nyɛ ko ye mɛ gbeye.”

10 Kɛkɛ nɛ ma mluku ɔ tsuo de ke a fia mɛ tɛ. Se tlukaa a, Yawɛ hɛ mi nyami ɔ ba je e he kpo kɛ tsɔɔ Israel ma a tsuo ngɛ kpe he bo tsu ɔ he.

Mose fa kue ha ma a

11 Yawɛ bi Mose ke, “Kɛ yaa si mɛni be ma nɛ ɔ ma kua mi? Kɛ yaa si mɛni be loko a ma he mi maa ye ngɛ okadihi babauu nɛ i pee ngɛ a kpɛti ɔ he?

12 Ma ngɔ gbenɔ hiɔ kɛ fɔ a nɔ, nɛ ma kpata a hɛ mi. Se moo lɛɛ ma pee mo ma nguaa; ma nɛ kle pe mɛ, nɛ he wa pe mɛ hulɔ.”

13 ⓢ Se Mose de Yawɛ ke, “O ngɔ o kɔni si wami kɛ je ma nɛ ɔ kɛ je Egipt. Ke Egipt bi ɔmɛ nu nɔ́ nɛ o pee o ma a,

14 a maa sɛɛ ha zugba nɛ ɔ nɔ bi. Nimli nɛ ɔmɛ nu momo kaa mo Yawɛ, o ngɛ wa kpɛti. Nimli nɛ ɔmɛ nu momo kaa mo Yawɛ, o bɔku ɔ ba daa si ngɛ wa yi mi, nɛ a naa mo paa hɛ mi kɛ hɛ mi. A nu momo kaa piani ɔ, o nyɛɛɔ wa hɛ mi ngɛ bɔku titima mi, nɛ nyɔ mi lɛɛ o nyɛɛɔ wa hɛ mi ngɛ la titima mi.

15 Lɔ ɔ he ɔ, ke o gbe o ma nɛ ɔ tsuo ɔ, je ma amɛ nɛ nu o biɛ ɔ he ɔ ma de ke,

16 ‘Yawɛ kpata ma nɛ ɔ hɛ mi ngɛ nga a nɔ, ejakaa e nyɛ we nɛ e kpaka mɛ kɛ ya su zugba a nɛ e wo si ke e maa ngɔ kɛ ha mɛ ɔ nɔ.’

17 Enɛ ɔ he ɔ, i kpa mo pɛɛ, Yawɛ, mo je o he wami kpo kɛ tsɔɔ wɔ, nɛ o ye o si womi ɔ nɔ kaa bɔ nɛ o de wɔ ɔ ke

18 ⓣ ‘Imi, Yawɛ, ye mi mi fu we mla, nɛ ye mɔbɔ nami hiɛ babauu; i ngɔɔ tɔmi kɛ yayami ngɔ paa. Se kɛ̃, i ha we nɛ yayami peeli yeɔ a he; mohu i kɛ tsɛmɛ a tɔmihi a he hiɔwo ɔ gblaa bimɛ kɛ bibimɛ a tue hluu kɛ ya siɔ yi nɔ etɛne, kɛ eywiɛne bi a nɔ.’

19 I kpa mo pɛɛ, ngɔɔ ma nɛ ɔ he yayami ɔmɛ kɛ pa mɛ ngɛ o mɔbɔ nami kpetekpleenyɛ ɔ nya, kaa bɔ nɛ o ngɔ a he yayami ɔmɛ kɛ pa mɛ kɛ je Egipt hluu kɛ ba si amlɔ nɛ ɔ.”

20 Yawɛ he nɔ nɛ e de ke, “I ngɔ kɛ pa mɛ kaa bɔ nɛ o bi ɔ.

21 ⓤ Se anɔkuale, ligbi abɔ nɛ ye hɛ ngɛ, nɛ imi Yawɛ, ye hɛ mi nyami ma hyi zugba a tsuo tɔ ɔ,

22 nihi tsuo nɛ na ye hɛ mi nyami, kɛ okadihi nɛ i pee ngɛ Egipt kɛ nga a nɔ, se kɛ̃ a ka mi si nyɔngma sɔuu, nɛ a bui ye gbi tue ɔ,

23 nimli nɛ ɔmɛ a ti nɔ kake po be zugba a nɛ i ka kita ke ma ha a nɛmɛ ɔmɛ ɔ nae. Ni nɛmɛ nɛ kua mi ɔ, a ti nɔ ko nɔ ko be zugba a nae.

24 ⓥ Se ye tsɔlɔ Kaleb lɛɛ slo e mumi; lɛɛ e bu mi tue kɛ ya si nyagbe. Enɛ ɔ he je ɔ, i kɛ lɛ maa su zugba a nɛ a ya slaa a nɔ, nɛ e se bimɛ a nine maa su nɔ.

25 Se amlɔ nɛ ɔ, akɛnɛ Amalek bi ɔmɛ, kɛ Kanaan bi ɔmɛ ngɛ kɔ̃ ɔmɛ a mi he je ɔ, hwɔɔ ɔ, nyɛɛ kpale nyɛ se kɛ ya gu blɔ nɛ ngɛ Wo Tsu ɔ he ɔ kɛ ya nga a nɔ.”

Yawɛ gbla ma a tue

26 Yawɛ de Mose kɛ Aaron ke,

27 “Mɛni be ma yiwutsotsɛmɛ nɛ ɔmɛ maa hɔɔ nya si kɛ wo mi kɛ yaa si? Munyu huitihuiti nɛ Israel ma a ngɛ tue kɛ ngɛ mi sie ɔ, i nu.

28 Nyɛ de mɛ ke imi Yawɛ, i ke, ‘Ligbi abɔ nɛ ye hɛ ngɛ nɛ ɔ, ma pee ha nyɛ kaa bɔ nɛ nyɛ bi ɔ.

29 ⓦ Nyɛ ma gbo pue si ngɛ nga nɛ ɔ nɔ. Nihi tsuo nɛ a ye kɛ je jeha nyingmi enyɔ kɛ yaa, nɛ a ngma a biɛ, nɛ a hɔɔ nya si kɛ wo mi ɔ,

30 a ti nɔ kake be zugba a nɛ i ka kita ke i kɛ ma ha nyɛ nɛ nyɛɛ hi nɔ ɔ nae, ja Yefune bi Kaleb, kɛ Nun bi Yoshua pɛ.

31 Nyɛ bi tsɔwitsɔwi ɔmɛ nɛ nyɛ de ke a maa ngɔ mɛ nyɔguɛ ɔ, i kɛ mɛ maa su zugba a nɛ nyɛ kua a nɔ, nɛ e maa pee a nɔ.

32 Se nyɛ lɛɛ nyɛ ma gbo tlɔ nga nɛ ɔ nɔ.

33 ⓧ Nyɛ bimɛ maa wo lalaalo ngɛ nga a nɔ jeha nyingmi eywiɛ, nɛ a maa na nɔ́ ngɛ hemi kɛ yemi nɛ nyɛ be ɔ he, kɛ yaa si be nɛ nyɛ nyagbe nɔ ɔ ma gbo fɔ si ngɛ nga a nɔ.

34 Nyɛ slaa zugba a ligbi nyingmi eywiɛ, se nyɛ ma na nyɛ yayami ɔmɛ a he tue gblami jeha nyingmi eywiɛ; ligbi kake ma plɛ pee jeha ha nyɛ. Nɛ nyɛ maa na kaa i je nyɛ se.

35 I ngɛ kita kae kaa nyɛ nimli kpekpemi yiwutsotsɛmɛ nɛ nyɛ tsɔ atuã wo mi ɔ, nɔ́ nɛ ma pee nyɛ ji nɛ ɔ nɛ. Nyɛ tsuo nyɛ ma gbo tlɔ nga a nɔ ngɛ hiɛmɛ nɛ ɔ. Imi, Yawɛ lɛ i de.’ ”

36 Nyumu ɔmɛ nɛ Mose tsɔ ya slaa zugba a, nɛ a ba gba Israel ma kpekpemi ɔ zugba a he sane yayami, nɛ lɔ ɔ he ɔ, ma a hɔɔ nya si kɛ wo Mose ɔ,

37 Yawɛ ha gbenɔ hiɔ ba fia mɛ nɛ a gbo.

38 Nyumu ɔmɛ nɛ ya slaa zugba a, Nun bi Yoshua, kɛ Yefune bi Kaleb pɛ ji ni nɛmɛ nɛ a yi na wami.

A ka zugba a ngɔmi

(<x>50 1:41-46</x>)

39 Benɛ Mose ya bɔ Israel bi ɔmɛ tsuo sane nɛ ɔ, a ye kɔmɔ wawɛɛ nitsɛ.

40 A te si mɔtu kpla, nɛ a kuɔ yoku ɔ kɛ ho e yi mi ya tɔɔ, nɛ a de ke “Jehanɛ wa dla wa he; wa maa ya he nɛ Yawɛ wo wɔ si ɔ. Kpaako wa na kaa wa pee yayami.”

41 Se Mose de ke, “Mɛni he je nyɛ pa ngɛ Yawɛ fami ɔ nɔ tue gboe ɔ? Nɔ́ nɛ ɔ be hie.

42 Nyɛ ko ya, ejakaa Yawɛ be nyɛ se. Ke nyɛ ya a, nyɛ he nyɛli ɔmɛ maa fia nyɛ ní kɛ pue si.

43 Ke nyɛɛ kɛ Amalek bi ɔmɛ, kɛ Kanaan bi ɔmɛ ya bua a, nyɛ maa nɔ ngɛ klaate nya. Yawɛ be nyɛ he piɛe, ejakaa nyɛ kua lɛ.”

44 Se kɛ̃ ɔ, a si a gugue, nɛ a kuɔ yoku ɔ kɛ ho e yi mi ya, be mi nɛ Yawɛ somi daka a, kɛ Mose na we nɛ a je sito he ɔ.

45 Kɛkɛ nɛ Amalek bi, kɛ Kanaan bi nɛ ngɛ jamɛ a yoku ɔ nɔ ɔ ba tua mɛ, nɛ a ye a nɔ; nɛ a fie mɛ kɛ ya si Horma tɔɔ.