Mose IV, 13 - Laravel

Slaali nyɔngma kɛ enyɔ ɔmɛ

(<x>50 1:19-33</x>)

1 Yawɛ de Mose ke,

2 “Moo hla nyumu nɔkɔtɔma kake kɛ je wɛtso tsuaa wɛtso mi, nɛ o tsɔ mɛ nɛ a ya slaa Kanaan zugba a nɛ i ngɔ kɛ ngɛ Israel bi ɔmɛ hae ɔ.”

3 Mose tsɔ Israel ma nimeli ɔmɛ kɛ je Paran nga a nɔ kaa bɔ nɛ Yawɛ fa lɛ ɔ. A biɛhi, kɛ wɛtsohi nɛ a je mi ɔ ji nɛ ɔmɛ nɛ: WƐTSO — WƐTSO NƆKƆTƆMA Ruben — Shamua, Zakur bi ɔ Simeon — Shafat, Hori bi ɔ Yuda — Kaleb, Yefune bi ɔ Isakar — Igal, Yosef bi ɔ Efraim — Hoshea, Nun bi ɔ Benyamin — Palti, Rafu bi ɔ Zebulun — Gadiel, Sodi bi ɔ Manase — Gadi, Susi bi ɔ Dan — Amiel, Gemali bi ɔ Asher — Setur, Mikael bi ɔ Naftali — Nabi, Vofsi bi ɔ Gad — Geuel, Maki bi ɔ.

16 Nyumuhi nɛ Mose tsɔ ke a ya slaa zugba a, a biɛhi ji nɛ ɔmɛ nɛ. Se Nun bi Hoshea lɛɛ Mose tsake e biɛ kɛ pee Yoshua.

17 Benɛ Mose tsɔ mɛ ke a ya slaa Kanaan zugba a, e de mɛ ke, “Nyɛɛ gu omleyi je kɛ ya kuɔ yoku ɔmɛ.

18 Nyɛɛ hyɛ bɔ nɛ zugba a ngɛ ha, kɛ nimli nɛ ngɛ zugba a nɔ ɔ, kaa nimli ɔmɛ a he wa, loo a he wɛ, kaa a hiɛ, loo a he pi.

19 Zugba a nɛ ni ɔmɛ ngɛ nɔ ɔ, nyɛɛ hyɛ kaa e hi, loo e hí. Nyɛɛ hyɛ kaa mahi nɛ a ngɛ mi ɔ, ma tsɔwitsɔwihi, loo mahi nɛ a fia gbogbo kɛ wo a he.

20 Nyɛɛ hyɛ kaa zugba a baa ní, loo e bɛ ní, kaa tsohi ngɛ nɔ, loo tsohi be nɔ. Nyɛɛ bɔ mɔde nɛ nyɛɛ ngɔ zugba a nɔ tso yiblii komɛ kɛ ba.” Jamɛ a be ɔ ji kekleekle wai yiblii fumi be.

21 Nyumu ɔmɛ pue nɔ kɛ ho, nɛ a ya slaa zugba a, kɛ je Zin nga a nɔ kɛ ya si Rehob, he nɛ a guu kɛ yaa Hamat ɔ.

22 A nyɛɛ kɛ gu leneyi je hluu kɛ ya si Hebron. Lejɛ ɔ ji Ahiman, Sheshai, kɛ Talmai nɛ ji Anak bi ɔmɛ a hi he. (A po Hebron ma a jeha kpaago loko a po Zoan ngɛ Egipt).

23 Benɛ a su Eskol kɔ̃ ɔ mi ɔ, a po wai tso kɔni kake kɛ e nɔ wai yiblii sau kake ngɛ lejɛ ɔ, nɛ a kpɛti ni enyɔ wo lɛ tso nɛ a kpla ngɛ a konɔ. A kɛ tso yiblii ko kaa akutu kɛ ngmɔkɔ hu ba.

24 Nɛ a wo lejɛ ɔ biɛ ke Eskol kɔ̃, ngɛ wai yiblii sau ɔ nɛ Israel bi ɔmɛ po ngɛ lejɛ ɔ he.

25 A slaa zugba a ligbi nyingmi eywiɛ, nɛ lɔ ɔ se ɔ, a kpale a se

26 kɛ ba na Mose, kɛ Aaron, kɛ Israel ma kpekpemi ɔ tsuo ngɛ Paran nga a nɔ, ngɛ Kadesh. A gba mɛ nɔ́ nɛ a ya na ngɛ lejɛ ɔ, nɛ a ngɔ zugba a nɔ tso yiblii komɛ hu ba tsɔɔ mɛ.

27 A de Mose ke, “Wa ya slaa zugba a nɛ o tsɔ wɔ e nɔ ɔ; niinɛ, wa na kaa e ji zugba kpakpa nɛ baa ní. Zugba a nɔ tso yiblii komɛ po ji nɛ ɔmɛ nɛ.

28 Se mohu, nimli nɛ ngɛ zugba a nɔ ɔ kɛkɛ lɛ a he wa. A ma amɛ hu kle agboagbo nitsɛ, nɛ a fia gbogbo ngɔ wo a he. Enɛ ɔmɛ a se ɔ, nɔ́ nɛ wo wa he gbeye pe kulaa ji oblai[1] komɛ nɛ wa na ngɛ lejɛ ɔ.

29 Amalek bi ngɛ zugba a leneyi je; Hit bi, Yebus bi, kɛ Amor bi ngɛ yoku ɔmɛ a nɔ, nɛ Kanaan bi ngɛ wo ɔ nya, kɛ Yordan pa a he.”

30 Kɛkɛ nɛ Kaleb kuɛ wo ma a ngɛ Mose hɛ mi, nɛ e de mɛ ke, “Nyɛ ha waa ya esɔesɔ nɛ wa ya ngɔ zugba a; ejakaa wa ma nyɛ ngɔ faa.”

31 Se nyumu ɔmɛ nɛ kɛ lɛ ya slaa zugba a de ke, “Wa be nyɛe maa da nimli ɔmɛ a hɛ mi, ejakaa a he wa pe wɔ.”

32 Lɔ ɔ he ɔ, a gba Israel bi ɔmɛ zugba a nɛ a ya slaa a he sane yaya, nɛ a de ke, “Zugba a nɛ wa ya slaa a, e ji zugba nɛ ngɛ lɛ nitsɛ e nɔ bi a yi tanee, ejakaa zugba a hí. Jehanɛ, nimli nɛ wa ya na ngɛ zugba a nɔ ɔ hu, nyumu oblaihi sɔuu ji mɛ.

33 ⓠ Benɛ wa na oblai agboagbo ɔmɛ, nɛ ji Anak bi ɔmɛ, nɛ wa ngɔ wa he ngɔ to a he ɔ, wa pee tsɔwitsɔwi kaa adodohi; nɛ jã kɛ̃ wa ngɛ ngɛ mɛ hu a hɛ mi.”