Hosea 4

Yawɛ kɛ Israel ná

1 Nyɛ Israel bi, nyɛɛ bu nɔ́ nɛ Yawɛ ngɛ dee ɔ tue. Yawɛ ke Israel ma a tɔ̃ e nɔ. E ke, “Anɔkuale yemi ta zugba a nɔ; suɔmi be, nɛ imi Mawu nitsɛ hu a li mi.

2 Kita kami, lakpa yemi, muɔ si puemi, ju, kɛ gba puɛmi sɔuu ji a ní tsumi. Nɔ́ ko nɔ́ ko si we mɛ kpu, nɛ muɔ si kɛkɛ a ngɛ puee.

3 Enɛ ɔ he je nɛ zugba a pee mɔbɔmɔbɔ ɔ nɛ. Níhi tsuo nɛ ngɛ zugba a nɔ, nga mi lohwehi kɛ lohwe pɛlitsɛmɛ tsuo pee gbedee; nɛ pa mi lohi tete ngɛ gboe.”

Yawɛ kɛ osɔfo ɔmɛ ná

4 Yawɛ ke, “Nɔ ko kó pia ma a ke ma a lɛ tɔ̃; nɛ nɔ ko kó ka a hɛ mi hulɔ; nyɛ osɔfo ɔmɛ mohu lɛ i kɛ nyɛ ná.

5 Nyɛ ma tɛ si nyɔ kɛ pia; nyɛɛ kɛ gbali ɔmɛ tsuo ma tɛ si, nɛ ma kpata nyɛ nyɛ Israel ɔ hɛ mi.

6 Ye ma a hɛ mi ma kpata, ejakaa a li nɔ. Ee, nyɛ osɔfo ɔmɛ, nyɛ kua nile, lɔ ɔ he ɔ, imi hu ma kua nyɛ. Akɛnɛ nyɛ hɛ je ye mlaa amɛ a nɔ he je ɔ, imi hu ye hɛ maa je nyɛ binyumu ɔmɛ a nɔ.

7 “Si abɔ nɛ nyɛ, osɔfo ɔmɛ nyɛ he ngɛ hiɛe ɔ, si abɔ nɛ nyɛ ngɛ yayami babauu pee kɛ ngɛ mi sie. Lɔ ɔ he ɔ, i be nyɛ hɛ mi nyami woe; ma pue nyɛ hɛ mi si mohu.

8 Nyɛ náá ní babauu kɛ jee yayami nɛ ma a ngɛ pee ɔ mi. Lɔ ɔ he ɔ, nyɛ suɔ kaa ma a nɛ ya nɔ nɛ a hi yayami pee kpamisa.

9 Ma gbla nyɛ tsuo nyɛ tue: ma mi no gu jio, osɔfo jio, ma gbla nyɛ tue ngɛ yayami nɛ nyɛ peeɔ ɔ he.

10 Ke ma a ba sã bɔ ɔ, nyɛ blɔ fa mi nɔ́ ɔ, nyɛ maa ye, se nyɛ be tɔe. Nyɛ ma ya bɔ ajuama, se bi be mi jee; ejakaa imi Yawɛ ɔ, nyɛ kua mi, nɛ nyɛ ngɛ mawu kpahi jae. Bɔ nɛ yo yaholɔ peeɔ ɔ, jã ye ma a je ye se nɛ a ngɔ a he ya ha mawu kpahi.”

Yawɛ sume wɔ jami

11 Yawɛ ke, “Wai he, kɛ wai momo ha nɛ ye ma a ngɛ biɛe! A je ye se kulaa!

12 Tso kpoku mohu ngɔ a ya ngɛ ní bie ngɛ. Dɛma tso mohu a bi ɔ ke e tsɔɔ mɛ nile. Kaa bɔ nɛ yo yaholɔ peeɔ ɔ, a je ye se nɛ a kɛ a he ya ha mawu kpahi.

13 A ya sã bɔ ngɛ yohi a yi mi, nɛ a sã tsopa kɛ e he via hu ngɛ tso gagaahi nɛ bɔ kusuu a sisi, ngɛ yokuhi a yi mi, ejakaa lejɛ ɔ hɔ̃ ɔ mi jɔ. “Enɛ ɔ lɛ ha nɛ nyɛ biyi ɔmɛ ya peeɔ a he yaholi, nɛ nyɛ yigbayi ɔmɛ hu puɛɔ gba a nɛ.

14 Ke nyɛ biyi ɔmɛ ya pee a he yaholi,[4] nɛ nyɛ binyumu ɔmɛ a yi ɔmɛ ya puɛ gba a, i be a tue gblae; ejakaa nyɛ nitsɛmɛ hu nyɛ ya nyɛɛɔ yaholi nɛ ɔmɛ a se, nɛ nyɛɛ kɛ mɛ tsuo nyɛ ya sãã bɔ kɛ haa a wɔ ɔmɛ. Ejakaa ‘Ma nɛ li nɔ́ ɔ, a hɛ mi kpataa.’

15 “Israel, nyɛ yi mi anɔkuale; nyɛɛ hyɛ nɛ hi nɛ Yuda ko ba pee kaa nyɛ. Nyɛ ko ya ja Mawu ngɛ Gilgal, loo Betaven;[5] nɛ nyɛ kó ka kita ngɛ Yawɛ, Mawu hɛ kalɔ ɔ biɛ mi hulɔ.

16 Israel ma a tue mi ti kaa bɔ nɛ teji okpɔngɔ tue mi ti ɔ. Kɛ ma pee kɛɛ nɛ ma lɛ mɛ ngɛ nga nɔ kaa bɔ nɛ a lɛɛ to ɔ?

17 Israel ma a ke e ma ja amaga! É ya nɔ nɛ e pee nɔ́ nɛ e tsui suɔ.

18 Ke Israel bi ya tɔ dã kikɛ nɛ ɔ, a bɔɔ ajuama, nɛ a bua jɔɔ. Zo níhi a he a nyaa, pi níhi nɛ maa wo a hɛ mi nyami.

19 A maa be kɛ ho kaa bɔ nɛ kɔɔhiɔ woɔ nɔ́; nɛ zo maa gbe mɛ ngɛ bɔ ɔmɛ nɛ a sãã a he.