Hosea 3

Hosea kɛ e yo nɛ yi lɛ anɔkuale ɔ

1 Yawɛ de mi ekohu ke, “Yaa nɛ o ya hla yo gba puɛlɔ, nɛ o suɔ lɛ, kaa bɔ nɛ imi hu i suɔ ye ma Israel ɔ. Ye ma Israel kua mi; a ya ngɛ mawu kpahi a se nyɛɛe, nɛ a kɛ wai yiblii gbigbli sãã bɔ kɛ haa mɛ lɛɛ, se kɛ̃, i suɔ mɛ.”

2 Lɔ ɔ he ɔ, i ngɔ sika hiɔ yi nyɔngma kɛ enuɔ, kɛ ngma tsimi lafa kɛ nyingmi enuɔ kɛ kpɔ ye yo ɔ.

3 I de lɛ ke lɛ nɔ kake too nɛ hi si; e ko pee yakayaka; e ko ya nyɛɛ nyumu kpahi a se. Kɛkɛ ɔ, imi hu i kɛ lɛ maa hi si.

4 Kikɛ nɛ ɔ Israel bi hu maa hi si be babauu nɛ a be matsɛmɛ, loo hɛ mi nyɛɛli. Bɔ sami, kɛ tɛ titimahi a jami se maa po; nɛ amagahi, kɛ níhi nɛ a kɛ klaa a, ekoeko be si hie hu.

5 Se pee se ɔ, Israel bi ɔmɛ maa kpale kɛ ba a ma a mi ekohu; a ma ba hla Yawɛ, a Mawu ɔ, kɛ David nɛ ji matsɛ ɔ nina se blɔ ekohu. Jamɛ a be ɔ, a maa ye Yawɛ gbeye, nɛ a ma na nike ní kpakpahi kɛ je e dɛ mi.