Ezekiel 44

Yawɛ we ɔ beleku je agbo ɔ

1 Jehanɛ nyumu ɔ kpale mi kɛ ba he klɔuklɔu ɔ we agbo ɔ nɛ hɛ mi kpee beleku je ɔ nya. A nga agbo ɔ.

2 Yawɛ de mi ke, “A gbo nɛ ɔ, á nga daa; a ko bli gblegbleegble. Nɔ ko nɔ ko kó gu lejɛ ɔ kɛ sɛ we ɔ mi, ejakaa imi Yawɛ, Israel Mawu ɔ nitsɛ i gu lejɛ ɔ kɛ sɛ mi. Lɔ ɔ he ɔ, á nga daa.

3 Ganɔ ɔ pɛ lɛ ngɛ he blɔ nɛ e yaa lejɛ ɔ. E ma nyɛ maa hi lejɛ ɔ kɛ ye ní ngɛ Yawɛ hɛ mi. É gu kue ngua a nɛ ngɛ se je ɔ mi kɛ ya, nɛ é gu lejɛ ɔ nɔuu kɛ je kpo.”

Blɔ nya tomi kɛ ha nihi nɛ maa ya Yawɛ we ɔ

4 Lɔ ɔ se ɔ, nyumu ɔ kɛ mi ya gu omleyi je agbo ɔ mi kɛ ba we ɔ hɛ mi, nɛ i na Yawɛ hɛ mi nyami ɔ nɛ hyi we ɔ tɔ. I ngɔ ye hɛ mi kɛ bu si.

5 Kɛkɛ nɛ Yawɛ de mi ke, “Nɔmlɔ adesa, bli o hɛngmɛ nɛ o hyɛ nɔ́ tsuaa nɔ́ pɛpɛɛpɛ; bu nɔ́ tsuaa nɔ́ tue saminya. Blɔ nya tomihi, kɛ mlaahi nɛ kɔɔ ye we ɔ he ɔ, kadi mɛ, konɛ o hɛ ko je a nɔ. Ná nɛ o le kaa pi nɔ tsuaa nɔ kɛkɛ nɛ yaa ye we ɔ.

6 “De Israel ma atuã tsɔli nɛ ɔmɛ ke imi Nyɔmtsɛ Yawɛ i be mɛ blɔ ngmɛe nɛ a pee ní hiemi níhi nɛ a ngɛ pee ɔ hu.

7 A ha nibwɔhi mɔmlɔtɔtsɛmɛ, nihi nɛ a he tsɔ we, nɛ a bui mi tue ba sɛ ye we ɔ mi, benɛ osɔfo ɔmɛ ngɔ zɔ kɛ muɔ kɛ ngɛ bɔhi sãe ha mi ɔ. Ye ma a yi ye somi ɔ nɔ, nɛ a ngɔ a ní hiemi ní nɛ ɔmɛ hu kɛ tɔ ye nɔ.

8 Mɛ nitsɛmɛ a tsu we ye ní klɔuklɔu ɔmɛ a he ní ngɛ ye we ɔ, se mohu a ngɔ nibwɔhi kɛ to ní tsumi ɔmɛ a nya.

9 “Lɔ ɔ he ɔ, imi Nyɔmtsɛ Yawɛ, i ngɛ dee ke nubwɔ mɔmlɔtɔtsɛ nɛ he tsɔ we, nɛ bui mi tue kó sɛ ye we ɔ mi kɔkɔɔkɔ; nibwɔhi nɛ ngɛ Israel bi ɔmɛ a kpɛti tete po a ko ya lejɛ ɔ.”

Levi bi nɛ be he blɔ kaa a tsuɔ osɔfo ní tsumi

10 Yawɛ de mi ke, “Levi bi nɛ a kɛ Israel ma nɛ piɛ ɔ kua mi, nɛ a ya ja amagahi ɔ, ma gbla a tue.

11 A ma sɔmɔ ngɛ ye we ɔ; a maa bu agbo ɔmɛ a nya, nɛ a ma tsu ní ngɛ we ɔ. Lohwehi nɛ a kɛ ba sãã sami bɔ, kɛ bɔ kpahi ɔ, mɛ lɛ a maa gbe lohwe ɔ, nɛ mɛ nɔuu lɛ a ma sɔmɔ nihi nɛ ba bɔ sami ɔ.

12 Akɛnɛ a nyɛɛ Israel ma a hɛ mi kɛ ya ja amagahi, nɛ a ha a pee yayami kɛ si mi he je ɔ, imi Nyɔmtsɛ Yawɛ, i ngɛ ye he kita kae ke ma gbla a tue kokooko.

13 A ko sã kɛ su ye he, nɛ a ko ba tsu osɔfo ní tsumi ha mi. A ko ba ta ye ní klɔuklɔu ɔmɛ a he; nɛ a ko ya he klɔuklɔu pe kulaa a hulɔ. Enɛ ɔ ji a tue gblami ngɛ ní hiemi níhi nɛ a pee ɔ a he.

14 Se kɛ̃ ɔ, ma ha a maa hyɛ sɔlemi we ɔ nɔ. Sɔmɔmi ní tsumi, kɛ ní tsumi kpahi nɛ hia kaa a tsu ɔ, mɛ lɛ a ma tsu.”

Osɔfo ɔmɛ

15 Nyɔmtsɛ Yawɛ ke, “Benɛ Israel ma a nɛ piɛ ɔ tsuo kua mi ɔ, Levi weku ɔ mi osɔfohi nɛ ji Zadok nina a, mɛɛ lɛɛ a sɔmɔ mi saminya ngɛ ye we ɔ. Lɔ ɔ he ɔ, mɛ pɛ ji nihi nɛ maa ba ye hɛ mi nɛ a ba sɔmɔ mi. Mɛ ji nihi nɛ maa ngɔ zɔ, kɛ nu ɔ kɛ ba ha imi Nyɔmtsɛ Yawɛ.

16 Mɛ pɛ ji nihi nɛ maa ba ye he klɔuklɔu ɔ. A maa ba ye we okplɔɔ ɔ he, konɛ a ba sɔmɔ mi. Mɛ ji ni nɛmɛ nɛ maa hyɛ nɛ a ja mi saminya.

17 ⓧ Ke a maa ba Yawɛ we ɔ kpo nɔ je kue ɔmɛ a mi ɔ, a wo kploba tade. A ko wo kuutu nɔ́ ko kɛ ya sɔmɔ ngɛ kue ngua a nɛ ngɛ kpɛti ɔ mi; ye we ɔ nitsɛ mi hu, á pee ja kɛ.

18 Bɔ nɛ pee nɛ latsa ko tsa mɛ benɛ a ngɛ sɔmɔe ɔ, a ngɔ kploba kɛ pee yi fimi nɔ́ kɛ fi a yi; nɛ a wo kploba tade ngɛ a mlɛ mi kɛ ya si nane si, se a ko fi a mlɛ mi nɔ́ ko.

19 ⓨ Ke a maa je kpo kɛ ya agbo nya je kue ɔ mi, kɛ ya he nɛ ma a ngɛ ɔ, a je tade ɔmɛ nɛ a wo kɛ sɔmɔ ɔ kɛ pue tsu klɔuklɔu ɔmɛ a mi. A wo tade kpahi, bɔ nɛ pee nɛ heha ní klɔuklɔu nɛ ɔmɛ ko ye ma a awi.[8]

20 ⓩ “Osɔfo ɔmɛ ko sã a yi nɔ kpalokpalo, nɛ a ko ngmɛɛ a yi bwɔmi he nɛ e ka gagaa hulɔ. A dla a yi ɔ he bɔ nɛ sa kɛkɛ.

21 ⓐ Ke osɔfo ko maa ya he klɔuklɔu ɔ, e ko nu dã.

22 ⓑ Osɔfo kó ngɔ yalɔyo, loo yo nɛ e kɛ e huno be hu; e ngɔ yomiyo kɛ je e ma Israel bi ɔmɛ a kpɛti, aloo osɔfo ko nɛ be je mi ɔ e yo yalɔyo.

23 ⓒ “Osɔfo ɔmɛ nɛ́ a tsɔɔ ye ma a slɔɔto nɛ ngɛ nɔ́ klɔuklɔu, kɛ nɔ́ nɛ be klɔuklɔu a kpɛti, kɛ slɔɔto nɛ ngɛ nɔ́ nɛ he tsɔ we, kɛ nɔ́ nɛ he tsɔ a kpɛti.

24 Ke sane ko ba a, osɔfo ɔmɛ nɔuu nɛ a hyɛ sane ɔ mi, nɛ á kojo ngɛ ye mlaa amɛ a nya. Mlaahi, kɛ blɔ nya tomihi nɛ kɔɔ nyami be ɔmɛ tsuo a he ɔ, a hyɛ nɛ a ye a nɔ pɛpɛɛpɛ, nɛ a pee Hejɔɔmi ligbi ɔmɛ klɔuklɔu.

25 ⓓ “Osɔfo ko kó ya gbogboe kasa nya nɛ e kɛ ba ble e he. Ke e he nɔ kɔklɔɔ kaa e tsɛ, loo e nyɛ, loo e binyumu, loo e biyo, loo e nyɛminyumu, loo e nyɛmiyo nɛ yɛ gba we kikɛ nɛ ɔ nɛ gbo lɛɛ e ma nyɛ ma ble e he faa.

26 Ke e tsukɔ e he se ɔ, a kane ligbi kpaago ha lɛ, kɛkɛ ɔ, e he ma tsɔ.

27 Jehanɛ, e ya Yawɛ we ɔ mi mi je kue ɔ mi, nɛ e ya sã yayami pami bɔ, konɛ e nyɛ nɛ e ya sɔmɔ mi ngɛ Yawɛ we ɔ ekohu. Imi, Yawɛ lɛ i de.

28 ⓔ “Weto ní nɛ i ha Israel bi ɔmɛ, nɛ yi nɔ kake siɔ kɛ haa yi nɔ nɛ nyɛɛ se kɛ maa ya neneene ɔ, osɔfo ɔmɛ lɛɛ a nɔ́ ji osɔfo yemi; imi nitsɛ ji a weto ní, kɛ a nɔ́ tsuaa nɔ́. Lɔ ɔ he ɔ, a be weto ní kpa ko nae ngɛ Israel ma a mi.

29 ⓕ Osɔfo ɔmɛ a niye ní nɛ a maa ye ji niye ní bɔ ɔmɛ, yayami pami bɔ ɔmɛ, kɛ fɔ yemi bɔ ɔmɛ; jehanɛ hu, nɔ́ tsuaa nɔ́ nɛ Israel bi ɔmɛ maa gbaa nɔ kɛ ke mi ɔ peeɔ osɔfo ɔmɛ a nɔ́.

30 Tso yiblii tsuaa tso yiblii kekleekle nɔ́, kɛ ní slɔɔtohi nɛ nyɛɛ kɛ ma ba sã bɔ ha mi ɔ a mi nɔ́ nɛ hi pe kulaa a peeɔ osɔfo ɔmɛ a nɔ́. Jehanɛ hu, ke a sã abolo ɔ, a ngɔ kekleekle nɔ́ nɛ a bɔ ɔ kɛ ba ha osɔfo ɔmɛ, konɛ ye gbaami nɛ hi we ɔmɛ a mi.

31 ⓖ Osɔfo kó ye lohwe ko nɛ lɛ nitsɛ e gbo, loo lohwe kpa ko tsɔtslɔɔ e mi kɔkɔɔkɔ, lohwe pɛlitsɛ jio, nane eywiɛtsɛ jio.”