Ezekiel 43

Yawɛ kpale kɛ ba e we ɔ mi

1 Nyumu ɔ kɛ mi ba agbo ɔ nɛ ngɛ beleku je ɔ nya.

2 ⓤ Kɛkɛ nɛ i na Israel Mawu ɔ hɛ mi nyami ɔ nɛ ngɛ kpɛe plamplam kɛ je beleku je kɛ ma. Mawu gbi ngɛ pɛe hoo kɛ ma kaa wo nɛ gli; nɛ lejɛ ɔ tsuo pee hleii kɛ e hɛ mi nyami ɔ.

3 Nina nɛ ɔ ngɛ kaa nina nɛ i na benɛ Mawu ba kpata Yerusalem hɛ mi, kɛ nina nɛ i na ngɛ Kebar pa a nya a. Kɛkɛ nɛ i ngɔ ye hɛ mi kɛ bu zugba.

4 Yawɛ hɛ mi nyami ɔ gu agbo nɛ ngɛ beleku je ɔ mi kɛ ya sɛ Yawɛ we ɔ.

5 Yawɛ mumi ɔ wo ye nɔ, nɛ e kɛ mi ya ma mi mi je kue ɔ mi. E hɛ mi nyami ɔ hyi we ɔ tɔ.

6 Benɛ nyumu ɔ daa si ngɛ ye kasa nya ngɛ lejɛ ɔ, i nu nɛ Yawɛ kɛ mi tu munyu kɛ je we ɔ mi ke,

7 “Nɔmlɔ adesa, ye matsɛ sɛ maa si ngɛ hiɛmɛ nɛ ɔ; ma hi Israel bi ɔmɛ a kpɛti ngɛ hiɛmɛ nɛ ɔ kɛ maa ya neneene. Kɛkɛ ɔ, Israel ma a jio, a matsɛmɛ ɔmɛ jio, a be ye hɛ mi si puee hu; a be mawu kpahi jae, nɛ a be a matsɛmɛ ɔmɛ a gbogboe ɔmɛ pue ngɛ hiɛmɛ nɛ ɔ hu.

8 Matsɛmɛ ɔmɛ pee a kpoku ɔmɛ, nɛ a ma a sinya tso ɔmɛ ngɛ ye kpoku ɔmɛ, kɛ ye sinya tso ɔmɛ a kasa nya haa, nɛ gbogbo kɛkɛ lɛ po wa kpɛti. Se a ngɔ a ní hiemi níhi nɛ a pee ɔ kɛ ble ye biɛ klɔuklɔu ɔ; lɔ ɔ he ɔ, i kɛ abofu kpata a hɛ mi.

9 Jehanɛ lɛɛ a ma kpa mawu kpahi jami, nɛ a ma je a matsɛmɛ ɔmɛ a gbogboe ɔmɛ kɛ je ye kasa nya kɛ ya se lokoo. Ke a pee ja a, ma hi a kpɛti kɛ maa ya neneene.”

10 Yawɛ ya nɔ, nɛ e de mi ke, “Nɔmlɔ adesa, bɔ nɛ imi Yawɛ ye we ɔ ngɛ ha a, kale fitsofitso kɛ tsɔɔ Israel bi ɔmɛ. Ha nɛ zo nɛ gbe mɛ ngɛ yayamihi nɛ a pee ɔ a he.

11 Ke a hɛ mi pue si kikɛ nɛ ɔ ngɛ a yayami ɔmɛ a he ɔ, lɛɛ ngɔɔ we ɔ he nɔ́ tsuaa nɔ́ kɛ tsɔɔ mɛ: e kami, e blimi, e hiɔwe yami, e blɔ nya tomi, hehi nɛ a guu kɛ sɛɛ we ɔ mi, kɛ hehi nɛ a guu kɛ jee kpo. Tsɔɔ mɛ mlaahi nɛ kɔɔ we ɔ he tsuo. Kadi ní nɛ ɔmɛ tsuo ngɛ womi nɔ ha mɛ, konɛ a na bɔ nɛ a to ní ɔmɛ pɛpɛɛpɛ ha, bɔ nɛ blɔ nya tomi ɔmɛ, kɛ ye mlaa amɛ tsuo ngɛ, nɛ a ye a nɔ fitsofitso.

12 Mlaa nɛ kɔɔ imi Yawɛ ye we ɔ he ji nɛ ɔ nɛ: yo ɔ yi mi tsuo kɛ bɔle si kɛ kpe ɔ maa pee he klɔuklɔu pe kulaa.”

Bɔ sami la tɛ ɔ

13 ⓥ Nɔ́ susumi tso nɛ kami peeɔ nine mi blimi enyɔ kɛ nine kpɔmi kake nɛ nyumu ɔ kɛ susu Yawɛ we ɔ, lɔ ɔ nɔuu e kɛ susu bɔ sami la tɛ ɔ sisi ɔ. Bɔ sami la tɛ ɔ kami pee nine mi blimi enyɔ, nɛ e blimi hu nine mi blimi enyɔ; nɛ nine mi blimi kake bɔle e tue ɔ kɛ kpe.

14 Kɛ je bɔ sami la tɛ ɔ mi dlami nɛ ngɛ sisi ɔ yi mi kɛ ba su zugba mi ɔ peeɔ gugue fa. Mi dlami nɛ tsa nɔ ɔ, a ha e ya se nine mi blimi enyɔ kɛ bɔle la tɛ ɔ tsuo kɛ kpe, nɛ e hiɔwe yami ji gugue kake. Mi dlami nɛ tsa enɛ ɔ hu nɔ ɔ, a ha e ya se je nine kpɔ mi kake kɛ bɔle la tɛ ɔ tsuo kɛ kpe.

15 E yi mi he nɛ a sãã bɔ ɔmɛ ngɛ ɔ peeɔ gugue kake. Koli eywiɛ maa si glouu ngɛ la tɛ ɔ kɔ nya eywiɛ ɔmɛ.

16 Bɔ sami la tɛ ɔ yi mi kami kɛ e blimi sɔ, gugue etɛ ngɛ hiɛ kɛ hiɛ.

17 Mi dlami ɔ nɛ ngɛ kpɛti ɔ hu kami kɛ e blimi sɔ, gugue etɛ kɛ fa ngɛ hiɛ kɛ hiɛ; kla nɛ bɔle e tue kɛ kpe ɔ hiɔwe yami ji nine mi blimi kake; nɛ e sisi ɔ, nine mi blimi enyɔ bɔle la tɛ ɔ kɛ kpe. Kpokuhi nɛ a kuɔɔ kɛ yaa bɔ sami la tɛ ɔ he ɔ ngɛ la tɛ ɔ beleku je.

Bɔ sami la tɛ ɔ he tsukɔmi

18 Mlaahi nɛ ngɛ bɔ sami la tɛ ɔ he ɔ, nɔ́ nɛ Nyɔmtsɛ Yawɛ ngɛ dee nɛ kɔɔ he ji nɛ ɔ nɛ: “Ke a ma bɔ sami la tɛ ɔ nɛ a maa sã bɔ ngɛ nɔ, nɛ a maa ngɔ muɔ kɛ fĩa nɔ ɔ gbe nya a,

19 Levi bi osɔfo ɔmɛ nɛ ji Zadok nina, nɛ mɛ pɛ lɛ a ba sɔmɔɔ mi ngɛ ye he klɔuklɔu ɔ, ha mɛ na ku nɛ a kɛ sã yayami pami bɔ.

20 Bɔ nɛ o maa pee kɛ tsukɔ bɔ sami la tɛ ɔ he, nɛ e pee klɔuklɔu ha Nyɔmtsɛ Yawɛ ji nɛ ɔ nɛ: ngɔɔ muɔ ɔ eko nɛ o kɛ kpa koli eywiɛ ɔmɛ, la tɛ ɔ kpɛti mi dlami ɔ kɔ nya eywiɛ ɔmɛ, kɛ kla nɛ bɔle la tɛ ɔ he tsuo kɛ kpe ɔ.

21 Jehanɛ ngɔɔ na ku ɔ nɛ a kɛ maa sã yayami pami bɔ ɔ. Ha nɛ a sã lɛ ngɛ Yawɛ we ɔ he, he nɛ a to nɛ a pee ngɛ ɔ.

22 E nɔ jena a, ngɔɔ akpakpo nɛ kpa ko be e he kɛ ba sã yayami pami bɔ kɛ tsukɔ bɔ sami la tɛ ɔ he.

23 Ke o tsukɔ la tɛ ɔ he gbe nya a, ngɔɔ na ku kɛ agbosu nɛ kpa ko be a he kɛ ba.

24 Ngɔɔ mɛ kɛ ba ha Yawɛ. Osɔfo ɔmɛ maa ngɔ ngo kɛ fĩa a nɔ, nɛ a kɛ mɛ maa sã sami bɔ kɛ ha imi Yawɛ.

25 Ngɔɔ akpakpo kɛ ba nɛ a kɛ sã yayami pami bɔ daa ligbi kɛ yaa si ligbi kpaago. Ngɔɔ na ku kɛ agbosu hu nɛ kpa ko kpa ko be mɛ tsuo a he kɛ ba ja nɔuu.

26 A ngɔ ligbi kpaago kɛ tsukɔ bɔ sami la tɛ ɔ he, nɛ á gbaa nɔ kɛ ha bɔ sami.

27 ⓦ Ke a gbe ligbi kpaago ní tsumi ɔ nya a, kɛ je ligbi kpaanyɔ ɔ hluu kɛ yaa a, osɔfo ɔmɛ nɛ a sã sami bɔ ɔmɛ, kɛ tue mi jɔmi bɔ ɔmɛ ngɛ bɔ sami la tɛ ɔ nɔ. Kɛkɛ ɔ, ye bua maa jɔ ma a tsuo he. Imi, Nyɔmtsɛ Yawɛ lɛ i de.”