Ezekiel 33

Mawu pee Ezekiel bulɔ

(<x>330 3:16-21</x>)

1 Yawɛ kɛ mi tu munyu ekohu.

2 E ke, “Nɔmlɔ adesa, tu munyu kɛ tsɔɔ o ma a mi bi ɔmɛ, nɛ o de mɛ nɔ́ nɛ maa ba ke i ha ta ba zugba ko nɔ ɔ. Ma a mi bi ɔmɛ maa hla a kpɛti nɔ kake kaa a ma a he bulɔ.

3 Ke e na he nyɛli ɔmɛ nɛ a ma a, e ma kpa titimati kɛ wo ma a tue nɔ.

4 Nɔ tsuaa nɔ nɛ maa nu bɛ nɛ ɔ nɛ e be bue ɔ, ke he nyɛli ɔmɛ ba gbe lɛ ɔ, e gbenɔ ɔ sa lɛ nitsɛ.

5 Ejakaa e nu titimati ɔ pɛmi, se e bui. E bu tue jinɛ e ko he lɛ nitsɛ e yi wami.

6 Jehanɛ hu, ke bulɔ ɔ na he nyɛli ɔmɛ nɛ a ma, nɛ e kpa we titimati kɛ wo ma a tue nɔ ɔ, he nyɛli ɔmɛ ma ba gbe yayami peeli ɔmɛ lɛɛ, se ma bi a muɔ si ngɛ bulɔ ɔ dɛ.

7 “Nɔmlɔ adesa, jehanɛ bu tue, ma pee mo Israel ma a he bulɔ. Munyuhi nɛ ma tu kɛ bɔ mɛ kɔkɔ ɔ, de mɛ lɛ tsuo.

8 Ke i de ke yayami peelɔ ko ma gbo ngɛ e yayami nɛ e ngɛ pee ɔ he, se o bɔɛ lɛ kɔkɔ, konɛ e tsake kɛ je e blɔ yayami ɔ nɔ nɛ e yi nɛ na wami ɔ, e ma gbo ngɛ e yayami ɔmɛ a he lɛɛ, se ma bi e muɔ si ngɛ o dɛ.

9 Ke o bɔ yayami peelɔ kɔkɔ, se e tsakee we e tsui nɛ e kpa yayami nɛ e ngɛ pee ɔ, e ma gbo ngɛ e yayami ɔ he, se moo lɛɛ o maa ye o he.”

Nɔ tsuaa nɔ maa bu e ní tsumi he akɔtaa

10 Yawɛ kɛ mi tu munyu. E ke, “Nɔmlɔ adesa, bɔ nɛ Israel ma a ngɛ dee ji, ‘Wa tɔmi ɔmɛ, kɛ wa he yayami ɔmɛ pee tlomi ngɛ wa nɔ, nɛ e ha wa ngɛ he lo tae. Kɛ wa maa pee kɛ hi je mi kɛɛ?’

11 De mɛ ke imi Nyɔmtsɛ Yawɛ, i ngɛ ye he kita kae ke i na we yayami peelɔ gbenɔ he bua jɔmi, se mohu i suɔ kaa e kpa yayami peemi, konɛ e yi nɛ na wami. Israel, nyɛ kpa yayami nɛ nyɛ ngɛ pee ɔ. Mɛni he je nyɛ suɔ mohu kaa nyɛ ma gbo ɔ?

12 “Nɔmlɔ adesa, jehanɛ de Israel ma a ke, ke dalɔ pee yayami ɔ, kpakpa nɛ e pee be ko ɔ be nyɛe ma he e yi wami. Ke yayami peelɔ kpa yayami peemi ɔ, a be e tue gblae; nɛ ke dalɔ bɔni yayami peemi ɔ, a be e yi wami hee.

13 Ke i de dalɔ ko ke bɔ tsuaa bɔ nɛ pee ɔ, e yi ma na wami, kɛkɛ nɛ e bɔni kpakpa nɛ e pee be ko ɔ he susumi kaa e hiɛ babauu, nɛ jehanɛ e bɔni yayami peemi ɔ, i be kpakpa nɛ e pee be ko ɔ kaie. Yayamihi nɛ e pee ɔ a he e ma gbo ngɛ.

14 Ke i bɔ yayami peelɔ kɔkɔ kaa e ma gbo, kɛkɛ nɛ e kpa yayami peemi, nɛ e bɔni nɔ́ nɛ da peemi kɛ dami sane yemi ɔ, e be gboe; e yi ma na wami.

15 Lɔ ɔ ji kaa nɔ́ ko nɛ a kɛ ba to awaba ngɛ e ngɔ ɔ, e kpale kɛ ya ha nɔtsɛ; aloo nɔ́ ko nɛ e ya ju ɔ, e kpale ya ha nɔtsɛ. Ke e kpa yayami peemi, nɛ e bɔni mlaahi nɛ haa nɔ wami ɔ a nɔ yemi ɔ, e be gboe; e yi ma na wami.

16 Yayami nɛ e pee ɔ, ma ngɔ kɛ pa lɛ, nɛ e yi ma na wami; ejakaa e pee nɔ́ nɛ da, nɛ e ye dami sane.

17 “Se o ma a mi bi ɔmɛ ke nɔ́ nɛ i peeɔ ɔ dɛ! Dɛbi, mɛ mohu lɛ a ní peepee ɔmɛ dɛ!

18 Ke dalɔ kpale kɛ je e dami blɔ ɔ nɔ, nɛ e pee yayami ɔ, yayami ɔ he e ma gbo ngɛ.

19 Ke yayami peelɔ kpa yayami peemi, nɛ e pee nɔ́ nɛ da, nɛ e ye dami sane ɔ, e he e yi wami.

20 Se kɛ̃ ɔ, Israel ma, nyɛ ke nɔ́ nɛ i peeɔ ɔ dɛ. Nɔ́ nɛ nyɛ ti nɔ tsuaa nɔ peeɔ ɔ, lɔ ɔ nɔ ma da kɛ kojo lɛ.”

A ywia Yerusalem ma a

21 ⓖ Benɛ a nuu wɔ kɛ ho ma se ya a, jeha nyɔngma kɛ enyɔne ɔ we nyɔhiɔ nyɔngmane ɔ we ligbi enuɔne ɔ, nyumu ko nɛ tu fo kɛ je Yerusalem, ba bɔ mi amaniɛ ke he nyɛli ba ywia Yerusalem ma a.

22 Gbɔkuɛ ɔ nɛ e nɔ jena mɔtu loko amaniɛ bɔlɔ ɔ ba a, Yawɛ he wami ɔ ma ye nya. Se mɔtu maa pee benɛ e ba a, Yawɛ bli ye nya momo, lɔ ɔ he ɔ, i nyɛ tu munyu.

Ma a pee yayamihi babauu

23 Kɛkɛ nɛ Yawɛ de mi ke,

24 “Nɔmlɔ adesa, nihi nɛ ngɛ ma doku ɔmɛ a mi ngɛ Israel zugba a nɔ ɔ deɔ mi ke, ‘Abraham ɔ nɛ a ngɔ zugba a tsuo ngɔ ha lɛ ɔ, nɔ kake too ji lɛ, se wɔɔ lɛɛ wa he hiɛ; lɔ ɔ he ɔ, zugba a, wɔ a kɛ ha kaa wa weto ní.’

25 “De mɛ ke imi Nyɔmtsɛ Yawɛ, bɔ nɛ i ngɛ dee ji, nyɛ yeɔ lo nɛ muɔ ngɛ mi. Nyɛ jaa amagahi. Nyɛ pueɔ muɔ si. Mɛni ha nɛ nyɛ susuɔ kaa nyɛ nɔ ji zugba a?

26 Nyɛ hiaa klaate kɛ woɔ nyɛ sibi a he. Nyɛ tsuɔ níhi nɛ a hiee babauu; nyɛ tsuo pɛpɛɛpɛ nyɛ puɛɔ gba. Mɛni kulaa lɛ haa nyɛ susuɔ kaa nyɛ nɔ́ ji zugba a?

27 “De mɛ ke imi Nyɔmtsɛ Yawɛ, i ngɛ ye he kita kae ke bɔ tsuaa bɔ nɛ pee ɔ, nihi nɛ ngɛ ma doku ɔmɛ a mi ɔ, a ma kpata mɛ tsuo a hɛ mi. Nihi nɛ ngɛ nga a nɔ ɔ, nga mi lohwe awi yeli maa ye mɛ. Nɛ nihi nɛ ya laa a he ngɛ yo ɔmɛ a nɔ, kɛ tɛ muɔhi a mi ɔ, gbenɔ hiɔ maa gbe mɛ.

28 Ma ha zugba a nɔ tsuo maa pee pasaa kulaa, kɛkɛ ɔ, zugba a mi he wami nɛ a ngɔ a hɛ kɛ fɔ nɔ ɔ se maa po. Yo ɔmɛ a nɔ maa je gu; lejɛ ɔmɛ maa pee gbeye, nɛ nɔ ko nɔ ko be lejɛ ɔmɛ gue hu.

29 Ke i pee zugba a tsuo pasaa nɛ e pee ma doku ngɛ yayamihi babauu nɛ a pee ɔ a he ɔ, kɛkɛ ɔ, a maa le kaa imi ji Yawɛ.”

Nɔ́ nɛ ba ngɛ gbalɔ ɔ sɛ gbi ɔ se

30 Yawɛ de mi ke, “Nɔmlɔ adesa, ke o ma a mi bi ɔmɛ ba kpe ngɛ ma a gbogbo ɔmɛ a he, loo a we agbo ɔmɛ a nya a, o he munyu sɔuu lɛ a hii tue. Bɔ nɛ a deɔ a sibi ji, ‘Nyɛɛ ba nɛ wa ya bu munyu nɛ kpale je Yawɛ ngɔ kɛ ba amlɔ nɛ ɔ tue.’

31 Lɔ ɔ he ɔ, ye ma a baa o ngɔ, nɛ a ba hii si ngɛ o hɛ mi nɛ a buɔ munyu ɔmɛ tue, se nɔ́ nɛ o deɔ mɛ ke a pee ɔ, lɔ ɔ lɛɛ a pee we. Á yeɔ nɔ he fɛu, nɛ a se nami he pɛ a susuɔ.

32 A buɔ mo kaa nɔ ko nɛ laa suɔmi la kɛ gbi ngɔngɔɛ, aloo nɔ ko nɛ le saku fiami saminya. A ba buɔ o munyu ɔmɛ tue lɛɛ, se a yi nɔ.

33 Níhi nɛ o de mɛ ɔ tsuo maa ba mi sisiisi. Ke a ba mi ɔ, kɛkɛ a maa le kaa gbalɔ ko kɛ mɛ ba hi si hyɛ.”