Ezekiel 32

Egipt matsɛ ɔ ngɛ kaa nyaka

1 Benɛ a nuu wɔ kɛ ho ma se ya a, jeha nyɔngma kɛ enyɔne ɔ we nyɔhiɔ nyɔngma kɛ enyɔ ɔ we kekleekle ligbi ɔ, Yawɛ kɛ mi tu munyu.

2 E de ke, “Nɔmlɔ adesa, la hɛdo la nɛ o kɛ bɔ Egipt matsɛ ɔ kɔkɔ. Ngɔɔ ye sɛ gbi nɛ ɔ kɛ ha lɛ: O peeɔ o níhi kaa nɔ́ nɛ jata ji mo ngɛ je ma amɛ a kpɛti; se o ngɛ kaa nyaka nɛ ngɛ pa gudue mohu. O tuɔ kɛ sɛɛ o pa amɛ a mi tsulaoo; o kɛ o nane gbidii nyu ɔ kɛ puɛɔ pa amɛ.

3 Ke je ma amɛ ba bua a he nya babauu ɔ, imi Nyɔmtsɛ Yawɛ nitsɛ ma fɔ ye ya a kɛ pue o nɔ; e maa du mo, nɛ je ma amɛ maa gbla mo kɛ ba kpo.

4 Ma sake mo ngɔ fɔ zugba; nɛ lohwe pɛlitsɛmɛ, kɛ nga mi lohwehi tsuo ma ba ye mo.

5 Ma sake o gbogboe ɔmɛ kɛ pue yo ɔmɛ a nɔ, kɛ kɔ̃ ɔmɛ a mi.

6 O muɔ ma pue si ngɛ zugba kɛ maa su benɛ yo ɔmɛ a nɔ tsuo ma pee kpɔtɔɔ, nɛ nyu dɔ ɔmɛ ma hyi kɛ o muɔ.

7 ⓕ Benɛ ma kpata o hɛ mi ɔ, ma tsi hiɔwe hɛ mi; dodoe ɔmɛ maa laa. Pu maa laa e hɛ mi ngɛ bɔku ɔmɛ a se; nɛ nyɔhiɔ be kpɛe hu.

8 Ma ha pu, nyɔhiɔ, kɛ dodoe ɔmɛ tsuo maa laa, nɛ diblii maa wo ngɛ je ɔ mi tsuo. Imi, Nyɔmtsɛ Yawɛ lɛ i de.

9 “Je mahi babauu, ngɛ zugbahi a nɔ he nɛ o li tete po, ke a nu bɔ nɛ i kpata o hɛ mi[7] ɔ, a maa ye tsui.

10 Nɔ́ nɛ ma pee mo ɔ ma ha je mahi babauu a he mi maa po, nɛ sawale maa nu a matsɛmɛ ɔmɛ wawɛɛ. Bɔ nɛ ma fɔ ye klaate ɔ yami kɛ bami ngɛ a hɛ mi ɔ, ligbi ɔ nɛ o maa nɔ si ɔ, mɛ tsuo pɛpɛɛpɛ a he maa do blibliibli, kaa kikɛ nɛ ɔ mɛ hu a hɛ mi ma kpata lo?”

11 Bɔ nɛ Nyɔmtsɛ Yawɛ ngɛ Egipt matsɛ ɔ dee ji nɛ ɔ nɛ: “Ma ha Babilonia matsɛ ɔ kɛ mo maa hwu ta.

12 Ma ha o tabo kpekpemi ɔ maa nɔ ngɛ katsɛmɛ kpanakpanaa a klaate nya. O kɛ o ma a, kɛ nɔ́ tsuaa nɔ́ nɛ o ngɔɔ o hɛ kɛ fɔɔ nɔ ɔ nyɛ hɛ mi ma kpata.

13 Ma gbe o lohwe ɔmɛ tsuo ngɛ pa amɛ a tue, nɛ nane ko nane ko be pa a gbidie hu; nɔmlɔ jio, lohwe jio.

14 Jamɛ a be ɔ, ma ha o nyu ɔ hɛ mi ma tsɔ, nɛ pa amɛ maa be kaa nu. Imi Yawɛ lɛ i de.

15 Ke i kpata Egipt ma a, kɛ e mi níhi, kɛ nimli tsuo nɛ ngɛ lejɛ ɔ a hɛ mi kikɛ ɔ, kɛkɛ a maa le kaa imi ji Yawɛ.

16 Kɔkɔ nɛ a ngɛ mo bɔe nɛ ɔ ma ba pee kɔmɔ yemi la nɛ a ma la. Yihi nɛ ngɛ je ma amɛ a mi ma la la nɛ ɔ kɛ nyɛ ya ha Egipt kɛ Egipt bi tsuo. Imi, Nyɔmtsɛ Yawɛ lɛ i de.”

Gbeje

17 Benɛ a nuu wɔ kɛ ho ma se ya a, jeha nyɔngma kɛ enyɔne ɔ we kekleekle nyɔhiɔ ɔ we ligbi nyɔngma kɛ enuɔne ɔ, Yawɛ kɛ mi tu munyu.

18 E ke, “Nɔmlɔ adesa, ye kɔmɔ ha Egipt ma kpekpemi ɔ tsuo. Ngɔɔ a kɛ je ma amɛ nɛ a hɛ mi ngɛ nyami ɔ kɛ ya zugba a sisi tɔɔ kɛ ya piɛ nihi nɛ ngɛ gbeje ɔ a he.

19 De mɛ ke, “Pe nyɛ susuɔ kaa nyɛ he ngɛ fɛu pe nihi tsuo lo? Nyɛ ma ba be kɛ ho gbeje ya, nɛ nyɛɛ kɛ mɔmlɔtɔtsɛmɛ ma ya hi lejɛ ɔ.

20 “Egipt bi ɔmɛ, kɛ nihi nɛ nɔ ngɛ ta mi ɔ a nyagbe maa ba si kake. Ta ma ba kpata mɛ tsuo a hɛ mi.

21 Katsɛmɛ kpanakpanaa, kɛ nihi nɛ piɛ Egipt tabo ɔ he kɛ hwu ta a ma he Egipt bi ɔmɛ atuu kɛ ngmlaa ngɛ gbeje ke, ‘Nihi nɛ li Mawu, nɛ a nɔ ngɛ ta mi ɔ ba su hiɛ ɔ. Mɛ ji nɛ ɔ nɛ!’

22 “Asiria ngɛ lejɛ ɔ, e ta buli nɛ nɔ ngɛ ta mi ɔ a gbogboe ɔmɛ hu ngɛ a yɔkɔ ɔmɛ a mi; a bɔle lɛ kɛ kpe.

23 Yɔkɔ nɛ ɔmɛ ngɛ gbeje muɔ ɔ sisi tɔɔ. E ta buli ɔmɛ tsuo nɔ ngɛ ta mi; nɛ a yɔkɔ ɔmɛ bɔle e nɔ́ ɔ. Se be ko nɛ be ɔ, mɛ ji ni nɛmɛ nɛ wo nihi a he gbeye wawɛɛ ngɛ je ɔ mi.

24 “Elam ngɛ lejɛ ɔ; e ta buli kpekpemi ɔ nɛ nɔ ngɛ ta a mi ɔ a gbogboe ɔmɛ hu ngɛ a yɔkɔ ɔmɛ a mi; a bɔle lɛ kɛ kpe. Nihi nɛ gbo ngɛ ta mi nɛ ɔ, mɛ tsuo a ho gbeje ya kɛ mɔmlɔtɔ. Benɛ a ngɛ wami mi ɔ, a wo nihi a he gbeye wawɛɛ, se jehanɛ lɛɛ a gbo kɛ fɔɔ si kɛ zo kpɔtɔɔ.

25 Elam hwɔɔ si kɛ piɛ ni nɛmɛ nɛ nɔ ngɛ ta mi ɔ a he. E ta buli kpekpemi ɔ a yɔkɔ ɔmɛ bɔle lɛ kɛ kpe. Ni nɛmɛ nɛ gbo ngɛ ta mi nɛ ɔ, mɛ tsuo mɔmlɔtɔtsɛmɛ ji mɛ. Benɛ a ngɛ wami mi ɔ, a wo nihi a he gbeye wawɛɛ; se jehanɛ lɛɛ a gbo kɛ fɔɔ si kɛ zo kpɔtɔɔ.

26 “Meshek kɛ Tubal tsuo ngɛ lejɛ ɔ, nɛ a ta buli ɔmɛ a yɔkɔ ɔmɛ bɔle mɛ kɛ kpe. Mɛ tsuo mɔmlɔtɔtsɛmɛ ji mɛ; a gbe mɛ ngɛ ta mi. Be ko ɔ, a wo je ɔ he gbeye wawɛɛ.

27 A pu we mɛ kaa bɔ nɛ a puɔ katsɛmɛ blema a. Blema a, a puɔ katsɛ kaa nɔ ko nɛ mia e ta hwumi ní kɛ yaa gbeje: a ngɔɔ e klaate kɛ hɔɔ e yi sisi, nɛ a kɛ e tsɛ̃i haa e nɔmlɔ tso ɔ he. Katsɛmɛ nɛ a wo a hɛ mi nyami kikɛ nɛ ɔ ji nihi nɛ a he sawale nuɔ je ɔ nɛ.

28 “Kikɛ nɛ ɔ pɛpɛɛpɛ a maa ku Egipt bi ɔmɛ a mi kɛ pue mɔmlɔtɔtsɛmɛ nɛ nɔ ngɛ ta mi ɔ a nɔ.

29 “Edom kɛ e matsɛmɛ ɔmɛ, kɛ e ganɔ ɔmɛ tsuo ngɛ lejɛ ɔ. Be ko ɔ, ta buli katsɛmɛ ji mɛ; se jehanɛ lɛɛ a ngɛ gbeje, nɛ a kɛ mɔmlɔtɔtsɛmɛ nɛ nɔ ngɛ ta mi ɔ tsuo ngɛ he kake.

30 “Omleyi je ganɔ ɔmɛ tsuo ngɛ lejɛ ɔ. Sidon bi ɔmɛ hu ngɛ lejɛ ɔ. Be ko ɔ, a he wami ɔ haa sawale nuɔ je ɔ tsuo; se jehanɛ lɛɛ a kɛ ni nɛmɛ nɛ nɔ ngɛ ta mi ɔ, zo gbe mɛ tsuo kpɔtɔɔ. Mɛ tsuo mɔmlɔtɔtsɛmɛ ji mɛ, nɛ a ya su gbeje muɔ voo ɔ sisi tɔɔ.

31 “Ke Egipt matsɛ ɔ kɛ e tabo ɔ na nihi babauu nɛ a gbe ngɛ ta a mi nɛ ɔ, a bua maa jɔ.” Nyɔmtsɛ Yawɛ lɛ de.

32 “Imi nitsɛ lɛ i ha Egipt matsɛ ɔ hao je ɔ nɛ; se lɛ nitsɛ kɛ e tabo ɔ tsuo a hɛ mi ma kpata, nɛ a maa pu mɛ, kɛ mɔmlɔtɔtsɛmɛ ɔmɛ nɛ a gbe ngɛ ta a mi ɔ.” Nyɔmtsɛ Yawɛ lɛ de.