Ezekiel 30

Yawɛ maa gbla Egipt tue

1 Yawɛ kɛ mi tu munyu ekohu. E ke,

2 “Nɔmlɔ adesa, gbaa nɛ o ha nɛ a le nɔ́ nɛ imi Nyɔmtsɛ Yawɛ, i ngɛ dee ɔ. Wo yana nɛ o de ke, Ligbi yaya! Ligbi yaya ko ma!

3 Ligbi ɔ su ta. Ligbi ɔ nɛ Yawɛ ma tsu nyakpɛ ní ɔ maa pee aywilɛho, kɛ amanehlu be nitsɛ kɛ ha ma amɛ.

4 A maa hwu ta ngɛ Egipt; nɛ Sudan maa hao wawɛɛ. A maa gbe nihi babauu ngɛ Egipt; a maa muɔ e juetli kɛ je; nɛ ma a maa pee ma doku posoposo.

5 “Gbaa ke ta buli nɛ a bɔ mɛ apaa kɛ je Sudan, Lidia, Libia, Arabia, kɛ Kub ɔ, a ma kpata mɛ tsuo a hɛ mi, nɛ imi nitsɛ ye ni ɔmɛ ekomɛ hu maa nɔ ngɛ ta a mi.”

6 Nyɔmtsɛ Yawɛ ke, “Mahi nɛ piɛɔ Egipt he kɛ je Migdol ngɛ omleyi je kɛ ya su Aswan ngɛ leneyi je ɔ, a mi bi tsuo a hɛ mi ma kpata ngɛ ta a mi. Tabo ɔ nɛ Egipt kɛ fĩaa a hɛ mi ma kpata kulaa. Imi, Nyɔmtsɛ Yawɛ lɛ i de.

7 E zugba a maa pee pasaa kulaa ngɛ je ɔ mi, nɛ e ma amɛ ma plɛ pee ma dokuhi.

8 Ke i mɛ Egipt he la, nɛ i kpata e he piɛli ɔmɛ a hɛ mi ɔ, kɛkɛ a maa le kaa imi ji Yawɛ.

9 “Ke be ɔ nɛ ma kpata Egipt hɛ mi ɔ su ɔ, ma tsɔ nihi nɛ a he sɔɔ kɛ gu wo ɔ nɔ kɛ ya wo Sudan bi ɔmɛ nɛ a hɛ be a he nɔ ɔ he gbeye, konɛ sawale nɛ nu mɛ. Jamɛ a be ɔ su ta!”

10 Nyɔmtsɛ Yawɛ ke, “Ma ha Nebukadnezar, Babilonia matsɛ ɔ ma ba muɔ Egipt ma a tsuo kɛ ho.

11 E kɛ e tabo yiwutsotsɛmɛ ɔmɛ ma ba kpata zugba a hɛ mi. A kɛ klaate ma ba tua Egipt. Zugba a nɔ ma hyi tɔ kɛ ni gbogboehi.

12 Ma ha Nilo pa a maa mii. Ma jua Egipt zugba a tsuo kɛ ha yiwutsotsɛmɛ ɔmɛ. Ma ha nibwɔhi ma kpata zugba a, kɛ e nɔ bi tsuo a hɛ mi. Imi, Yawɛ lɛ i de.”

13 Nyɔmtsɛ Yawɛ ke, “Ma kpata wɔ ɔmɛ, kɛ amaga amɛ nɛ ngɛ Memfis ɔ a hɛ mi. Ganɔ ko be Egipt zugba a nɔ yee hu; lejɛ ɔ maa pee gbeye. Ma ha nɛ sawale maa nu nɔ tsuaa nɔ.

14 Ma ha Egipt leneyi je maa pee ma doku pasaa; nɛ Zoan nɛ ngɛ omleyi je ɔ, ma mɛ he la. Ma gbla Tebes ma a tue.

15 Pelusium, Egipt ma a nɛ a fia gbogbo kɛ bɔle lɛ ɔ hu, ye mi mi maa wo la kɛ wo e he. Ma kpata Tebes ma a tsuo a hɛ mi.

16 Ma mɛ Egipt he la, nɛ Pelusium maa hao wawɛɛ. Ma ku Tebes gbogbo ɔmɛ kɛ pue si, nɛ ma a mi ma hyi tɔ kɛ nyu.

17 Heliopolis, kɛ Bubastis ma amɛ a mi nihewi ma gbo ngɛ ta mi, nɛ nihi nɛ maa piɛ ɔ lɛɛ a maa nuu mɛ nyɔguɛ.

18 Ma kpɔ Egipt he wami ɔ ngɛ e dɛ, nɛ e he nɔ womi babauu ɔ se maa po; jamɛ a be ɔ, diblii maa wo ngɛ Tafanes piani katakata. Amanehlu maa pee kaa bɔku nɛ ha Egipt zugba a nɔ, nɛ a maa nuu e ma amɛ a mi bi ɔmɛ tsuo nyɔguɛ.

19 Ke i gbla Egipt tue wawɛɛ kikɛ nɛ ɔ, kɛkɛ ɔ, a maa le kaa imi ji Yawɛ.”

Egipt matsɛ ɔ he wami ɔ ta

20 Benɛ a nuu wɔ kɛ ho ma se ya a, jeha nyɔngma kɛ kakene ɔ we kekleekle nyɔhiɔ ɔ we ligbi kpaagone ɔ, Yawɛ kɛ mi tu munyu.

21 E de mi ke, “Nɔmlɔ adesa, i ku Egipt matsɛ ɔ kɔni. Nɔ ko nɔ ko to we nɔ tsopa; a fi we hulɔ, konɛ e kɔni ɔ nɛ tsa, nɛ́ e na he wami nɛ e kɛ pɛtɛ klaate he ekohu.

22 Lɔ ɔ he ɔ, bɔ nɛ imi Nyɔmtsɛ Yawɛ, i ngɛ dee ji, i kɛ Egipt matsɛ ɔ ná. Ma kplɔ e kɔni enyɔ ɔmɛ tsuo. Ma ku kake ɔ kɛ piɛ nɔ́ nɛ ku momo ɔ he; kɛkɛ ɔ, e klaate ɔ maa je e dɛ kɛ nɔ si.

23 Ma gbɛ Egipt bi ɔmɛ ngɔ fĩa je ɔ mi tsuo.

24 Lɔ ɔ se ɔ, ma wo Babilonia matsɛ ɔ dɛ mi klaate, konɛ e na he wami ekohu. Se Egipt matsɛ ɔ lɛɛ, ma kplɔ e kɔni ɔmɛ ngɛ e he. E ma kɛmɛ ngɛ e he nyɛlɔ ɔ hɛ mi; nyagbe ɔ, e ma gbo.

25 Ee, Egipt matsɛ ɔ kɔnihi ma kplɔ ngɛ e he; se Babilonia matsɛ ɔ lɛɛ, ma wo lɛ he wami. Ke i wo e dɛ mi klaate, nɛ e wo nɔ kɛ tsɔɔ Egipt blɔ ɔ, nɔ tsuaa nɔ ma ná maa le kaa imi ji Yawɛ.

26 Ma gbɛ Egipt bi ɔmɛ kɛ fĩa je ɔ mi tsuo. Kɛkɛ ɔ, a ma ná maa le kaa imi ji Yawɛ.”