Ezekiel 29

A maa gbla Egipt tue

1 ⓒ Benɛ a nuu wɔ kɛ ho ma se ya a, jeha nyɔngmane ɔ we nyɔhiɔ nyɔngma a we ligbi nyɔngma kɛ enyɔne ɔ, Yawɛ de mi ke,

2 “Nɔmlɔ adesa, plɛ o hɛ mi kɛ kpee Egipt matsɛ ɔ, nɛ o de lɛ ke a maa gbla e kɛ e ma a tsuo a tue.

3 De lɛ ke bɔ nɛ Nyɔmtsɛ Yawɛ ngɛ Egipt matsɛ ɔ dee ji nɛ ɔ nɛ: Mo wo mi lohwe gbeyegbeye, i kɛ mo ná. O ke Nilo pa a o nɔ, nɛ mo lɛ o pee.

4 Ma wo o nya mi gbowe, nɛ e maa la o tsitsa; kɛkɛ ɔ, lo ɔmɛ tsuo ngɛ pa a mi maa mɛtɛ o he toto ɔmɛ a he. Lɔ ɔ se ɔ, ma gbla mo kɛ je Nilo pa a mi, kɛ lo ɔmɛ tsuo nɛ mɛtɛ o he ɔ.

5 Ma sake mo, kɛ lo ɔmɛ tsuo ngɔ fɔ nga a nɔ. O ma ya nɔ si, nɛ o ma gbo kɛ fɔ lejɛ ɔ. A be mo pue; ma ha lohwe awi yeli, kɛ lohwe pɛlitsɛmɛ mohu maa ye mo.

6 ⓓ Kɛkɛ ɔ, Egipt ma a tsuo maa le kaa imi ji Yawɛ.” Yawɛ ke, “Egipt ngɛ kaa gla nɛ Israel kɛ pee dɛma tso.

7 Benɛ a pɛtɛ he ɔ, e ku, nɛ e plaa a konɔ tsuo. A ke a ma kpasa lɛ ɔ, e ku nɛ e ha a nanehi hluã.

8 Lɔ ɔ he ɔ, jehanɛ lɛɛ imi Nyɔmtsɛ Yawɛ, i ngɛ dee ke imi nitsɛ ma ha ta ma ba tua ma a. A maa gbe nɔ tsuaa nɔ; a ma kpata lohwehi tsuo a hɛ mi.

9 Nɔ ko nɔ ko be Egipt zugba a nɔ hie hu; zugba a maa pee ma doku nɛ e maa fɔ si gu. Lɔ ɔ loko a maa le kaa imi ji Yawɛ. “Akɛnɛ o ke Nilo pa a o nɔ́, nɛ́ mo nitsɛ lɛ o pee he je ɔ,

10 i kɛ mo ná, nɛ i kɛ o Nilo pa a hu ná. Ma ha Egipt zugba a tsuo nɔ maa je gu; e maa pee ma dokuhi sɔuu kɛ je Migdol ngɛ omleyi je kɛ yaa su Aswan ngɛ leneyi je, hluu kɛ ma ya su Sudan bi ɔmɛ a huzu ɔ nya tɔɔ.

11 Nane ko nane ko be zugba a nɔ nyɛɛe hu, nɔmlɔ nɔ́ jio, lohwe nɔ́ jio. Lejɛ ɔ maa fɔ si gu jeha nyingmi eywiɛ sɔuu.

12 Ma ha Egipt zugba a nɔ maa pee sakosako pe kulaa ngɛ je ɔ mi. Ma ha Egipt ma amɛ maa pee ma dokuhi jeha nyingmi eywiɛ sɔuu. Ma doku ko ma doku ko kɛ mɛ be sɔe. Ma fie Egipt bi ɔmɛ kɛ je a zugba a nɔ kɛ ya zugba kpahi a nɔ kɛ ya futu je ma kpahi.”

13 Bɔ nɛ Nyɔmtsɛ Yawɛ ngɛ dee ji nɛ ɔ nɛ: “Jeha nyingmi eywiɛ ɔ se ɔ, ma bua Egipt bi ɔmɛ a nya kɛ je je ma amɛ a kpɛti he nɛ i gbɛ mɛ ngɔ fĩa a.

14 Ma ha a ma ba hi a hi he momo ɔ ngɛ Egipt leneyi je. A ma ba to nɔ yemi ko nɛ he wɛ kulaa sisi ngɛ lejɛ ɔ.

15 E maa pee nɔ yemi nɛ he wɛ pe kulaa. Ma pee mɛ ma wayoo, bɔ nɛ a be nyɛe maa ye je ma amɛ ekoeko nɔ hu.

16 Ke e ba mi ja a, e be ma nɛ Israel bi ɔmɛ maa ngɔ a hɛ kɛ fɔ e nɔ pee hu. Ejakaa a ma kai kaa e ji tɔmi agbo kaa Israel ngɔ e hɛ kɛ fɔ Egipt nɔ. Kɛkɛ ɔ, Israel maa le kaa imi ji Nyɔmtsɛ Yawɛ.”

Matsɛ Nebukadnezar maa ngɔ Egipt zugba a

17 Benɛ a nuu wɔ kɛ ho ma se ya a, jeha nyingmi enyɔ kɛ kpaagone ɔ we kekleekle nyɔhiɔ ɔ we kekleekle ligbi ɔ, Yawɛ kɛ mi tu munyu, nɛ e de mi ke,

18 “Nɔmlɔ adesa, Nebukadnezar, Babilonia matsɛ ɔ ya tua Tiro. E ha e ta buli tsu ní kpakpataa ngɛ ta nɛ e kɛ Tiro ngɛ hwue ɔ he: a tloo tlomi nɛ jiɔ; nɔ tsuaa nɔ yi mi kpa, nɛ e konɔ kpɔ. Se matsɛ ɔ kɛ e tabo ɔ na we se ko kɛ ji dengme nɛ a gbo ɔ mi.

19 Lɔ ɔ he ɔ, nɔ́ nɛ imi Nyɔmtsɛ Yawɛ, i ngɛ dee ji, i ngɔ Egipt zugba a kɛ ngɛ Matsɛ Nebukadnezar dɛ mi woe. E maa ha ní, nɛ e maa ngɔ ní babauu nɛ Egipt ngɛ ɔ tsuo kɛ ho; nɛ ní ɔmɛ maa pee e ta buli ɔmɛ a hiɔwo.

20 I ngɔ Egipt zugba a kɛ ha lɛ kaa e hiɔwo; ejakaa imi lɛ e tabo ɔ tsu ní ɔ kɛ ha. Imi, Nyɔmtsɛ Yawɛ lɛ i de.

21 “Jamɛ a ligbi ɔ, ma ha Israel ma na he wami he, nɛ ma ha Ezekiel maa tu munyu wawɛɛ ngɛ ma a tsuo hɛ mi, konɛ a le kaa imi ji Yawɛ.”