Ezekiel 26

A ma kpata Tiro hɛ mi

1 ⓦ Benɛ a nuu wɔ kɛ ho ma se ya a se jeha nyɔngma kɛ kakene ɔ we kekleekle ligbi ngɛ nyɔhiɔ ko[6] mi ɔ, Yawɛ kɛ mi tu munyu.

2 E ke, “Nɔmlɔ adesa, bɔ nɛ Tiro bi ɔmɛ ngɛ nyae, nɛ a ngɛ dee ngɛ Yerusalem he ji, ‘Yiɛɛ! A ku Yerusalem ngɔ pue si! E jua yemi, kɛ ní nɛ e na a tsuo ma ba je wa ngɔ.’

3 “Lɔ ɔ he ɔ, bɔ nɛ imi Nyɔmtsɛ Yawɛ, i ngɛ dee ji: Tiro, i kɛ mo ná. Ma ha je mahi babauu ma ba tua mo; a maa ba nɔtonɔto kaa bɔ nɛ wo oslɔkehi kuɔ kɛ baa wo dɔ mi.

4 A ma kpata o ma a hɛ mi; a maa ku gbogbo ɔmɛ, kɛ mɔ gojogojo ɔmɛ kɛ pue si. Lɔ ɔ se ɔ, imi nitsɛ ma bɛɛ zu ɔ tsuo kɛ je lejɛ ɔ kɛ ho, nɛ e maa piɛ tɛ sa kpataa kɛkɛ.

5 Wo hɛli ma ka a yahi ngɛ tɛ sa a nɔ, ngɛ wo ɔ kpɛti he nɛ e maa si ngɛ ɔ. Imi, Nyɔmtsɛ Yawɛ lɛ i de. Je ma amɛ ma ba ha ní ngɛ Tiro;

6 nɛ a kɛ a klaate maa gbe nimli ɔmɛ tsuo nɛ ngɛ ma amɛ a mi ngɛ zugba a nɔ. Lɔ ɔ loko Tiro maa le kaa imi ji Yawɛ.”

7 Nyɔmtsɛ Yawɛ ya nɔ nɛ e de ke, “Ma ha Nebukadnezar, Babilonia matsɛ nguaa pe kulaa a ma ba tua Tiro. E kɛ e tabo babauu nitsɛ, nihi nɛ hi okpɔngɔhi a nɔ, nihi nɛ ngɛ ta zugba lɛhi a mi, kɛ nihi nɛ nyɛɛ nane maa je omleyi je kɛ ba.

8 Nihi nɛ ngɛ o ma amɛ a mi ngɛ nga a nɔ ɔ, ma kpata a hɛ mi. Ma ha o he nyɛlɔ ɔ maa tsua muɔ kɛ bɔle mo; e maa fia kpoku kɛ wo o he, nɛ e kɛ tsɛ̃i maa ma si kaa gbogbo kɛ bɔle mo.

9 E maa ngɔ e gbogbo kumi ní ɔmɛ kɛ si o gbogbo ɔmɛ, nɛ o mɔ gojogojo ɔmɛ hu, e maa ngɔ e dade ɔmɛ kɛ ku mɛ kɛ pue si.

10 E we okpɔngɔhi maa hiɛ babauu nɛ a se bunyuku ɔ maa laa o nɔ. Okpɔngɔ ɔmɛ, e ní gblami tlɔɔke ɔmɛ, kɛ e ta zugba lɛ ɔmɛ maa sɛ agbo ɔmɛ a mi gidigidi kaa a sɛɔ ma ko nɛ a ye e nɔ momo mi. A hoo peemi ɔ ma mimiɛ o gbogbo ɔmɛ tete.

11 Okpɔngɔ nɔ hili ɔmɛ kɛ a dɛ mi klaate maa wo okpɔngɔ ɔmɛ fo kɛ gu ma a gbɛjegbɛ ɔmɛ a nɔ. Nɔ ko nɔ ko be e he yee ngɛ a blɔ mi. A maa gbe nimli ɔmɛ tsuo; nɛ o titima amɛ nɛ a he wa a maa nɔɔ si.

12 O he nyɛli ɔmɛ ma kpɔ ní nɛ o ná a ngɛ o dɛ, nɛ a maa ha o guɛ ní. A maa ku o gbogbo ɔmɛ kɛ, o we saminyawiiwi ɔmɛ. A maa muɔ tɛ ɔmɛ kɛ tso ɔmɛ, kɛ zu ɔ tsuo kɛ ya pue wo mi.

13 ⓧ Ma ha o la amɛ a se maa po; a be o saku ɔmɛ a he nue hu.

14 Ma pee mo tɛ sa kpataa, he nɛ wo hɛli ma ka a yahi ngɛ. A be mo dlae kɛ pee ma hu. Imi, Nyɔmtsɛ Yawɛ lɛ i de.”

15 Bɔ nɛ Nyɔmtsɛ Yawɛ ngɛ Tiro ma a dee ji nɛ ɔ nɛ: “Benɛ a ngɛ o hɛ mi kpatae, nɛ ngmlaa ngɛ ma mi bi ɔmɛ a nya jee ɔ, nihi tsuo nɛ ngɛ wo nya ma amɛ a mi ɔ, a he maa do blibliibli.

16 ⓨ Ganɔ ɔmɛ tsuo nɛ ngɛ wo nya ma amɛ a mi ɔ ma kple si kɛ je a sɛ ɔmɛ a nɔ. A ma kpa a he bo ngɔ fɔ si; nɛ a ma je a tade ɔmɛ nɛ a lo ní ngɔ wo a mi ɔ ngɛ a he. A maa hi si ngɛ zugba, nɛ a he maa do blibliibli. Gbeye ma ha a he maa hi doe blibliibli be ɔ tsuo ngɛ nɔ́ nɛ ba o nɔ ɔ he.

17 A ma la mɔbɔ la kɛ nyɛ ya ha mo kikɛ nɛ ɔ: Mo ma nɛ o he biɛ kaa wo nya ma nɛ he wa, a kpata o hɛ mi pɛsɛpɛsɛ kɛ je wo ɔ nɔ! Jinɛ o kɛ o mi bi nyɛ he ngɛ gbeye ngɛ wo ɔmɛ a nɔ; nyɛ haa sawale nuu wo nya ma amɛ tsuo!

18 Se jehanɛ lɛɛ, ma amɛ a he maa do blibliibli kaa mwɔnɛ ligbi nɛ ɔ, a kpata o hɛ mi! Niinɛ, wo nya ma amɛ tsuo a tsui maa po kaa a kpata o hɛ mi kikɛ nɛ ɔ!”

19 Bɔ nɛ Nyɔmtsɛ Yawɛ ngɛ dee ji nɛ ɔ nɛ: “Ma ha o ní maa pee mɔbɔ kaa ma doku nɛ nɔ ko nɔ ko be mi. O ma mu kɛ ya wo ɔ sisi tɔɔ.

20 O ma kple si kɛ ya su gbeje nitsɛ, he nɛ blematsɛmɛ ɔmɛ nɛ a be je mi hu ɔ ngɛ ɔ. Lejɛ ɔ o kɛ mɛ maa hi ngɛ blema níhi nɛ a kpata a hɛ mi ɔ a mi ngɛ je ɔ sisi tɔɔ. Kɛkɛ ɔ, o be nyɛe maa pee ma nɛ nɔmlɔ adesa maa hi mi ngɛ je nɛ ɔ mi hu!

21 ⓩ Ma ha o nyagbe maa pee gbeye; o be je mi hie hu. Ke a bi o si ɔ, a be mo nae; o maa laa gbidii kɛ yaa neneene.” Nyɔmtsɛ Yawɛ lɛ de.